No menu items!
27.5 C
Sri Lanka
29 March,2024

හදවත ලකුණ තවම පිළිගෙන නෑ

Must read

සජිත් පේ‍්‍රමදාස මහතාගේ නායකත්වයෙන් මැතිවරණ දෙපාර්තමේන්තුවේ ලියාපදිංචි කර ඇති සමගි ජන බලවේගය නම් නව පක්ෂයේ ලකුණ ලෙස මාධ්‍යවලින් ප‍්‍රසිද්ධ කර ඇති හදවත ලකුණ මැතිවරණ කොමිෂන් සභාව තවම පිළිගෙන නැතැයි මැතිවරණ කොමිෂන් සභාවේ නිලධාරියෙක් පැවසීය.

සමගි ජන බලවේගය පිළිගනිමින් ප‍්‍රකාශයට පත්කර ඇති ගැසට් නිවේදනයේද හදවත ලකුණ නොමැති බව ඔහු කීය.

එම පක්ෂය යෝජනා කර ඇති හදවත ලකුණ පිළිගන්නවාද නැද්ද යන්න ඉදිරියේදී තීරණය කරන බව ඔහු පැවසූ අතර මැතිවරණ ලකුණක් පිළිගන්නවාද නැද්ද යන්න තීරණය කිරීමේ බලය මැතිවරණ කොමිසමට තිබෙන බව සිහිපත් කළේය. මැතිවරණයකට ඉදිරිපත් වීමට එම ලකුණ පාවිච්චි කළ හැක්කේ මැතිවරණ කොමිෂන් සභාව එය පිළිගෙන ගැසට් මගින් ප‍්‍රකාශයට පත්කළහොත් පමණක් බවද ඔහු කීය.

සමගි ජන බලවේගය ලෙස නාමය වෙනස් කර ඇත්තේ මීට පෙර පැවති අපේ ජාතික පෙරමුණ නම් පක්ෂය වන අතර අපේ ජාතික පෙරමුණේ ලකුණ ලෙස පැවතුණේ ¥රකථනයයි.

මේ අතර එක්සත් ජාතික පක්ෂය ඉංග‍්‍රීසියෙන් හඳුන්වන කෙටි නාමය වන යූ.එන්.පී. යන අකුරු තුන සජිත් පේ‍්‍රමදාස මහතාගේ නායකත්වයෙන් අලූතින් ලියාපදිංචි කර ඇති පක්ෂයේ ඉංග‍්‍රීසි නම කෙටියෙන් සඳහන් කිරීමේදීද යෙදෙන බව සඳහන් කරමින් එම පක්ෂය පිළිනොගන්නා ලෙස එක්සත් ජාතික පක්ෂයේ නීති උපදේශක ජනාධිපති නීතිඥ නිශ්ශංක නානායක්කාර කර ඇති පැමිණිල්ල ප‍්‍රතික්ෂේප කිරීමට බලාපොරොත්තු වන බව එම නිලධාරියා කීය.

සජිත් පේ‍්‍රමදාස මහතාගේ පක්ෂයේ නාමය සමගි ජාතික බලවේගය ලෙස එම පැමිණිල්ලේ වැරදියට සඳහන් කර ඇති බවත් එම පක්ෂයේ නිවැරදි නාමය සමගි ජන බලවේගය බවත් එම නිලධාරියා කීය.

සමගි ජාතික බලවේගය යනුවෙන් එම පැමිණිල්ලෙහි සඳහන්ව ඇති නාමය ඉංග‍්‍රීසියට පරිවර්තනය කිරීමේදී යුනයිටඞ් නැෂනල් පවර් හෙවත් යූ.එන්.පී. ලෙස යෙදුණද, ලියාපදිංචි කර ඇති පක්ෂ නාමය ඉංග‍්‍රීසියට පරිවර්තනය කිරීමේදී යුනයිටඞ් පීපල්ස් පවර් හෙවත් යූ.පී.පී. ලෙස යෙදෙන බව එම නිලධාරියා කීය.

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි