No menu items!
27.4 C
Sri Lanka
29 March,2024

පසිඳුගේ ජීවිතය යටකළ ටයරයට පණ දුන්නේ කවුද?

Must read

පසුගිය මාර්තු 5 වෙනිදා පමණ වන විට 2019 දෙසැම්බරයේ ජයවර්ධන පුර සරසවියට ඇතුල්වූ කළමනාකරණ පීඨයේ සිසුන්ගේ ‘නවක වද මාස ත‍්‍රිත්වය’ නිමවී තිබුණි. නවක වද කාලය නිමවූ පසුව ඒ ඒ පීඨවල අලූත් ශිෂ්‍යයන් ජ්‍යෙෂ්ඨ උත්තමයන්ට සාදයක් පැවැත්වීම සම්ප‍්‍රදාය බව දැන ගන්නට ඇත. ඒ අනුව පසුගිය මාර්තු 5 වෙනිදා රාත‍්‍රියේ ශ‍්‍රී ජයවර්ධනපුර සරසවි ක‍්‍රීඩාංගණයේ සාදයක් සංවිධානය වී ඇත. එම සාදය සංවිධානය කරන්නේ එම සරසවියේ කළමනාකරණ පීඨයට අලූතින් ඇතුළත්වූ සිසුන් ය. එදින රාත‍්‍රියේ ඇරඹි සාදය පසුදා පහන් වන තුරු පැවැත්වී ඇත. ඒ අනුව මාර්තු 6දා උදෑසන එකයි තිහට පමණ අප මේ කතාකරන්නට යන සිදුවීම වී ඇත.

මොකද්ද මේ සිද්ධිය

‘මේක හදිසි අනතුරක්. ඒ ටයරය ඇවිත්, සහෝදරයාගේ ඇෙඟ් හැප්පිලා තියෙනවා. මේක ඒ සහෝදරයාගේ නොසැලකිල්ල හෝ අනෙක් සහෝදරවරුන්ගේ නොසැලකිල්ල හෝ වෙන්න පුළුවන්‘

මේ පසුගිය මාර්තු 09 වැනිදා මාධ්‍ය හමුවක හිඳගන්නා ජයවර්ධනපුර සරසවියේ මහා ශිෂ්‍ය සංගමයේ සභාපති රුවන් දිසානායක සිදුවීම විස්තර කරන ආකාරයයි. ඔහුගේ කතාවට අනුව නම් මෙම ටයරය පෙරළී පැමිණ ඇත්තේ එම ටයරයේම උවමනාවකටය.

එම කරුණ පසෙක ලා සිද්ධියට යමු. ඉහත සඳහන් කළ සාදයට ජයවර්ධනපුර සරසවියේ කළමනාකරණ පීඨයට උඩුගම්පොළ ශාන්ත පීතර විද්‍යාලයෙන් තේරී පත්වූ නවක ශිෂ්‍ය පසිඳු හිරුෂාන් ද සහභාගිවී සිට ඇත. එම සාදය අතරතුර උදෑසන 1.30ට පමණ සාදයට එක්වී සිටි ජ්‍යෙෂ්ඨ සිසුන් පිරිසක් බීමට වතුර රැුගෙන එන්නයැයි පසිඳුට පවසා ඇත. එම ජ්‍යෙෂ්ඨයන් සිට ඇත්තේ ක‍්‍රීඩාගාරයේ ඉහළ පෙදෙසකය. ඔහු ජ්‍යෙෂ්ඨයන්ට වතුර ලබාදී නැවත තම කණ්ඩායම විනෝදවූ ක‍්‍රීඩාගාරයේ පහළ අන්තයට පඩිපෙළ බසිමින් සිට ඇත. ඉහළ සිටි ජ්‍යෙෂ්ඨයන් පහළට විශාල ටයරයක් පෙරළා ඇති අතර එම ටයරයේ හැපෙන පසිඳු පඩිපෙළ මත ඇද වැටී ඇත. එම ඇද වැටීමත් සමග ඔහුගේ හිස පිටුපස කොටසට බරපතළ තුවාල සිදුවී ඇත. මේ, එම අනතුර පිළිබඳව ජයවර්ධනපුර විශ්වවිද්‍යාලයෙන් ඇසෙන එක කතාවක් ය. තවත් කතාවකට අනුව මෙම ශිෂ්‍යයා ජලය පානය කරන්නට වතුර කරාමයක් ළඟට ගොස් ඇත. එලෙස ගොස් නැවත මිතුරන් සිටි ස්ථානය වෙත පැමිණෙන විට ක‍්‍රීඩාගාරයේ ඉහළ පඩිපෙළ මත සිට පහළට පෙරළී පැමිණි ටයරයේ වැදී ඔහු බිම වැටී ඇත.

