පසුගිය සතියේ ඝාතනය කුමන්ත‍්‍රණය මහා බොරුවක්යැයි අපි ලීවෙමු. ඒ මොහොත වෙද්දීත් ඝාතන කුමන්ත‍්‍රණයක් පිළිබඳව පරීක්ෂණ පවත්වන අපරාධ පරීක්ෂණ දෙපාර්තමේන්තුවට ප‍්‍රමාණවත් තොරතුරු ලැබී තිබුණේ නැත. නාලක සිල්වාව ප‍්‍රශ්ණ කිරීමේදී ශක්තිමත් සාක්ෂියක් ලැබී තිබුණේත් නැත. මේ සටහන ලියන මොහොත වෙද්දීත් තත්වය එසේමය. ජනාධිපති ඝාතන කුමන්ත‍්‍රණයක් පිළිබඳ තොරතුරු නැත. අඩුම තරමේ ඝාතන කුමන්ත‍්‍රණයකට රනිල් වික‍්‍රමසිංහ හා සරත් ෆොන්සේකා සම්බන්ධ බව කී නාමල් කුමාරවත් ඒ බව කියමින් සී.අයි.ඞී.යට කටඋත්තරයක් ලබා දී නැත.
එහෙත් එළියේ මාධ්‍යවලට අනුව නම් ජනාධිපතිවරයාව ඝාතනය කරන්නට සරත් ෆොන්සේකා සහ රනිල් වික‍්‍රමසිංහ සැලසුම් කරමින් සිට ඇත. ඒ කතාව දැන් සමාජයේ එදිනෙදා කතාවක් බවට පත්ව තිබේ. එතැනිනුත් එහාට ඒ කතාවට තටු ලබාදීම පිණිස සරත් ෆොන්සේකා අමාත්‍යවරයාව ඝාතන කුමන්ත‍්‍රණයට සැකපිට යැයි සඳහන් කරමින් අත්අඩංගුවට ගැනීමේ සැලසුමක්ද ක්රියාත්මක වෙමින් පවතින බව පොලීසියේ විශ්වාස කටයුතු ආරංචිමාර්ග කියන්නේය.
ජනාධිපති මෛත‍්‍රීපාල සිරිසේනව ඝාතනය කිරීමට උත්සාහ කළායැයි කියන චෝදනාව සුළුපටු චෝදනාවක් නොවේ. එය කෙළින්ම අගමැතිවරයාට සහ සරත් ෆොන්සේකා වැනි ප‍්‍රබල දේශපාලන චරිතයකට එල්ලවීම තවත් බරපතල තත්වයකි. එහෙත් ඝාතන කුමන්ත‍්‍රණ ගැන කී කිසිවෙක්ට එවැනි සැලසුමක් ගැන කියන්නට සාක්ෂි නොමැති වීම තවත් බරපතළ තත්ත්වයකි.
කෙසේ වෙතත් මේ දේශපාලන අර්බුදය තවත් උග‍්‍ර කිරිමටත්, මෛත‍්‍රීපාල – මහින්ද රාජපක්ෂ දේශපාලන කුමන්ත‍්‍රණය සාධාරණීකරණය කිරීමටත් ඝාතන කුමන්ත‍්‍රණ කතාව ඉදිරියට ගෙනයෑම හැර විකල්පයක් නැත.
ඒ නිසා පාතාල ලෝකයට සම්බන්ධ කිහිපදෙනෙකුගෙන් කටඋත්තර ලබාගෙන සරත් ෆොන්සේකාව අත්අඩංගුවට ගැනීමේ සූදානමක් ඇතැයි පොලීසියේ ඉහළම නිලධාරීන් කිහිපදෙනෙකුගේ තොරතුරු අනුව පැහැදිළි වන්නේය. පොලීසියේ ආරංචිමාර්ග අනුව මේ දිනවල සොයන්නේ සරත් ෆොන්සේකා තමන්ට ඝාතන කොන්ත‍්‍රාත්තුවක් බාරදුන් බවට ප‍්‍රකාශයක් ලබාගැනීමට පුද්ගලයෙක්වය. එවැනි කටඋත්තරයක් ලබාදෙන කෙනෙකුට මුදල් ලබාදීමේ සැලසුමක්ද ඇතැයි පොලීසියේ ආරංචිමාර්ග පවසයි.
සැකපිට අත්අඩංගුවට ගෙන සතියක් හෝ දෙකක් බන්ධනාගාරයේ තැබුවත් ජනාධිපති ඝාතනය කිරීමට සැලසුම් කළාය යන චෝදනාව සරත් ෆොන්සේකාගේ ඇෙඟ් ගැසීමට ප‍්‍රමාණවත්ය. සරත් ෆොන්සේකා හරහා චෝදනාව රනිල් වික‍්‍රමසිංහටද එල්ලකළ හැකිය.
අපරාධවලට සම්බන්ධ හිටපු හමුදා සෙබළුන් සිටීනම් ඔවුන්ව අත්අඩංගුවට ගතයුතු බව අපි හැමදාම කීවෙමු. එහෙත් එවැනි අයව අත්අඩංගුවට ගැනීම නවත්වන ලෙස තර්ක කළේ රාජපක්ෂ කඳවුරය. ඒ වෙනුවෙන් හඬ නැඟු‍වේ දිවයින වැනි පුවත්පත්ය. එවැනි තර්ක මැවෙද්දී එදා මෛත‍්‍රීපාල සිරිසේන කීවේ රණවිරුවන්ව අත්අඩංගුවට ගැනීම පටන්ගත්තේ රාජපක්ෂලා විසින් සරත් ෆොන්සේකාව සිරගත කිරීමෙන් බවය. ඒවා කොහොම වෙතත් අන්තිම කාලයවෙද්දී රණවිරු ලේබලය සමග අපරාධවලට සම්බන්ධ හමුදා නිලධාරීන්ව ආරක්ෂා කරන්නට පෙළඹුනේ මෛත‍්‍රීපාල සිරිසේනලාමය.
දැන් ඔවුන් කරන්නට උත්සාහ කරන්නේ අපරාධ පරීක්ෂණ දෙපාර්තමේන්තුව විසින් අපරාධයකට සම්බන්ධ බව කරුණු සොයා නොගත් හමුදා නිලධාරියෙක්ව අත්අඩංගුවට ගැනීමට සැලසුම් සකස් කිරීමටය. තවත් හමුදා නිලධාරියෙක්ව නොව හිටපු හමුදාපතිවරයාව අත්අඩංගුවට ගැනීමටය. ව්‍යාජ සාක්ෂි මත අත්අඩංගුවට ගන්නේ හමුදා නායකයෙක්ව වුණත් සාමාන්‍ය පුරවැසියෙක් වුවත් අපට වෙනසක් නැත. අපි ඒ දෙකටම එක සේ විරුද්ධ වන්නෙමු. එහෙත් ‘රණවිරුවන්’ සම්බන්ධයෙන් රාජපක්ෂලා නිර්මාණය කර ඇති දර්ශක පිළිගතහොත් කුමන අපරාධය කළත් හමුදා නිලධාරියෙක්ව අත්අඩංගුවට ගත නොහැක. අප එවැනි දර්ශක පිළිනොගන්නා නිසා සාධාරණ සාක්ෂි මත අපරාධයක් සැලසුම් කළ ඕනෑම පුද්ගලයෙක්ව අත්අඩංගුවට ගත යුතුයැයි කියන්නෙමු. එහෙත් දේශපාලන වුවමනා මත ව්‍යාජ තොරතුරු පාවිච්චි කරමින් පුද්ගලයන් අත්අඩංගුවට ගැනීමට එකඟ විය නොහැක.
ඉදිරියේදී ඒ ආකාරයෙන් සරත් ෆොන්සේකා අත්අඩංගුවට ගතහොත් තවත් අනාවැකි දෙකක් කියා තැබිය යුතුය. එකක් නම් බන්ධනාගාරගතව ටික දිනකින් සරත් ෆොන්සේකාට ඇප ලබා නිදහස් වීමට අවස්ථාව ලැබෙනු ඇති බවයි. දෙවැන්න නම් මේ දේශපාලන අර්බුදය අවසන් වූ පසුව ඒ පරීක්ෂණ ක්රියාත්මක නොවනු ඇති බවයි. ඒ චෝදනාවද කාලය මත යටපත්ව යනු ඇති බවයි. එයට හේතුව ඝාතන කුමන්ත‍්‍රණයක් නොතිබීමයි.
