No menu items!
27.4 C
Sri Lanka
29 March,2024

සාලිගේ රථගාලේ නීති විරෝධි වාහනයක්

Must read

බස්නාහිර පළාත් ආණ්ඩුකාර ආසාත් සාලිට අයත් යැයි කියන කොළඹ පිහිටි මහල් නිවාසයක තිබී නීති විරෝධී සුඛෝපභෝගි මෝටර් රථයක් වළාන දූෂණ මර්දන ඒකකය අත්අඩංගුවට ගෙන තිබේ.

අත්අඩංගුවට ගැනීමෙන් පසු එම මෝටර් රථය වැඩිදුර පරීක්ෂණ සඳහා ශ්‍රී ලංකා රේගුවට බාරදී ඇතත් රේගුව ඒ පිළිබඳ කිසිදු පරීක්ෂණයක් සිදුකර නැතැයි වාර්තාවේ.

මෙම මෝටර් රථය අත්අඩංගුවට ගැනීම සඳහා එහි හිමිකරු වශයෙන් නම් සඳහන් පුද්ගලයා දිගන සිට කොළඹ බලා රැගෙන එන අවස්ථාවේ බස්නාහිර පළාත් ආණ්ඩුකාරවරයා පොලීසියට බලපෑම් කර ඇතැයි වළාන දූෂණ මර්දන ඒකකයේ ආරංචි මාර්ග වැඩිදුරටත් ප්‍රකාශ කරයි.

එල්.එස්. 62 අංකයෙන් යුතු බි්‍රතාන්‍යයේ ලියාපදිංචි එම කාරය අත්අඩංගුවට ගෙන ඇත්තේ කොළඹ මල් පාරේ ෆ්ලවර් කෝට් නිවාස සංකීර්ණයේදීය.

විදේශයක වෙසෙන අයෙකුට ශ්‍රී ලංකාවට පැමිණීමේදී කෙටි කාලයකට භාවිත කර නැවත ගෙන යෑම සඳහා තීරු බදු රහිතව ලබා දෙන පහසුකම යටතේ (කාර්නෙට්)  මෙම මෝටර් රථය මෙරටට ගෙනැවිත් ඇත. එම කාලය පසුගිය වසරේ ජනවාරි මාසයෙන් අවසන් වී ඇත. එහෙත් එම මෝටර් රථය රටින් පිට නොකර සඟවා තබා ගෙන තිබී ඇත. මෝටර් රථය ශ්‍රී ලංකාවට රැගෙන ආ පුද්ගලයා වශයෙන් සඳහන් වන්නේ ෆාරුක් නිල්ෆර් නම් තැනැත්තෙක්ය.

ශ්‍රී ලංකා රේගුවේ මධ්‍යම විමර්ශන ඒකකය මෙම මෝටර් රථය සම්බන්ධයෙන් මීට පෙර විමර්ශන ලිපිගොනුවක් විවෘත කර තිබී ඇතත් දේශපාලන බලපෑම නිසා එහි විමර්ශන සිදුවී නැත.

මේ සම්බන්ධයෙන් බස්නාහිර පළාත් ආණ්ඩුකාර අසාත් සාලිගෙන් කරන ලද විමසිමේදී ඔහු පැවසූවේ, එම නිවස තමාගේ නිවසක් නොවන බවත් තමාට ඒ සමඟ සම්බන්ධයක් නොමැති බවත්ය. එහෙත් වළාන දූෂණ මර්දන ඒකකයේ නිලධාරීන් කළ ප්‍රශ්න කිරීම්වලදී නිවාස සංකීර්ණයේ ආරක්ෂක නිලධාරීන් ප්‍රකාශ කර ඇත්තේ එම කාරය ගාල්කර ඇත්තේ අසාත් සාලි මහතාට අයත් රථ ගාලේ බවය. ■

ඉඳුවර බන්ඩාර/ රේඛා නිලුක්ෂි හේරත්

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි