එක්සත් ජාතික පක්ෂය ප‍්‍රමුඛ ආණ්ඩුවේ දේශපාලන පක්ෂ සඳහා නව නාමයකින් යුතු සන්ධානයක් ඇති කරගැනීම සඳහා වන සාකච්ඡා අග‍්‍රාමාත්‍ය රනිල් වික‍්‍රමසිංහගේ උදාසීන ආකල්ප හේතුවෙන් ප‍්‍රමාද වී ඇතැයි එජාපයට හිතවත් දේශපාලන පක්ෂයක නායකයෙක් අනිද්දා සමඟ පැවසීය.
එකසත් ජාතික පෙරමුණ ලෙස පසුගිය මැතිවරණයට ඉදිරිපත් වූ පක්ෂ සඳහා සන්ධාන ලාංඡනයක් හෝ නිසි සන්ධාන නාමයක් නොමැති වීම ගැටලූ‍වක් නිසා එම පක්ෂ වෙනුවෙන් නව සන්ධානයක් ගොඩනැංවීම සඳහා පක්ෂ නායකයන් අතර සාකච්ඡා පවත්වා ඇත. එහිදී සන්ධානයක් සඳහා ගැළපෙන නාමයක්, ලකුණක් සහ ප්රතිපත්ති මාලාවක් සකස් කරගැනීම සාකච්ඡාවල අරමුණ වී ඇත.
මීට පෙර පැවැත්වූ සාකච්ඡුාවල ප‍්‍රතිඵලයක් ලෙස අමාත්‍ය මලික් සමරවික‍්‍රම සහ අමාත්‍ය කබීර් හෂීම් වෙත එවැනි සන්ධානයක් ඇති කරගැනීම සඳහා වන සාකච්ඡුා ඉදිරියට ගෙනයෑමේ වගකීම පවරා ඇති බව එම පක්ෂ නායකයා පෙන්වාදුන්නේය.
එසේ වුවත් සාකච්ඡා ඉදිරියට ගෙනයෑමට අගමැති රනිල් වික‍්‍රමසිංහ වැඩි උනන්දුවක් නොදැක්වූ නිසා දැනට සාකච්ඡුා නැවතී ඇති බව එම පක්ෂ නායකයා කීය. එසේ වුවද අමාත්‍ය රාජිත සේනාරත්න, අමාත්‍ය මනෝ ගනේෂන් ඇතුළු පිරිසක් අගමැති රනිල් වික‍්‍රමසිංහට දැඩිව පෙන්වාදී ඇත්තේ තවත් ප‍්‍රමාද නොවී එම සන්ධානය ගොඩනැඟිය යුතු බවය.
එක්සත් ජාතික පෙරමුණෙන් මැතිවරණයට ඉදිරිපත්වූ රාජිත සේනාරත්න, චම්පික රණවක, මනෝ ගනේෂන් යන අමාත්‍යවරුන් ජනාධිපතිවරයා සමඟ විදේශගත වී සිටින බැවින්, ඔවුන් ලංකාවට පැමිණි විගස සාකච්ඡුා ආරම්භ කිරීමට මේ වනවිට අගමැති රනිල් වික‍්‍රමසිංහ එකඟ වී ඇතැයි එම අමාත්‍යවරයා කීය.
