■ අමන්දිකා කුරේ
බාලවයස්කරුවන් යොදාගෙන සිදු කළ නොහැකි රැකියා 71ක් සහිත සංශෝධිත ගැසට් පත්‍රයක් සඳුදා, එනම් ඔක්තෝබර් 04 වන දින පාර්ලිමේන්තුවට ඉදිරිපත් කෙරෙන බව ”අනිද්දා” කම්කරු අමාත්‍යාංශයෙන් කළ විමසීමක දී එහි නීති නිලධාරීනී ගයනි විජේසූරිය මහත්මිය ප්‍රකාශ කළා ය.
”මීට පෙර තිබුණු ගැසට් පත්‍රයේ රැකියා 51ක් සඳහන් වුණා. සංශෝධිත ගැසට් පත්‍රයේ රැකියා 71ක් සඳහන් වෙනවා. ඒ අතර, ගෘහස්ථ සේවය, සතුන් රැකබලා ගැනීම, රසායනික ද්‍රව්‍ය භාවිත කර ආහාර සකස්
කරන ස්ථානවල රැකියා, රසායනික ද්‍රව්‍ය භාවිත කරන රූපලාවන්‍යාගාරවල සේවය වැනි අලුත් ක්ෂේත්‍ර රැසක, ළමුන් සේවයේ යෙදවීම මෙමඟින් තහනම් වෙනවා”
වසර 16ට අඩු ළමුන් කිසිසේත් සේවයේ යෙදිය නොහැකි බවද වයස අවුරුදු 16-18 අතර ළමුන් සඳහා ඉහත ගැසට් පත්‍රය මඟින් තහනම් කර ඇති අන්තරායකර සේවාවල නිරත වීම තහනම් වන බවද ඇය වැඩිදුරටත් ප්‍රකාශ කළාය.■
