No menu items!
27.5 C
Sri Lanka
29 March,2024

ජනපති කුමන්ත්‍රණය ගැන නීතිඥ හඬ

Must read

 

 

ජනපති සිරිසේනගේ ක්‍රියාකලාපය නිසා රට තුළ දැන් පවතින තත්ත්වය සම්බන්ධයෙන් ප්‍රජාතන්ත්‍රවාදය සඳහා නීතිඥයෝ සංවිධානය විසින් කොළඹ 7, විද්වත් වෘත්තිකයන්ගේ සංගමයේ ශ්‍රවණාගාරයේ දී පැවත්වූ මාධ්‍ය හමුවේදී දැක්වූ අදහස් අප මෙලෙස පළකරමු.

ජනමාධ්‍ය තුළ දකින්නේ එක පාර්ශ්වයක තොරතුරු පමණයි
ජනාධිපති නීතිඥ ජේසී වැලිඅමුණ කැඳවුම්කරු, ප්‍රජාතන්ත්‍රවාදය සඳහා නීතිඥයෝ

අපි දැක්කා පසුගිය සති කීපය පුරාම මෙම අර්බුදය සම්බන්ධයෙන් එක්තරා පිරිසක් නීති විරෝධි මතිමතාන්තර සමාජගත කරන ආකාරය. ඔවුන් මේ නීතිවිරෝධී ආණ්ඩුවේ වරප්‍රසාද ලබන අය. තවත් පිරිසක් එවැනි දේ බලාපොරොත්තු වන අය. අපි දැක්කා හිටපු අගවිනිසුරුවරයෙක් මේ ව්‍යවස්ථා විරෝධී ක්‍රියාමාර්ග ව්‍යවස්ථාවට පටහැනි නෑ කියලා මත පළකරන ආකාරය. එවැනි අය වරප්‍රසාද ලබා ගැනීමේ අරමුණෙන් ඉදිරිපත් කරන තර්ක නිවැරදියි කියලා ඒ දිහා බලාගන ඉන්න ජනතාවට හිතෙන්න පුළුවන්. ඒ නිසා අපට යුතුකමක් තියෙනවා මේ අර්බුදයේදී රටට ජනජීවිතයට සිදුවන අනර්ථය සම්බන්ධයෙන් රටට කියන්න.

මේ අර්බුදය විග්‍රහ කිරීම ආරම්භ කළ යුත්තේ ආණ්ඩුක්‍රම ව්‍යවස්ථාවට පටහැනිව අග්‍රාමාත්‍ය රනිල් වික්‍රමසිංහ ඉවත්කර ව්‍යවස්ථාවට පටහැනිව මහින්ද රාජපක්ෂ අග්‍රාමාත්‍යවරයා වශයෙන් පත්කිරීම කියන ස්ථානයෙන්. ඒ වගේම අපි දැකලා තියෙනවා ලෝකය පුරාම ආණ්ඩුක්‍රම ව්‍යවස්ථා විරෝධී ක්‍රම අනුගමනය කළ අවස්ථා. විශේෂයෙන් මෙවැනි තීරණ ගත්තු රටවල් ඒ තීරණ වැරදි බව දැනදැනම කෙටිකාලීන වාසි සඳහා වැරදි දේ සමාජගත කරනවා. මෙවැනි පාලකයන්ගේ අත්තනෝමතික තීරණ ජනතාව විසින් අවසන් කරන්නේ මහ පාරේ. එවැනි අවස්ථා ඛේදජනක සිදුවීම්වලින් ලේ වැගිරීම්වලින් අවසන් වෙන්න පුළුවන්. අද අපේ රටත් ගෙනත් තියෙන්නෙත් එවැනි අවස්ථාවකට. මේ තත්ත්වය සම්බන්ධයෙන් දේශපාලකයන් නොයෙක් කතා කියන්න පුළුවන්. දේශපාලන මතය මොකක් වුණත් මෙවැනි ව්‍යවස්ථා විරෝධී ක්‍රියාමාර්ගවලින් පසුව ආණ්ඩුව විසුරුවා හැරීම නීති විරෝධීයි. එය ව්‍යස්ථාව අනුවත් පාර්ලිමේන්තු සම්ප්‍රදායන් අනුවත් බලන්න ඕනෑ. විශේෂයෙන් කථානායකවරයාට ගරු කිරීමකින් තොරව පාර්ලිමෙන්තුවට කටයුතු කරන්න බෑ. ඔහුට අභියෝග කරන්න නම් ඒ සඳහාත් සම්ප්‍රදායක් තියෙනවා. අපි දන්නවා පාර්ලිමේන්තුව තුළ ඡන්දය විමසන ක්‍රමවේදයන් පවතිනවා. බොහෝ අවස්ථාවල හඬින් තමයි ඡන්දය ගන්නේ. යම් සුවිශේෂ අවස්ථාවල ස්ථාවර නියෝග අනුවත්, ඉන් පිටත් ඡන්දය ගන්න පාර්ලිමේන්තුව තුළ එකඟතාවක් තිබිය යුතුයි.

අද ප්‍රධාන ජනමාධ්‍යවල දක්නට ලැබෙන්නේ එක් පාර්ශ්වයක තොරතුරු පමණයි. එය ජනතාවගේ සත්‍යය දැනගැනීමට බලපානවා. සමාජ මාධ්‍යවල මිලියන 6ක පිරිසක් ඉන්නවා. ඒ නිසා ජනමතය මුළුමනින්ම වෙනස් කරන්න බැරිවුණා. ඇතැම් ප්‍රධාන මාධ්‍යවලින් බොරු කිවුවත් ජනමතය විකෘති කරන්න බැරිවෙලා තියෙනවා.
ඒ නිසා මාධ්‍යවලින් අපි ඉල්ලා සිටිනවා නිවැරදි නීතිමය කරුණු අනාවරණය කරමින් ජනතාව දැනුවත් කරන ලෙස, මේ අර්බුදය සම්බන්ධයෙන් අවසාන නඩු විභාගයේදී නිවැරදි අර්ථ නිරූපණයක් ලැබෙයි.

මේ තත්ත්වය සිවිල් යුද්ධයක් දක්වා වර්ධනය විය හැකියි
නීතිඥ ගුණරත්න වන්නිනායක

මෙරට ඡන්දදායකයන් මහින්ද රාජපක්ෂ 2015 ජනවාරි 8 ජනාධිපතිවරයෙන් පරාජය කළා. නැවත 2015 අගෝස්තු 17 ඔහුව අගමැති ධුරයෙන්ද පරාජය කළා. ඒ අනුව මහින්ද රාජපක්ෂට අගමැති ධුරය දරන්න සදාචාරාත්මක අයිතියක් නෑ. 2015ට කලින් පැවති අඳුරු යුගය අවසන් කරලා ප්‍රජාතන්ත්‍රවාදී අයිතීන් දිනාගන්න යහ පාලනය ස්ථාපිත කරන්න මෛත්‍රීපාල සිරිසේනව පොදු අපේක්ෂකයා බවට පත්කළා. ඔහු අද කොතරම් අපරාධයක්ද මේ සමාජයට මුදාහැරලා තියෙන්නේ. ඔහුට ඡන්දය දුන් හැටදෙලක්ෂයක් ජනතාවගෙන් ඔහු එක් ඡන්දදායකයෙක් ගැනවත් හිතලාද මේ තීරණය ගත්තේ. ඔහු කුමන මානසිකත්වයකින් මෙවැනි තීරණයක් ගත්තාද යන්න හිතාගන්නවත් බෑ. මෙවැනි අපරාධයක් කළේ ඇයිද යන්න අද ජනතාව දන්නේ නෑ. ලෝක ඉතිහාසයේම මෙවැනි දෙයක් සිදුව තිබේද? ප්‍රජාතන්ත්‍රවාදී අයිතීන් ඉල්ලා සිටින ජනතාවගෙන් බලය අරගෙන නැවත ප්‍රජාතන්ත්‍රවාදයේ හතුරාට ඒ බලය පවරපු නායකයෙක් හිටියේ කුමන රටේද? මෛත්‍රීපාල සිරිසේන ජනාධිපතිවරයා මේ තත්ත්වයට පත්වීම සම්බන්ධයෙන් අපි කනගාටුවෙනවා. ඔහු කුමන මානසික තත්ත්වයකින් මේ දේ කළාද යන්න හිතාගන්න බැරි බව මා කියන්නේ මේ නිසා. කෙහොම වුණත් දැන් ජනාධිපතිවරයාට මේකෙන් ගැළවෙන්න බෑ. ඔහුට වසර 50ක දේශපාලන අත්දැකීම් සහිත ඉතිහාසයක් තිබෙනවා. මේ මොහොතේ පාර්ලිමේන්තු බහුතර කැමැත්ත කාටද යන වග ඔහු දන්නවා. නීති විරෝධී අගමැති මහින්ද රාජපක්ෂට එරෙහි විශ්වාස භංගය දෙවරක් සම්මත කර පෙන්වා තිබෙනවා. දිවුරුම් ප්‍රකාශ දුන්නා. නමුත් ඒ කිසිවක් ජනාධිපතිට අදාළ නෑ. ඉන් තහවුරු වන්නේ මහින්ද රාජපක්ෂත් සමග ඔහුට කුමන්ත්‍රණික ගනුදෙනුවක් තිබෙන බවයි. මේ ප්‍රශ්නය විසඳන්න පුළුවන් මහින්ද රනිල් මෛත්‍රී ඇතුළු කණ්ඩායමටයි. දැනට පත්කරලා තියෙන නීති විරෝධී අමාත්‍ය මණ්ඩලය, ලේකම්වරු, දෙපාර්තමේන්තු ප්‍රධානීන් දෙන නියෝග ක්‍රියාත්මක කළොත් ඒ සම්බන්ධයෙන් වගඋත්තර බඳින්න වේවි. ඒ නිසා අපි ඔවුන්ගෙන් ගෞරවයෙන් ඉල්ලා සිටිනවා කල්පනාකාරීව කටයුතු කරන ලෙස. මේ අර්බුදය නීත්‍යනුකූල ක්‍රියා මාර්ග අනුගමනය කරමින් විසඳන්නේ නැතිනම් ප්‍රජාතන්ත්‍රවාදය වෙනුවෙන් පටන් ගන්න අරගලය සිවිල් යුද තත්ත්වයක් දක්වා වර්ධනය වේවි. කිසිදු සැකයක් නෑ ජනතාව ඒකාධිපති තත්ත්වයකට එරෙහිව අරගල කරාවි.

මන්ත්‍රීවරු සාමාන්‍ය නීතියට යටත්
නීතිඥ ලාල් විජේනායක සමකැඳවුම්කරු ප්‍රජාතන්ත්‍රවාදය සඳහා නීතිඥයෝ

අගමැති කියාගන්න මහින්ද රාජපක්ෂයි, ජනාධිපති මෛත්‍රීපාල සිරිසේනයි මේ දෙදෙනාගේ දේශපාලන අවශ්‍යතා සම්පූර්ණ කරගන්න සිදුකළ කුමන්ත්‍රණයකට රටම ගොදුරු වී තිබෙනවා. තමන්ට තිබෙන නඩු තමන්ගේ පවුලේ අයට තියෙන නඩු මහින්ද රාජපක්ෂට ඉවත් කරගැනීමේ බරපතළ වුවමනාවක් තිබුණා. මේ දූෂණ අපරාධ නඩුවලින් ගැළවෙන්න ඔහු මේ කුමන්ත්‍රණයට සම්බන්ධ වුණා. විධායක ජනාධිපති ධුරය අහෝසි කරනවා කියලා බලයට පත්වූ මෛත්‍රීපාල සිරිසේනට නැවත වරක් ජනාධිපති වශයෙන් පත්වෙන්න අවස්ථාවක් ගන්න ඕනෑ වුණා. මේ කුමන්ත්‍රණයේ මුල එතැනයි. එය ක්‍රියාත්මක වෙන ආකාරය අපි දැක්කා. පාර්ලිමේන්වේ මහින්ද‍ රාජපක්ෂගේ ගෝලයන් නටන නාඩගම ලෝකයම දැක්කා. ඒ වගේ හැසිරීමක් ශිෂ්ට සම්පන්න සමාජයක්, ශීලාචාර සමාජයක් අනුමත කරන්නේ නෑ.
පාර්ලිමේන්තුව ඇතුළේ අපරාධ නීතියේ හැම වරදක්ම සිදුව තිබෙනවා මිනීමැරුමක් ඇරෙන්න. පොලිස් නිලධාරියෙකුට කම්මුලට ගැහුවා. රජයේ දේපළ විනාශ කළා. බයිබලයෙන් ගැහුවා. කුරණයෙන් ගැහුවා. අවසානයේ මිරිස් කුඩුත් ගැහුවා. රජයේ දේපළ විනාශ කළ වරදට ඇපවත් දෙන්න බැහැ. මෙතරම් විශාල අපරාධ සංඛ්‍යවක් සිදුව තිබියදීත් තවම නීතිය ක්‍රියාත්මක වෙලා නෑ. මේ රටේ සාමාන්‍ය නීතිය මන්ත්‍රීවරුන්ට අදාළයි. ඔවුන්ට අපරාධ කරලා නිදහස් වෙන්න බෑ. කාට වුණත් ඒ සම්බන්ධයෙන් සාක්ෂි තිබෙනවා නම් වහාම අපරාධ නීතිය යටතේ ක්‍රියාත්මක විය යුතුයි.

දේශපාලකයන්ට නීතියට ඉහළින් ඉන්න බෑ. ඒ නිසා පාර්ලිමේන්තුවේ කළ අපරාධවලට මොවුන් අත්අඩංගුවට ගත යුතුයි. මොකද මතයක් හැදෙමින් යනවා පාර්ලිමේන්තුවේ සිදුවන දේවල්වලට නීතිය ක්‍රියාත්මක කරන්න බෑ, මන්ත්‍රීවරුන්ට නීතිය අදාළ නෑ කියලා. එහෙම දෙයක් කොහේවත් නෑ. පාර්ලිමේන්තු වරප්‍රසාද හා බලතල කියලා පනතක් තියෙනවා. ඔවුන්ට බලතල තියෙන්නේ තව මන්ත්‍රීවරයෙකුට මිරිස්කුඩු ගහන්න, කතානායකගේ මයික් කඩන්න, පොලීසියේ කනට ගහන්න නෙවෙයි. මහජන සේවය පහසු කිරීම සඳහායි. මීට නීතිය ක්‍රියාත්මක නොවෙනවා නම් ජනතාව අතර මතයක් හැදෙනවා මන්ත්‍රීවරුන්ට නීතිය අදාළ නෑ කියලා. ඒ නිසා ඒ සම්බන්ධයෙන් නීතිය ක්‍රියාත්මක කළ යුතුයි. රටක් වශයෙන් මෙවැනි අපකීර්තිමත් සිදුවීම් නැවැත්විය යුතුයි.

මේ ක්‍රියාදාමය මෙතනින් නවතින්නේ නෑ මොකද අද සමාජය හරි මැදින් දෙකට බෙදිලා ඉන්නේ. සිවිල් යුද තත්ත්වයකට අදාළ සියල්ල රට ඇතුළේ පෙළ ගැහෙනවා. ඒ නිසා අපි ජනාධිපතිවරයාගෙන් ඉල්ලා සිටින්නේ මේ තත්ත්වය වෙනස් කරන ලෙසයි. ආණ්ඩුක්‍රම ව්‍යවස්ථාවට අනුකූලව පාර්ලිම්න්තුවේ ඡන්දයක් ගත්තානම් මේ ප්‍රශ්නය විනාඩි දහයෙන් විසඳන්න පුලු‍වන් ජනාධිපතිවරයාට පාර්ලිමේන්තු බහුතරය ගැන සැකයක් තිබ්බානම් රනිල්ට කියන්න තිබුණා බහුතරය පෙන්වන්න කියලා. නමුත් කලේ මොකද්ද නීතිවිරෝධීව අගමැතිවරයෙක් පත්කරලා ඔහුට එකසිය දහතුන පෙන්වන්න කියාල‍ා පාර්ලිමේන්තුව කල් දැම්මා. කොහොමද මහින්ද එකසිය දහතුන හදන්නේ ඒක කරන්නේ අල්ලස් දීලා මන්ත්‍රීවරුන්ව තමන්ගේ පැත්තට අරගෙන

නඩුකරයක් තියෙන නිසායි ශ්‍රේෂ්ඨාධිකරණය ඒ තීරණය දුන්නේ
නීතිඥ සුනිල් වටගල

මෙම ව්‍යවස්ථා කුමන්ත්‍රණයේ ප්‍රධාන හවුල්කරුවන් වන්නේ මෛත්‍රීපාල සිරිසේන ජනාධිපතිවරයායි පාර්ලිමේන්තු මන්ත්‍රී මහින්ද රාජපක්ෂයි. එහි ප්‍රතිඵලයක් හැටියට තමයි ජනාධිපතිවරයා පාර්ලිමේන්තුව විසුරුවා හරින්නේ. ඊට අදාළ ගැසට් පත්‍රය ශ්‍රේෂ්ඨාධිකරණය හමුවේ අභියෝගයට ලක්කළාට පසුව එම විනිසුරුවරුන් ඒ තුළ නඩුකරයක් පවතින නිසා තමයි මහ මැතිවරණයක් කැඳවීම සම්බන්ධ ගැසට් පත්‍රයට අතුරු තහනම් නියෝගයක් ලබාදෙන්නේ. දැන් මෙම කුමන්ත්‍රණයට සම්බන්ධ පිරිස් ගෙනයන මතය තමයි, මේ දීලා තියෙන්නේ අවසාන තීන්දුව නෙ‍වෙයි ඒ හින්දා ප්‍රශ්නයක් නෑ කියලා. නමුත් අදාළ පෙත්සම තුළ නඩුකරයක් තිබෙන නිසා තමයි ශ්‍රේෂ්ඨාධිකරණය එවන් තීරණයක් දෙන්නේ. එම අතුරු තහනම් නියෝගය ලබාදෙන මොහොතේ හිටපු ඇහුම්කන් දුන් සියලුදෙනාට දැනුණා මෙම පෙත්සමේ තිබෙන නඩුකරයේ බර කොපමණද කියා. වසර හතරහමාරක් යනතුරු ආණ්ඩුව විසුරුවා හරින්න බෑ කියන කාරණය සැහෙන්න වාදවිවාද කෙරුණා. එතැනදී මතුවූ තර්කය තමයි, එහෙමනම් ජනාධිපතිවරයාට ඕනෑම අවස්ථාවක පාර්ලිමේන්තුව විසුරුවා හැරිය හැකිද යන්න.

දැන් ව්‍යවස්ථාවට අනුව කතානායකවරයා කියනවා දැන් පාර්ලිමේන්තුව විසුරුවා හැරලා තියෙන්නේ කියලා. එතැනින් පස්සේ කැබිනට් මණ්ඩලයක් ඇත්තේ නෑ. නමුත් ජනාධිපතිවරයා ආයතන ප්‍රධානීන් කැඳවලා කියනවා දැන් වැඩ කරන්න කියලා. දිගින් දිටම සිදුවන්නේ මෙවැනි විකාරරූපී දේශපාලන රඟපෑම්. පසුගිය දවසක ජනාධිපතිවරයා සර්ව පාක්ෂික හමුවක් කැඳවලා පක්ෂ නායකයන් සමග සාකච්ඡා කරනවා දැන් මොකද කරන්නේ කියලා. පක්ෂ නායකයන්ගෙන් මේ තත්ත්වය විමසන්න තිබුණේ පසුගිය 26දා තීරණය ගන්න පෙරයි. කුමණ්ත්‍රණය කරලා කුමන්ත්‍රණය පරාජය වෙලා ව්‍යවස්ථාව උල්ලංඝනය කරලා ඉවර වෙලා ප්‍රශ්නය රට ඇතුළේ ඔඩු දුවපු තත්ත්වයක් මතුවුණාට පස්සේ අහනවා දැන් මොකද කරන්නේ කියලා

■ ධම්මික ප්‍රියදර්ශන

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි