භාෂණය හා ප‍්‍රකාශනය සඳහා ඇති මූලික අයිතිය උල්ලංඝනය කරමින් පොලීසිය අන්තර්ජාලය ඔස්සේ අදහස් පළකරන පුද්ගලයන් අත්අඩංගුවට ගැනීම හා එයට අදාළව පොලීසිය නිකුත් කර ඇති මාධ්‍ය නිවේදනය පිළිබඳව විරෝධය පළ කරමින් ප‍්‍රධාන මාධ්‍ය සංවිධාන හතක් ඒකාබද්ධ මාධ්‍ය නිවේදනයක් නිකුත් කර ඇත.
‘අන්තර්ජාලය ඔස්සේ අසත්‍ය හෝ ද්වේෂ සහගත ප‍්‍රකාශ පළකරන පුද්ගලයන්ට එරෙහිව දැඩි නීතිමය පියවර’ යන මාතෘකාවෙන් යුතුව අපේ‍්‍රල් 01 වැනිදා පොලීසිය නිකුත් කර ඇති මාධ්‍ය නිවේදනය ඉහත කී විරෝධය සඳහා හේතුවී තිබේ.
ශ‍්‍රී ලංකා වෘත්තීය ජනමාධ්‍යවේදීන්ගේ සංගමය, නිදහස් මාධ්‍ය ව්‍යාපාරය, මාධ්‍ය සේවක වෘත්තිය සමිති සම්මේලනය, ශ‍්‍රී ලංකා තරුණ ජනමාධ්‍යවේදීන්ගේ සංගමය, ශ‍්‍රී ලංකා මුස්ලිම් මාධ්‍ය සංසදය, දෙමළ මාධ්‍ය සංසදය හා අන්තර්ජාල මාධ්‍ය ක‍්‍රියාකාරීත්වය අපේ‍්‍රල් 04 වැනිදා එම නිවේදනය නිකුත් කර ඇත.
නිවේදනයෙහි මෙසේ සඳහන්ය.
‘පොලීසිය මේ වන විට සමාජ ජාල පරිශීලකයන් කිහිපදෙනෙක් අත්අඩංගුවට ගෙන තිබේ. එය කිසිසේත් සිදු නොවිය යුත්තක් වන අතර කිනම් පසුබිමකදී වුව භාෂණයේ හා ප‍්‍රකාශනයේ අයිතිය අනුල්ලංඝනීය බව සලකා, මේ සම්බන්ධයෙන් ක්රියාත්මක විය යුත්තේ වඩාත් වගකීම් සහගතව හා පෘථුල අවබෝධයක් සහිතව බව පෙන්වාදෙනු කැමැත්තෙමු. මෙවැනි, ව්‍යසනයක් උද්ගතව පවතින අවස්ථාවක ‘ව්‍යාජ පුවත්’ හා ‘වැරදි තොරතුරු’ සමාජගත වීම බරපතළ හානියක් බව වගකිව යුතු මාධ්‍ය සංවිධාන ලෙස අපිද විශ්වාස කරමු.
එබැවින් එවැනි තත්වයක් උද්ගතවීම වැළැක්වීමට හැකි සෑම උත්සාහයක්ම ගෙන ඇත්තෙමු. එහිලා අපගේ අත්දැකීම වන්නේ මෙවැනි අවස්ථාවලට එරෙහි ප්‍රතික‍්‍රියා දැක්වීම යනු අත්අඩංගුවට ගෙන දඩුවම් පැමිණවීම නොව ‘ව්‍යාජ පුවත් හා වැරදි තොරතුරුවලට’ එරෙහිව නිරවද්‍ය තොරතුරු හා සත්‍ය හැකි තාක් ජනතාවට බෙදාහැරීම බවයි. එමගින් ජනතාවගේ තොරතුරු දැනගැනීමේ අයිතිවාසිකමද ආරක්ෂා වේ. එසේම මෙවැනි නිවේදනයක ඉලක්කය සමාජ ජාල පරිශීලිකයන් පමණක් නොවිය යුතු අතර වැඩි පේ‍්‍රක්ෂක බලපෑමක් සහිත රූපවාහිනි සහ අවශේෂ ජනමාධ්‍ය විසින් ප‍්‍රචාරය කරනු ලබන වර්ගවාදී සහ අසත්‍ය ප‍්‍රකාශ සම්බන්ධයෙන්ද කිසියම් මාර්ගෝපදේශ මාලාවක් ඔස්සේ ‘ව්‍යසන වාර්තාකරණයට’ අදාළ යහභාවිතයට මඟ පෙන්වීම යුක්තිසහගතය. පොලිස් මූලස්ථානය නිකුත් කළ නිවේදනය සිංහල භාෂාවෙන් පමණක් නිකුත්වීමද ගැටලූ සහගතය. එමගින් සෙසු ප‍්‍රජාවන්ට දුර්භාවිතාවන්ගෙන් වැළකීමට ඇති අවස්ථාව දුරලයි.
එම නිසා එවැනි කරුණුවලදී අදාළවන සියලූ නිවේදන ශ‍්‍රී ලංකාවේ සියලූ රාජ්‍ය හා නිල භාෂාවලින් නිකුත් කරන ලෙසද අපි ඉල්ලා සිටිමු. බරපතළ ව්‍යසනයකදී නිරවද්‍ය හා සත්‍ය තොරතුරු පුළුල් ලෙස බෙදාහැරීම දිරිගැන්විය යුත්තේ, එමගින් මහජනයා තුළ වර්ධනය වන දැනුවත්බව හේතුවෙන්, ව්‍යසනයට එරෙහිව කටයුතු කිරීම පහසු වන නිසාය. එබැවින් ව්‍යසනයට එරෙහිව ක‍්‍රියාකරන සියලූ පාර්ශ්ව මේ මොහොතේ තෝරාගත යුතු විකල්පය වනාහි නිරවද්‍ය හා විශ්වාසදායී තොරතුරු ජනගත කිරීමයි. මන්ද යත් දඩුවම් පැමිණවීම මින් නිරවද්‍ය තොරතුරු සම්පාදනය කරන පිරිසද අකර්මණ්‍ය විය හැකි නිසාය. එසේම රාජ්‍ය නිලධාරීන්ගේ මෙහෙවර අගය කරන අතර ඔවුන් වැරදි සිදුකරන්නේ නම් ඒවා පිළිබඳ සාධාරණ විවේචනයක් කිරීමේ අයිතිය තිබෙන බවද අපි අවධාරණය කරමු.’
Now became a military ruler
I agree with you