ජනාධිපතිවරයාගේ ධුර කාලය 19 වැනි සංශෝධනය සම්මත වූ දිනය වන 2015 මැයි 15 වැනිදායින් ආරම්භ වන්නේයැයි තර්ක කිරීමට ව්‍යවස්ථා අර්ථ නිරූපණ නීතිය අනුව කිසිදු පදනමක් නැතැයි පාර්ලිමේන්තු මන්ත‍්‍රී ආචාර්ය ජයම්පති වික‍්‍රමරත්න පෙන්වාදෙයි.
තම ධුර කාලය ආරම්භ ආරම්භ වන්නේ 2015 ජනවාරි 09 වැනිදායින්ද, 19 වැනි සංශෝධනය සම්මත වූ 2015 මැයි 15 වැනිදායින්ද යන්න පිළිබඳව ජනාධිපතිවරයා ශ්‍රේෂ්ඨාධිකරණයේ මතය විමසීමට බලාපොරොත්තු වන බව පසුගිය සතියේ පුවත් වාර්තා කර තිබුණි. ඊට අමතරව දයාසිරි ජයසේකර ඇතුළු ජනාධිපතිවරයාට හිතවත් පිරිසක් ඒ පිළිබඳව තර්ක කර තිබුණු නමුත්, ප‍්‍රවීණ නීතිඥවරුන් කිසිවෙකු එම තර්කය ඉදිරිපත් කර තිබුණේ නැත. ආචාර්ය වික‍්‍රමරත්න ඉහත අදහස් දැක්වීම කළේ එම තර්කය පිළිබඳව අප කළ විමසීමකදීය.
ජනාධිපතිවරයාගේ ධුර කාලය වසර 5ක් බව මීට පෙර ශ්‍රේෂ්ඨාධිකරණය දැනුම්දී ඇති බවත්, ඒ පිළිබඳව දැනුම්දුන් ශේෂ්ඨාධිකරණ තීන්දුවෙහිද ජනාධිපතිවරයාගේ ධුර කාලය ආරම්භ වන දිනය 2015 ජනවාරි 09 වැනිදා යන්න සඳහන්ව තිබෙන බවත් ඔහු කීය. ව්‍යවස්ථාවේ අන්තර්කාලීන විධිවිධානවලට අනුව දැනට බලයේ සිටින ජනාධිපතිවරයා 19 වැනි සංශෝධනයෙන් සංශෝධිත ව්‍යවස්ථාව යටතේ ධුරය දැරිය යුතු බව පැහැදිලිිව සඳහන් කර ඇති බව ඔහු කීය. ජනාධිපතිවරයාට අලූතෙන් ධුර කාලයක් ලැබෙන බව එහි සඳහන් නොවන බවද ඔහු පෙන්වාදුන්නේය.
අන්තර්කාලීන විධිවිධානවල 49 (1* (ආ* හි මෙසේ සඳහන් වෙයි. ‘2015 අපේ‍්‍රල් මස 22 වන දිනට පෙර පිළිවෙළින් ජනාධිපති ධුරය සහ අග‍්‍රාමාත්‍ය ධුරය දරන තැනැත්තන් එම දිනෙන් පසු, මෙම පනත මගින් සංශෝධිත ආණ්ඩුක‍්‍රම ව්‍යවස්ථාවේ විධිවිධානවලට යටත්ව එම ධුර දැරිය යුතු වන්නේය.’x