ඔහු ජලය පානය කරන්නට යන්නට ප‍්‍රථම මිතුරා අමතා නවාතැනට යන්නට සූදානම්වී ඇති බවත් එයට ජ්‍යෙෂ්ඨ සිසුන් විරුද්ධවී ඇති බවත් ඒ විරෝධතාව නොතකා ඔහු එම ස්ථානයෙන් ඉවත්වන්නට හදන විට ක‍්‍රීඩාගාරයේ ඉහළ ප‍්‍රදේශයක රැුඳී සිටි ජ්‍යෙෂ්ඨයන් පිරිසක් මෙම සිසුවා දෙසට ටයරයක් පෙරළා ඇති බවත් තවත් කතාවක් ය. මේ කතා සියල්ලන්ගෙන්ම හෙළිවන සත්‍යය නම් ටයරයක් පෙරළී ඇවිත් පසිඳුගේ ජීවිතය අඩපණ කර ඇති බවය. මේ ටයරය පහළට තල්ලූ කළ උසස් සිසුවා කවුද? ජයවර්ධනපුර සරසවියේ මහා ශිෂ්‍ය සංගමයද ඒ පිළිබඳව නිහඬය.

ජ්‍යෙෂ්ඨ ශිෂ්‍යයන්ගේ මෙම ටයර් පැදීම නිසා බිම වැටෙන පසිඳුගේ මොළයේ පසුපස කොටසට බරපතළ තුවාල සිදුවී අභ්‍යන්තර රුධිර වහනයක් ද සිදුවී ඇත. ඒ අනුව ඔහු මුලින්ම කළුබෝවිල ශික්ෂණ රෝහලට ඇතුළත් කරන අතර පසුව කොළඹ ජාතික රෝහලේ හදිසි අනතුරු අංශයේ ස්නායු ඒකකය වෙත ඇතුළත් කර ඇත. ඉන්පසුව මෙම සිසුවා පැය හතක පමණ කාලයක් ස්නායු ශල්‍යකර්මයකට භාජනය කර ඇත. මෙම ශල්‍යකර්මයට පසුව ඔහුගේ ජීවිතය දැන් ඉදිරියට පෙරෙළෙමින් තිබෙන්නේ යන්ත‍්‍රයක ආධාරයෙන් ය.

හරිම අමාරුවෙන් ඉගෙනගත්ත මගේ පුතා

‘පසිඳු කියන්නේ මගේ බාල දරුවා. මට දරුවෝ තුන් දෙනෙක් ඉන්නවා. මේ දරුවාගේ අම්මා නැතිවෙලා හත්දවසේ දානේ එහෙම දීලා ඒ එක්කම තමයි මේ දරුවා උසස් පෙළට වාඩිවුණේ. ඒත් මගේ දරුවා ඒ තුනක් ගත්තා. මම බොහොම අමාරුවෙන් තමයි මේ දරුවෝ තුන්දෙනා උස්මහත් කළේ. දැන් දරුවාගේ ජීවිතය රැුඳිලා තියෙන්නේ මැෂින් එකක. ඒක ගැලෙව්වොත් සමහර වෙලාවට දරුවා නැතිවෙන්නත් පුළුවන්. මේ දරුවා යටකරගෙන ගිය ටයර් එක පෙරළුවේ කවුද කියලා හොයාගෙන ආයි මෙවැනි දේවල් නොවෙන්න දඬුවමක් දෙන්න  ඕනෑ. දරුවෝ අමාරුවෙන් ඉගෙනගෙන විශ්වවිද්‍යාලයට ආවාට පස්සේ මෙහෙම දේවල් නම් වෙන්නේ, අපි මොනාද කරන්නේ? දැන් මටත් තියෙන්නේ මැරෙන්න…‘ පසිඳුගේ පියා පසිඳු දැන් සිටින තත්ත්වය ගැන මාධ්‍ය වෙත කරුණු දක්වන්නේ එලෙසය. මෙය නවක වද සිදුවීමක්ද? මේ පිළිබඳව විශාල කතාබහක් නැවතත් මෙම සිදුවීම සමග කරළියට පැමිණ ඇත.

ශිෂ්‍ය මර්දනය නම් මැක්කා

‘මේ සිදුවීම වෙනකොට නවක වද කාලසීමාව ඉවරයි. අපි හිතන්නේ මේක හදිසි අනතුරක් කියලා. මේ සාදය පිළිබඳව විශ්වවිද්‍යාල පරිපාලනය දැනුවත්ව ඉඳලා තියෙනවා. කොහොම වුණත් මේ පිළිබඳව විශ්වවිද්‍යාල පරිපාලනය විදියට අපි පරීක්ෂණයක් කරනවා. අනෙක් පැත්තෙන් මිරිහාන පොලීසිය කරන විශේෂ පරීක්ෂණයට අපි අපේ පූර්ණ සහාය ලබාදෙනවා‘.

මෙලෙස කරුණු දක්වන්නේ ශ‍්‍රී ජයවර්ධනපුර විශ්වවිද්‍යාලයේ උපකුලපතිවරයා වන මහාචාර්ය සුදත්ත ලියනගේ මහතා ය. ඔහු මෙම ප‍්‍රකාශය හරහා තම විශ්වවිද්‍යාලය තුළ තවමත් නවක වදය තිබෙන බවට ඉඟි සපයයි. අනෙක් පැත්තෙන් ඔහු මෙම සාදය පිළිබඳව දැනුවත්ව සිටියා නම් මෙම ටයරය පෙරළීම සහ එයින් ශිෂ්‍යයෙකු බරපතළ ලෙස අනතුරට ලක්වීම පිළිබඳව ඔහුටද යම් වගකීමක් පැවරේ. මෙම සිදුවීම සමග අන්තර් විශ්වවිද්‍යාල ශිෂ්‍ය බල මණ්ඩලයට නැවත වටයකින් විශාල සමාජ අපවාදයකට මුහුණ දෙන්නට සිදුවිය.

එම සමාජ අපවාදයෙන් ගැලවීම සඳහා මාර්තු 9 වැනි දින ඔවුන් මාධ්‍ය හමුවක් පැවැත්වූ අතර එහිදී ඔවුන්ගේ අරමුණ වූවේ මෙම සිදුවීම හුදෙක් හදිසි අනතුරක් පමණක් බව සමාජයට කීමය. එහෙත් මෙම මාධ්‍ය හමුව නිමාවුණේ නැවත වතාවක් ශිෂ්‍ය සංගමය නවක වදයට විරුද්ධ ජනතා මතය හරහා පැමිණෙන සමාජ අපවාදයේ කරවටක් ගිලීමෙන් අනතුරුවය.‘කවුරුත් මේ සිද්ධිය අනුමත කරන්නේ නෑ. විශ්වවිද්‍යාල පාලනාධිකාරිය හෝ කවුරුත් මේක නවක වදය නිසා වුණ දෙයක් කියලා කියන්නේ නෑ. ශිෂ්‍යයෝ, ශිෂ්‍ය සංගම් මර්දනය කරන්න බලාගෙන ඉන්න ආණ්ඩුව තමයි මේක කියන්නේ. විශ්වවිද්‍යාල පරිපාලනයේ ඉන්නෙත් නිදහස් අධ්‍යාපනයෙන් ඉගෙනගත්ත අය. ඔවුන් දන්නවා මේ උපසංස්කෘතිය ගැන. මේ හදන්නේ ශිෂ්‍යයෝ මර්දනය කරලා නිදහස් අධ්‍යාපනය විකුණන්න.’ අන්තර් විශ්වවිද්‍යාල ශිෂ්‍ය බලමණ්ඩලයේ වැඩ බලන කැඳවුම්කරු උදාර සඳරුවන් ශිෂ්‍ය මර්දනය නම් ‘මැක්කා න්‍යාය‘ සංවාදය මතට රැුගෙන විත් මේ සිද්ධිය නවක වදයේ ප‍්‍රතිඵලයක් නොවන බව කියන්නට මෙලෙස සෑහෙන්න වෙහෙසක් ගත්තේ ය. එහෙත් ඔහුගේ කතාවේ අභ්‍යන්තර හරය කීවේ නවක වදය නම් සංසිද්ධියක් තවමත් ලංකාවේ විශ්වවිද්‍යාල තුළ ක‍්‍රියාත්මකව පවතින බවය. ශිෂ්‍ය දේශපාලනය සඳහා නවක වදය අවැසි බවය.

මෙම මාධ්‍ය හමුවේදී කැලණිය සරසවියේ සීසීටීවී ගැලවීම පිළිබඳව ද මාධ්‍යවේදීහු දිගින් දිගටම ප‍්‍රශ්න කළෝය.

‘දැන් අපි දන්නවා පාස්කු ප‍්‍රහාරය එල්ල කිරීම පිළිබඳව සීසීටිවී දර්ශන  ඕනෑ තරම් තිබෙනවා. ඒ එම ස්ථානවල සීසීටීවී සවිකරලා තිබුණ නිසා. එහෙම හයිකරලා තිබුණට ඒ සීසීටීවීවලට පුළුවන් වුණාද මේ ප‍්‍රහාරය වළක්වා ගන්න. බැරිවුණානේ. ඒ වගේම මෙම ස්ථානයේ සීසීටීවී තිබුණා කියමු. ඒත් මේ ටයර් එක පෙරළෙන එක නතර කරන්න පුළුවන්ද? එනිසා අපි පැහැදිලිව කියන්නේ මේ සීසීටීවී සවිකරන්නේ ශිෂ්‍යයෝ මර්දනය කරන්න‘ තම සංගමයේ සීසීටීවී විරෝධය මෙලෙස මරිමෝඩ ලෙස මාධ්‍යට කියන්නට තරම් මෙම ශිෂ්‍ය නායකයන් පහළට වැටී ඇත්ද? මෙම ප‍්‍රකාශය කොතරම් ලදබොළඳ ප‍්‍රකාශයක් ද? මෙවැනි ප‍්‍රකාශවලට සිනහ වෙනවා ඇරෙන්න වෙන කියන්නට දෙයක් නැත. නවීන ලෝකයේ සීසීටීවී තිබෙන්නේ ඇයි? මේ තරුණ ජීවිතවලට මේවා පිළිබඳව ටියුෂන් දිය යුතුය.

මෙම සිදුවීමත් සමග අන්තරය දෙසට පැමිණි විරෝධය සමනය කරන්නට අන්තරයට දේශපාලන ගුරුහරුකම් දෙන එම ශිෂ්‍ය ව්‍යාපාරය තම පටු දේශපාලන අරමුණු වෙනුවෙන් භාවිත කරන, පෙරටුගාමි සමාජවාදී පක්ෂයද මාධ්‍ය සාකච්ඡාවක් තබා මාධ්‍යට කරුණු කීවේය. එම මාධ්‍ය හමුවට හිඳගත් හිටපු අන්තරයේ කැඳවුම්කරුවෙකු  වන දුමින්ද නාගමුව මහතා ශිෂ්‍යයන් අමතා ප‍්‍රකාශ කළේ ශිෂ්‍යයන් මීට වඩා වගකීම් සහගතව කටයුතු කළ යුතු බවය. මෙවැනි සිදුවීම් නිසා සමස්ත ශිෂ්‍ය ප‍්‍රජාවම අපකීර්තියට පත්වෙන බවය.

කවුරු මෙලෙස කෙසේ නවක වදය ආරක්ෂා කරගන්නට මාධ්‍ය සාකච්ඡුා පැවැත්තුවත් මෙම සිද්ධිය මත එහි අඳුරු සෙවණැල්ල වැටීම වළකනු බැරිය. අනාගත බලාපොරොත්තු රැසක් පොදිබැඳගෙන විශ්වවිද්‍යාලය තුළට ඇතුල්වූ පසිඳු දැන් සිටින්නේ, මැෂින් එකකට යාව ජීවිතයත් මරණයත් අතර සටනකය. මෙය අත්වැරැදීමකින් වූ දෙයක් කියමු. එහෙත් මෙහෙම අත්වැරදි සිදුවන්නට පුළුවන්ද? සාදයේදී හොඳටම බී වෙරිවී සිටියත් මෙවැනි දෙයක් සිදුවීම අනුමත කළ හැකිද?

1975 වර්ෂයේ පේරාදෙණිය කෘෂිවිද්‍යා පීඨයේ රූපා රත්නශීලී නවක වධය ඉවසාගත නොහැකිව රාමනාදන් ශාලාවේ දෙවෙනි මහලෙන් පහළට පැනීමේ සිට මේ දක්වා නවක වධය නිසා කොතරම් තරුණ ජීවිත සංඛ්‍යාවක් රටට අහිමිවී තිබෙයිද? මෙනිසා කතා සාද නවතා අපි මේ පිළිබඳව නැවත නැවතත් කල්පනා කළ යුතුය. ජයවර්ධනපුර සරසවියේ මෙම සිදුවීමට අදාළව මේ වනවිට ශිෂ්‍යන් පස්දෙනෙකු අත්අඩංගුවට ගෙන රක්ෂිත බන්ධනාගාරගත කර ඇත. එම පස්දෙනා අතර මෙම ටයරය පහළට තල්ලූකළ පුද්ගලයාද සිටින බව දැනගන්නට ලැබේ.x

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි