No menu items!
20.9 C
Sri Lanka
28 March,2024

විවෘත විශ්ව විද්‍යාලයට කුමක් වේවිද?

Must read

අගෝස්තු 26 වැනිදා අධ්‍යාපන ප්‍රතිසංස්කරණ විවෘත විශ්ව විද්‍යාල හා දූරස්ථ අධ්‍යාපන ප්‍රවර්ධන රාජ්‍ය අමාත්‍යවරයා ලෙස සුසිල් ප්‍රේම්ජයන්ත ජනාධිපතිවරයා ඉදිරියේ දිවුරුම් දුන්නේය. ඒ අනුව විශ්වවිද්‍යාල ප්‍රතිපාදන කොමිසම අධ්‍යාපන අමාත්‍යවරයා යටතටත්, විශ්වවිද්‍යාල ප්‍රතිපාදන කොමිසමට ඇතුළත් විවෘත විශ්වවිද්‍යාල රාජ්‍ය අමාත්‍යවරයෙකු යටතටත් පත් කර තිබෙන බව බැලූ බැල්මට පෙනෙන්නට ඇති කාරණයයි. එහෙත් පරහක් ඇත.

අධ්‍යාපන ප්‍රතිසංස්කරණ, විවෘත විශ්වවිද්‍යාල හා දුරස්ථ අධ්‍යාපන ප්‍රවර්ධන රාජ්‍ය අමාත්‍යවරයාගේ කාර්යයන් හා කර්තව්‍යයන් අමාත්‍ය මණ්ඩල විෂයන් වෙන්කිරීම සඳහා නිකුත් කළ ගැසට් පත්‍රයේ දක්වා ඇත. එහි ප්‍රමුඛ කාරණයක් ලෙස කැබිනට් මණ්ඩලය පිළිබඳව නිකුත් කළ අතිවිශේෂ ගැසට් පත්‍රයේ දක්වා ඇත්තේ අධ්‍යාපන අමාත්‍යවරයාගේ උපදෙස් හා මඟපෙන්වීම මත දැනුමෙන් පිරිපුන් සමාජයක් ඇතිකිරීම සඳහා අදාළ නීති සහ අණ පනත්වලට අනුකූලව අධ්‍යාපන ප්‍රතිසංස්කරණ විවෘත විශ්වවිද්‍යාල හා දූරස්ථ අධ්‍යාපන විෂයයට අදාළ ප්‍රතිපත්ති සම්පාදනයට සහය වීමය. ඊට අමතරව විවෘත විශ්වවිද්‍යාල හා දූරස්ථ අධ්‍යාපනය අවස්ථා පුළුල් කිරීම රාජ්‍ය අමාත්‍යවරයාගේ සුවිශේෂ ප්‍රමුඛතා අතර දෙවැනියට දක්වා ඇත.

එහෙත් එම රාජ්‍ය අමාත්‍යවරයාට අයත් දෙපාර්තමේන්තු ව්‍යවස්ථාපිත ආයතන හා රාජ්‍ය සංස්ථා ලෙස දක්වා ඇත්තේ ජාතික අධ්‍යාපන ආයතනය හා ජාතික අධ්‍යාපන කොමිෂන් සභාව පමණි. විවෘත විශ්වවිද්‍යාලය වෙනම ආයතනයක් ලෙස එම අමාත්‍යාංශය යටතේ ඇති ආයතන අතර සඳහන් නොවේ. විවෘත විශ්වවිද්‍යාලය පවතින්නේ විශ්වවිද්‍යාල ප්‍රතිපාදන කොමිෂන් සභාව යටතේය. එම කොමිෂන් සභාව අයත් වන්නේ අධ්‍යාපන අමාත්‍යාංශය යටතේය. ඒ අනුව විවෘත විශ්වවිද්‍යාල යනුවෙන් වෙනම අමාත්‍යාංශයකුත් ඇත, එහෙත් එය අයත් වන්නේ තවත් අමාත්‍යාංශයකටය.

මෙකී කරුණු පිළිබඳ අවධානය යොමු කිරීම වැදගත් වන්නේ පසුගිය කාලය පුරා ශ්‍රී ලංකා විවෘත විශ්වවිද්‍යාලය මුහුණ පා සිටින අර්බුදය නිසාය.

ශ්‍රී ලංකා විශ්වවිද්‍යාල කොමිෂන් සභාව විසින් පවත්වාගෙන යන විශ්වවිද්‍යා ගණන 15කි. විවෘත විශ්වවිද්‍යාලය ඉන් එකකි. මේ විශ්වවිද්‍යාල 15 අතරින් 14 ක් ම පවත්වාගෙන යන්නේ පාසල් අධ්‍යාපනය හමාර කර එහිම දිගුවක් ලෙස උසස් අධ්‍යාපනය සඳහා සිසුන්ට අවස්ථා සැලසීම වෙනුවෙනි. සිසුන් ජීවිතය ආරම්භ කරන්නේ ඒ උසස් අධ්‍යාපනය ලැබීමෙන් පසුවය.

විවෘත විශ්ව විද්‍යාලය ඒ සාම්ප්‍රදායික විශ්වවිද්‍යාල සියල්ලට වඩා සුවිශේෂ වන්නේ කුමන හේතුවක් නිසා උසස් අධ්‍යාපනය ලැබීමට සුදුසුකම් නොලද පුද්ගලයන්ට සාපේක්ෂව අඩු මුදලක් ගෙවා උසස් අධ්‍යාපනය ලැබීමට අවස්ථාව ලබාදෙන අධ්‍යාපන ආයතනයක් වන නිසාය.

ලංකාවේ එවැනි පහසුකමක් සහිත එකම රාජ්‍ය විශ්වවිද්‍යාලය වන්නේ විවෘත විශ්වවිද්‍යාලයයි. පෞද්ගලික විශ්වවිද්‍යාලවල ඒ සඳහා අවස්ථාව ඇතත් ඒවායෙහි පාඨමාලා ගාස්තු මිල අධිකය. සාමාන්‍ය පවුල්වල පුද්ගලයන්ටද විවෘත විශ්වවිද්‍යාලයේ දොරටු විවෘතය. ගුරුවරුන්, හෙදියන්, තාක්ෂණවේදීන්, මාධ්‍යවේදීන් වැනි විවිධ රැකියාවල නිරතවෙන පුද්ගලයෝද තම රැකියාවේ නිරත වෙන අතරතුර උසස් අධ්‍යාපනය විවෘත විශ්වවිද්‍යාලයේදී ලබති.

විශ්වවිද්‍යාල ආචාර්යවරුන්ගේ සංගමයේ සභාපති ආචාර්ය දිලීප විතාරණ මෙසේ විස්තර කළේය.

‘මේ විශ්වවිද්‍යාලය හැදුවේ වැඩ කරන ජනයාට ඉතාම අඩු මුදලකට අධ්‍යාපනය දෙන අරමුණින්. ආරම්භයේදී තිබුණු අදහස තමයි සාමාන්‍ය වැඩ කරන කෙනෙක්ගේ, ඒ කියන්නේ උපාධිධාරී ලෙවල් එකට පහළ ස්තරයේ කෙනෙකුගේ සුමාන දෙකක වැටුප අවුරුද්දක පාඨමාලාවක ගාස්තුව වෙන්න ඕනෑ කියන එක. පසුකාලීනව ඒ සංකල්පය හරියට ක්‍රියාත්මක වුණාද නැද්ද කියන ප්‍රශ්නය තියෙනවා.

විවෘත විශ්වවිද්‍යාලයේ අධ්‍යයන, අනධ්‍යයන කාර්ය මණ්ඩලවලට වැටුප් ගෙවන්නේ උසස් අධ්‍යාපන අමාත්‍යාංශයෙන්. නැත්නම් රජයෙන්. අපේ ගොඩනැගිලි සහ රසායනාගාර සියල්ල නඩත්තු කරන්නෙත් රජයෙන්. ඊට අමතරව ළමයින්ගේ අධ්‍යයන කටයුතු සඳහා වැය වන මුදලිනුත් 66.6% ක් ආණ්ඩුවෙන් දරන්නේ. අධ්‍යාපනය ලබන අයගෙන් අය කර ගන්නේ 33.3% යි. හැබැයි අවුරුදු 10 ක  විතර ඉඳන් ඔය අදහස අහෝසි වෙමින් පැවතුණා. 33.3% උල්ලංඝනය වෙලා ළමයින්ගෙන් මුදල් අය කිරීම වැඩි වුණා.’

පසුගිය දශකයක පමණ කාලය පුරා පාඨමාලා ගාස්තු වරින් වර ඉහළ දමීම හා සිසුන්ගේ පහසුකම් කප්පාදු කිරීම පාලනය කරගැනීම සඳහා විවෘත විශ්වවිද්‍යාලයේ සිසුන්ට නොනවත්වා අරගල කරන්නට සිදු විය. 2014 වසරේදී පාඨමාලා ගාස්තු 120%කින් ඉහළ දැමූ අවස්ථාවේ විවෘත විශ්වවිද්‍යාලයේ සිසු එකමුතුව හා අනෙකුත් විශ්වවිද්‍යාලවල ශිෂ්‍ය ව්‍යාපාර මැදිහත් වී කළ අරගලයක ප්‍රතිඵලයක් ලෙස ඒ උත්සාහය ව්‍යර්ථ වී තිබිණි. පාඨමාලා ගාස්තු යළි ඉහළ දමන්නේ නම් එසේ කරන්නේ විශ්වවිද්‍යාලයේ ශිෂ්‍යයන් සම්බන්ධ කමිටුව හා සාකච්ඡාවකින් පසුව බවට විශ්වවිද්‍යාල ප්‍රතිපාදන කොමිෂන් සභාව 2015 ජූනි 29 වන දින එකඟතාවකට පැමිණ තිබුණි. ඒ පොරොන්දු කඩ කරමින් ඉන් පසුව පාඨමාලා ගාස්තු ඉහළ දමන්නට ඔවුහු කටයුතු කරමින් සිටිති.

විවෘත විශ්වවිද්‍යාලයීය මහා ශිෂ්‍ය සංගමයේ සභාපති හර්ශ මධුෂංක ඒ පිළිබඳ විස්තර කළේ මෙලෙසය.

‘හැම අවුරුද්දකම පාඨමාලා ගස්තු වැඩි වෙනවා 10% සීමාවත් ඉක්මවලා. 2016 අවුරුද්දේ තිබුණු පාඨමාලා ගාස්තුව 2017 අවුරුද්දේ 40% කින් වැඩි කරනවා. ඒක වෙන්නේ 2016 අවුරුද්දේ මූලධන වියදම් ලෙස විවෘත විශ්වවිද්‍යාලයට අයින් කරනවා රුපියල් මිලියන 230 ක්. 2017 අවුරුද්දේ ඒක මාසෙකට රුපියල් මිලියන 150 ට අඩු කරනවා. 230 යි 150 යි අතර මිලියන 70 ක හිඟය පියවා ගන්න තමයි ළමයින්ගේ පාඨමාලා ගාස්තු වැඩි කරන්නේ. පඩි ගෙවීම් සඳහා යන වියදමත් එක්ක බැලුවාම මාසෙකට රුපියල් මිලියන 360 ක් යනවා. අධ්‍යයන අනධ්‍යයන කාර්ය මණ්ඩලවල පඩි ගෙවීම සඳහා අවශ්‍ය රුපියල් මිලියන 190න් රුපියල් මිලියන 150ක් පමණයි ලැබිලා තියෙන්නේ. එතන අඩු වෙන මිලියන 40ත් ශිෂ්‍යයන්ගෙන් තමයි අයකරගෙන තියෙන්නේ. එතකොට රුපියල් මිලියන 210 ක්ම පහුගිය මාසවල ලබාගෙන තිබෙන්නේ ශිෂ්‍යයන්ගෙන්.’

ටිකෙන් ටික ප්‍රතිපාදන කප්පාදු කරමින්, ශිෂ්‍යයන්ගෙන් අය කරගන්නා මුදලින් විශ්වවිද්‍යාලය නඩත්තු කරන්නට පටන්ගෙන තිබීම පිළිබඳ යම් ඉඟියක් ලැබෙන්නේ 2019 පාස්කු ප්‍රහාරයෙන් පසු කෙටි කලක් විශ්වවිද්‍යාලයට ශිෂ්‍යයන්ගෙන් ලැබෙන ආදායම් නොලැබී ගිය නිසාය. විශ්වවිද්‍යාලයේ කටයුතු නැවත ආරම්භ වීමත් සමග තත්වය යට පත් වී තිබුණි. 2020 මාර්තු මාසයේ අග කොවිඞ්-19 තත්ත්වය ඇති වීමත් සමග යළිත් ශ්‍රී ලංකා විවෘත විශ්වවිද්‍යාලය අර්බුදයට ගියේ සිසුන්ගෙන් ලැබෙන මුදල් නොලැබීම හේතුවෙනි.

‘විවෘත විශ්වවිද්‍යාලයේ උපකුලපති ඊ-මේල් එකක් එව්වා විශ්වවිද්‍යාලය ආර්ථික අර්බුදයක ඉන්නේ, පඩි ගෙවන්නත් අපට තියෙන්නේ රුපියල් මිලියන 150 යි, සැලකිල්ලෙන් මුදල් පරිහරණය කරන්න ඕනෑ, සියලුම වියදම් කපා හරින්න ඕනෑ කියලා. ඒ බව ඊ මේල් එකෙන් තමයි අපි දැන ගත්තේ. අධ්‍යයන හා අනධ්‍යයන දෙකටම පඩි ගෙවන්න මාසෙකට රුපියල් මිලියන 190 ක් විතර ඕනෑ. පහුගිය වසරේ මැද ඉඳලා මාසයකට දුන්නේ රුපියල් මිලියන 150 යි. හිඟ රුපියල් මිලියන 40 ක් පියෙව්වේ ළමයින්ගෙන් අය කරන සල්ලිවලින්. එහෙම අවුරුද්දක් තිස්සේ රුපියල් මිලියන 400 ක් 500 ක් විතර ළමයින්ගෙන් ගන්න සල්ලිවලින් වියදම් කරලා තියෙනවා.

ආචාර්යවරුන්ගේ සංගමය හැටියට අපි මැදිහත් වෙලා, පුවත්පත් සාකච්ඡා තියලා උසස් අධ්‍යාපන අමාත්‍යාංශයට ලියලා  ඇමතිතුමාට ලියලා ඒ ගැන මැදිහත්වීමක් කළා. ඒ මැදිහත්වීම ශිෂ්‍යන්ගේ පැත්තෙනුත් වුණා. ඒ බලකිරීම උඩ ඡන්දෙන් පස්සේ දෙන්නම් වගේ කතා කිය කිය හිටපු එක අතෑරලා ජූලි හා අගෝස්තුවලට මුදල් දුන්නා.’ විශ්වවිද්‍යාල ආචාර්යවරුන්ගේ සංගමයේ සභාපති ආචාර්ය දිලීප විතාරණ පැහැදිලි කළේය.

එලෙස ලබාදී තිබුණේ මහමැතිවරණයට පෙරය. දැන් ඡන්දය අහවරය. නව කැබිනට් මණ්ඩලය පත් වී තිබේ. දිලීප විතාරණ ඇතුළු විශ්වවිද්‍යාල ආචාර්යවරුන්ගේ සංගමයේ නියෝජිතයන් පවසන්නේ ඉදිරියේදී ආණ්ඩුවෙන් විවෘත විශ්වවිද්‍යාලවලට මුදල් ලබාදෙනු ඇතිද යන්න සැකසහිත බවය.

‘ආණ්ඩුව විවෘත විශ්වවිද්‍යාලය සම්බන්ධයෙන් වන අයිතිය අතාරියිද කියන සැකය අපට තියෙනවා. පළමු අවස්ථාවේදී ආණ්ඩුවට අයිතියි. එහෙත් ළමයින්ගෙන් මුදල් අරගෙන පුද්ගලික විශ්වවිද්‍යාලයක් හැටියට පවත්වාගෙන යන්න ඉඩ තියෙනවා. පසුව ආණ්ඩුව අයිතියත් අත්හැරියොත් පුදුම වෙන්න දෙයක් නෑ. වත්කම ගණනය කරලා කොටස් වෙළෙඳපොළේ හරි විකුණලා මේක පුද්ගලික විශ්වවිද්‍යාලයක් කරලා දාන්න පුළුවන්.’ ඔවුන් තමන්ගේ සැකය එසේ ප්‍රකාශ කරයි.

මෙවර අතුරු සම්මත ගිනුමෙන් විවෘත විශ්වවිද්‍යාල පිළිබඳ රාජ්‍ය අමාත්‍යාංශයට විවෘත විශ්වවිද්‍යාලය පවත්වාගෙන යෑම සඳහා මුදල් වෙන්කර නැත. එම මුදල් අධ්‍යාපන අමාත්‍යාංශයේ වැය ශීර්ෂය යටතේ වෙන්කර තිබේදැයි අතුරු අය වැය පිරික්සද්දී පැහැදිලි වන්නේ නැත. කෙසේවෙතත් අනෙකුත් විශ්වවිද්‍යාල මෙන්ම විවෘත විශ්වවිද්‍යාලයට ආණ්ඩුව මුදල් වෙන් කළ යුතු බවත්, මුදල් අයකළාට එය ලාභය මත නඩත්තු වන පෞද්ගලික අධ්‍යාපන ආයතනයක් නොවන බවත් විවෘත විශ්වවිද්‍යාල විෂය භාර රාජ්‍ය ඇමතිවරයාද, විවෘත විශ්වවිද්‍යාලය භාර අධ්‍යාපන ඇමතිවරයාද සිහිතබාගත යුතුය.■

ප්‍රියන්ජිත් ආලෝකබණ්ඩාර

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි