ඉදිරි පළාත් සභා මැතිවරණය පවත්වනවාද නැද්ද යන තීන්දුව ගැනීම මේ වනවිට ජනාධිපතිවරයාගේ අතේ පවතින බව ජනාධිපතිවරයාට අවසාන ලිඛිත දැනුම්දීමක් කිරීමට මැතිවරණ කොමිෂන් සභාව බලාපොරොත්තු වන බව එම කොමිසමේ ආරංචිමාර්ග කියයි.
ජනාධිපතිවරයා පළාත් සභා මැතිවරණය පැවැත්වීමට තීන්දු නොකොට මීළඟ ජනාධිපතිවරණය මුලින් පවත්වන තත්වයක් උදාවුවහොත්, ජනාධිපතිවරයා සිය වගකීම ඉටු නොකළ බව පෙන්වාදෙමින් මැතිවරණ කොමිසමේ සාමාජිකයන් ඉල්ලා අස්වීමේ ඉඩක් ඇති බව එම කොමිසමේ ආරංචිමාර්ග පවසයි.
පළාත් සභා මැතිවරණය පැවැත්වීමට නොහැකි වුණොත් දැඩි තීන්දුවක් ගැනීමේ අදහසක මැතිවරණ කොමිසමේ සාමාජිකයන් සිටින බව මීට පෙරද ඔවුන් ප‍්‍රකාශ කර ඇත. මැතිවරණ කොමිසමේ ආරංචි මාර්ග කියන්නේ බොහෝවිට එම දැඩි තීන්දුව කොමිසමේ සාමාජිකයන් ඉල්ලා අස්වීම වනු ඇති බවයි.
මැතිවරණ කොමිසම පෙන්වාදීමට බලාපොරොත්තු වන එක් කරුණක් වන්නේ අධිකරණයෙන් ව්‍යවස්ථාමය කරුණු නිරාකරණය කරගැනීමේ හැකියාවක් ජනාධිපතිවරයාට ඇති බවත්, එම බලය පාවිච්චි කොට පළාත් සභා මැතිවරණ ක‍්‍රමය පිළිබඳ නීතිමය ගැටලූව නිරාකරණය කරගැනීම ජනාධිපතිවරයා සතු වගකීමක් බවත්ය. පළාත් සභා මැතිවරණ පැවැත්වීම සඳහා 2017 දී සම්මත කරගත් නව මැතිවරණ ක‍්‍රමයට අදාලව සීමා නිර්ණය වාර්තාවක් නොමැති බැවිනුත්, එම පනතෙහි කොන්දේසි අසම්පූර්ණ වී ඇති බැවිනුත් එම පනත අවලංගු ලෙස සලකා පැරණි මැතිවරණ ක‍්‍රමයට පළාත් සභා මැතිවරණය පැවැත්වීමට හැකිදැයි අධිකරණයෙන් විමසා, කඩිනමින් තීන්දුවක් ලබාගන්නා ලෙස ඒ අනුව මැතිවරණ කොමිසම ජනාධිපතිවරයාගෙන් ඉල්ලීමට බලාපොරොත්තු වෙයි.
අධිකරණයෙන් පැරණි මැතිවරණ ක‍්‍රමයට මැතිවරණය පැවැත්විය හැකි බව දැනුම් දුන්නොත් එම තීන්දුව පාවිච්චි කරමින් මැතිවරණ කොමිසමට මැතිවරණය පැවැත්විය හැකිය. එහෙත් අලූත් පනතට අනුව නව මැතිවරණ ක‍්‍රමයට පැවැත්විය යුතු බව අධිකරණය තීන්දු කළහොත් නව මැතිවරණ ක‍්‍රමයට අදාල සීමා නිර්ණය වාර්තාවක් නොමැති නිසා මැතිවරණය පැවැත්විය නොහැකිය.
ඒ දෙවැනි තත්වය ඇති වුවහොත් දැනට පවතින ගැසට් නොකළ සීමා නිර්ණය පනත ගැසට් කිරීමට ජනාධිපතිවරයා සතු බලය පාවිච්චි කොට එම සීමා නිර්ණය වාර්තාව ගැසට් කරන ලෙසත්, අඩුපාඩු තිබුණා වුව මැතිවරණ කල් දැමීමට වඩා එම ක‍්‍රමය යටතේ හෝ මැතිවරණය පැවැත්වීම යහපත් බවත් මැතිවරණ කොමිසම පෙන්වාදීමට බලාපොරොත්තු වෙයි.
මේ පිළිබඳව කළ විමසීමකදී මැතිවරණ කොමිෂන් සභාවේ සභාපති මහින්ද දේශප‍්‍රිය ප‍්‍රකාශ කළේ කෙසේ හෝ පළාත් සභා මැතිවරණය ඉක්මනින් පැවැත්වීමේ අරමුණෙන් මැතිවරණ කොමිෂන් සභාව හැකි උපරිම උත්සාහය ගනිමින් සිටින්නේයැයි තමන්ට ප‍්‍රකාශ කළ හැකි බවයි. ඒ උත්සාහයන් අසාර්ථක වුණොත් දැඩි තීන්දුවක් ගන්නා බවද ඔහු කීය. නොවැම්බර් මාසයේදී පැවැත්වීමට නියමිත ජනාධිපතිවරණයට මාසයකට පෙර හෝ පළාත් සභා මැතිවරණය පැවැත්විය හැකි බව ඔහු කීය.
