ඔබ ඇතුළු කණ්ඩායමක් 2014 අග ආණ්ඩුවෙන් ඉවත්වෙලා එකතුවුණේ යම් අරමුණු ටිකක් නියෝජනය කළ කණ්ඩායමක් සමඟ. 2015 ජනාධිපතිවරණයේදී ඉදිරිපත් කළ ඒ අරමුණු ඉටුකරන්න සමත්වෙලා නැහැ නේද?
සීයට සීයක් සාර්ථක වෙලා නැහැ. සාර්ථක වුණ ඒවාත් තියෙනවා. ඉදිරියේදී සාර්ථක කරගන්න අවශ්‍ය ඒවාත් තියෙනවා.
විධායක ජනාධිපති ක‍්‍රමය අහෝසි කිරීම මූලිකව තිබුණු පොරොන්දුවක්. දැන් ජනාධිපතිවරයාගේ පාර්ශ්වය ඒ පොරොන්දුව මඟහරින බව පෙනෙනවා නේද?
විධායක ජනාධිපති ක‍්‍රමය අහෝසි කරන්න ඕනෑය කියලා අපේ පක්ෂයේ පවා හිටපු නායකයන් කිව්වා. ඒත් කළේ නැහැ. මෛත‍්‍රීපාල සිරිසේන ජනාධිපතිවරයා විතරයි ඉවත් කරන්න උත්සාහ කළේ. ඒත් ශ්‍රේෂ්ඨාධිකරණයෙන් තීන්දුවක් දුන්නා මහජන ඡුන්දයෙන් පත්වුණ ජනාධිපතිවරයාට කරන්න පුළුවන් මේ ටික කියලා. එතැනින් එහාට යනවා නම් ජනමත විචාරණයකට යා යුතු බව කිව්වා. ඒ අනුව තමයි දහනවවැනි සංශෝධනය සම්මත කරගත්තේ.
ඒ තරම් වුවමනාවක් තිබුණා නම් ජනමත විචාරණයකට යන්න පුළුවන්කම තිබුණා නේද?
ඒක ඉදිරියේදී කරන්න පුළුවන්කම තියෙනවා. මීටත් වඩා ඉදිරියට කරනවා නම් ජනමත විචාරණයකට යා යුතුයි. විධායක ජනාධිපති ක‍්‍රමය ගැන පක්ෂයේ මත කිහිපයක් තියෙනවා. විධායක ජනාධිපති ක‍්‍රමය අහෝසි කිරීමට කැමති වෙන්නත් පුළුවන්. හැබැයි ඒකට පාර්ලිමේන්තුවට බලයක් තියෙන්න ඕනෑ. තනි පක්ෂයකට බලය ලැබෙන ක‍්‍රමයක් තියෙන්න ඕනෑ. එහෙම නැත්නම් සුළු පක්ෂවලට පුළුවන්කම තියෙනවා රටම වෙනස් කරන්න. එහෙම වුණොත් රටක් විදියට ගැටලූ‍වලට මුහුණදෙන්න වේවි. විධායක බලයක් තිබුණාම රටේ ආරක්ෂා කළ යුතුම කාරණාවලදී දැඩිව ඉඳලා රට ආරක්ෂා කරගන්න පුළුවන්. ඉතින් විධායක ජනාධිපති ක‍්‍රමයේ හොඳ නරක දෙකම තියෙනවා.
ඔබ ඇතුළු පිරිසක් තමයි වත්මන් ආණ්ඩුව හදන්නට හිටපු ආණ්ඩුවෙන් ඉවත්වුණේ. ශ‍්‍රීලනිපයේ ඉන්න අනෙක් අය එහෙම ආවෙ නැහැ. ඔවුන්ට ඕනෑ මේ කණ්ඩායම් දෙක එකතු කරන්න. දැන් ඔබ ඇතුළු පිරිස ලොකු උභතෝකෝටිකයක ඉන්නවා. පක්ෂය එකතු කිරීම සම්බන්ධව. මම නිවැරදිද?
අපට පුද්ගලයා එක්ක නෙවෙයි ප‍්‍රශ්නය තියෙන්නේ. ක‍්‍රමවේදය එක්ක. මෛත‍්‍රීපාල සිරිසේන මැතිතුමාට පුළුවන්ද මහින්ද රාජපක්ෂ මහත්තයා හොඳ නැහැ කියලා, පස්සේ මහින්ද රාජපක්ෂ මහත්තයා එක්ක එකට වැඩකරන්න. බලයට පත්වෙද්දී මහින්ද රාජපක්ෂ මහත්තයාගේ ක‍්‍රමවේදය විවේචනය කරලා, දැන් රාජපක්ෂ මහතා හොඳ වෙන්නේ කොහොමද? ඒකාබද්ධ විපක්ෂය තවමත් කතාකරන්නේ රාජපක්ෂ කෙනෙක්ට බලය දෙන්න ඕනෑ කියලා. කුමාර වෙල්ගම මන්ත‍්‍රීතුමා ළඟදී කිව්වෙ මොකක්ද, පවුල්වාදය නිසා තමයි මෛත‍්‍රීපාල සිරිසේන මහතා ඇතුළු කණ්ඩායම ගියේ. තවමත් පවුල්වාදයට ඒ පිරිස විරුද්ධයි කියලා. තවමත් පවුල්වාදය වෙනස් වෙලා නැහැ. පවුල්වාදයට එරෙහිව එළියට බැහැපු ජනාධිපතිතුමා දැන් කොහොමද එයාලා එක්ක එකතු වෙන්නේ. අපට පුළුවන්කමක් නැහැ අපි එපා කීව දේ එහෙම්පිටින්ම පිළිගන්න. හැබැයි ඒකෙන් කියැවෙන්නේ නැහැ කණ්ඩායම් දෙක එකතුවෙන්න බැහැ කියලා. අපි හොරකම, දූෂණය, පවුල්වාදය, ඒකාධිපතිබව වගේ සියලූ දේටම විරුද්ධ වුණා. හැබැයි ශ‍්‍රීලනිපය සමඟි වෙන්න අපි බාධා කරන්නෙ නැහැ. මේ අලූ‍ත් වැඩපිළිවෙළට සූදානම් වෙලා අලූ‍ත් ගමන එක්ක එකතුවෙන්න. එකතුවෙනවා නම් වෙනස් වෙන්න. අපට බැහැ ඔවුන්ව පිළිගෙන ඔවුන් එක්ක එකතුවෙන්න.
ඒත් වාසුදේව නානායක්කාර මන්ත‍්‍රීවරයා කියලා තිබුණා මෛත‍්‍රීපාල සිරිසේන මහතා මහින්ද රාජපක්ෂ මහතාට අගමැති ධුරය දෙන්න එකඟයි කියලා.
මේ රටේ මිනිස්සු මෛත‍්‍රීපාල සිරිසේන මහත්තයාට ගහයි. මෛත‍්‍රීපාල සිරිසේන මහත්තයාට මොනවා නොකියයිද. අපි මේ රට හදනවා, රට වෙනස් කරනවා කියලා ආවේ. අපට බලය රඳවාගන්න ඕනෑකමට එදා හොඳ නැහැ කී දේවල් දැන් හොඳයි කියනවා නම් මොනවා නොකියයිද. එහෙම කළොත් ඒක මේ රටේ ජනතාවට කරන්නෙ ලොකු අසාධාරණයක්. අපි තරුණයන්, උගතුන්, බුද්ධිමතුන්ට මොන තරම් බලාපොරොත්තු දුන්නාද. ඒ බලාපොරොත්තු වුණ වෙනස අපි කරන්න එපැයි. අපි බලය රඳවාගැනීමේ අරමුණෙන් වෙනස් වෙන්න බැහැ.
ආණ්ඩුව ඇතිකරගත්ත අවබෝධතා ගිවිසුමෙහි කාලය දැන් අවසන්. අලූ‍ත් ගිවිසුමක් ඇතිකරගන්න අවශ්‍යද?
අපි අවබෝධයක් අනුවනේ ජාතික ආණ්ඩුව හැදුවේ. ඒ අවබෝධය අදත් අපට තියෙනවා.
අලූ‍ත් ගිවිසුමක් ඇතිකරගන්නවාද?
ආයෙ ගිවිසුමක් ඕනෑ නැහැනේ. මේ විදියටම අපට යන්න පුළුවන්.
ශ‍්‍රීලනිපය ආණ්ඩුවෙන් ඉවත්වීම ගැන සාකච්ඡාවක් තියෙනවාද?
ප‍්‍රධාන පක්ෂ දෙකට එකතුවෙලා රට හදන්නනේ බාරදීලා තියෙන්නේ. අපි එකතුවෙලා රට හදන්න ඕනෑ. ආණ්ඩුවෙන් ඉවත්වෙන කතා විපක්ෂයෙන් හදන ඒවා. අපි ඔය වගේ වල්පල් කතාකරලා වැඩක් නැහැනේ.
ඒත් ආණ්ඩුව ඇතුළේ සීතල යුද්ධයක් තියෙනවා නේද?
සීතල යුද්ධයක් නැහැ. මම මේ තත්වයට කැමතියි. දැන් හැමදාම මේ දේවල් සිද්ධවුණේ සාකච්ඡුා නොකළ නිසා. හැබැයි ප‍්‍රධාන පක්ෂ දෙකක් එකට එකතුවුණාම ශ‍්‍රීලනිපයට මතවාදයක් තියෙනවා. එජාපයට මතවාදයක් තියෙනවා. මේ දෙක හැම තැනදීම එක සමාන වෙන්නේ නැහැ. බොහොම පරස්පරයි. හැබැයි යම් වැඩක් වෙද්දී පරස්පර මත තියෙන කණ්ඩායම් දෙක කතාකරලා මැද තැනකට එනවා. ඒ මැද තැන හොඳයි. එකිනෙකාගේ අඩුපාඩු එකිනෙකා පෙන්වද්දී හොඳම දේවල් ක්රියාත්මක කරන්න පුළුවන්. මේ වගේ ආණ්ඩුවක් ඇතුළේ ඒ වගේ ප‍්‍රශ්න ඇතිවෙන එක සාධාරණයි. ආණ්ඩුවෙන් ඉවත්වීමක් ගැන අපි කතාකරලා නැහැ. හැබැයි ආණ්ඩුවේ තියෙන ප‍්‍රශ්න හා ගැටලූ ගැන කතාකරනවා. ප‍්‍රශ්නයක් වුණාම තර්ක විතර්ක කරගන්නවා කියන්නෙ ගැටුමක් නෙවෙයි.
දේශපාලනයේදි තරුණයන් යැයි කියන්නේ මැදිවිය ලබන අයට. තරුණ විය ඉක්මවමින් සිටින ඔබවත් පොඩි කොල්ලෙක් විදියට හඳුන්වමින් ප‍්‍රවීණ නායකයන් විවේචන එල්ල කළා. අන්තිමේදි ඔබව ලේකම්ධුරයෙන් ඉවත්කරන තත්වයට ආවා. මේ පරම්පරා අවුලට ශ්රීලනිප ප‍්‍රතිසංවිධානයේදි විසඳුමක් ලැබේවිද?
අපි පක්ෂය ප‍්‍රතිසංවිධානයේදී බලාපොරොත්තු වෙන්නේ හොඳ නිලධාරී මණ්ඩලයක් පත් කරගන්නවා කියන කාරණාව. ඔබ කිව්ව කාරණය තමයි දේශපාලන අභ්‍යන්තරයේ තියෙන ප‍්‍රශ්නය. තරුණයන්ට හෙට රට බාරයි කියලා ඡුන්දයක් ආවාම තරුණයන්ව ගස්වල නග්ගනවා. රාජ්‍ය සේවකයන් පෙන්ෂන් යනවා පනස්පහ පැන්නාම. දේශපාලනයේදි පොරවල් වෙන්නේ හැට පැන්නාට පස්සේ. මේ රටේ දෙවැනි පරම්පරාවක් නැහැ කියලා මහ ලොකුවට කියලා තියෙනවා. හැබැයි දෙවැනි පරම්පරාවක් හදලා තියෙනවාද. මෛත‍්‍රීපාල සිරිසේන මහතා දෙවැනි පරම්පරාවක් හදන්න මාව සහ මහින්ද අමරවීර මහත්තයාව පත් කළා. මේක හැමදාම වයසක අයට තියෙන්න ඕනෑ නැහැ. අපි කියන්නේ නැහැ පුද්ගලයන් වයසට ගියාම දේශපාලනයෙන් විශ‍්‍රාම යන්න කියලා. වියපත් අයට පුළුවන් තමන්ගෙ අත්දැකීම්වලින් තරුණයන්ට උපදෙස් ලබන්න. ලෝකය වෙනස් කරලා තියෙන්නේ තරුණයෝ. දැන් ලෝකයේම තරුණ නායකයන් බිහිවීමේ රැුල්ලක් තියෙනවා. බුදුහිමියන් බුදුවුණේ හැට පැන්නාම නෙවෙයි. තරුණ කාලයේදී. එදා කිව්වා නම් පොඩි කොල්ලෙක් බුදුවෙලා, අපි එයා කියන දේ අහන්නේ කියලා වසර 2500ක් බුද්ධාගම තියෙන්නේ නැහැ. දේශපාලන නායකයන් බොරුවට තරුණයන්ට සලකන බව කිය කියා ඉන්නේ නැතිව කරලා පෙන්වන්නට ඔවුන්ට බුද්ධිය පෑදේවා කියලා අපි ඉල්ලා සිටිනවා.
පළාත් සභා ඡන්දය ගැන ආණ්ඩුවේ අභ්‍යන්තර එකඟතාවක් ඇතිවෙලා තියෙනවාද?
නැහැ. අපි පැහැදිලිවම කියනවා පළාත් සභා මැතිවරණ ක‍්‍රමය අලූ‍ත් ක‍්‍රමයට තියන්න ඕනෑ කියලා. හැබැයි පක්ෂ කිහිපයක් පරණ ක‍්‍රමයට යමු කියලා කතාකරනවා. දැන් තමන්ගේ පක්ෂය ජයග‍්‍රහණය කිරීම ගැන කල්පනා නොකර ක‍්‍රමවේදය වෙනස් කිරීම ගැන කල්පනා කරන්නයි ඕනෑ. මනාප ක‍්‍රමය හොඳ නැතැයි කීව අපි ආයෙමත් මනාප ක‍්‍රමයට යන්නේ කොහොමද.
ගෝඨාභය රාජපක්ෂ සහ මෛත‍්‍රීපාල සිරිසේන ජනාධිපතිතුමා එක්ක යම් මිත‍්‍රත්වයක් හෝ ගනුදෙනුවක් තියෙනවාද?
මේ දෙන්නාම ඉතාමත් හොඳින් හඳුනන දෙන්නෙක්. මම හිතන්නේ නැහැ තරහක් තියෙනවා කියලා. මමත් පාර්ලිමේන්තුවේදී මහින්ද රාජපක්ෂ මහතා එක්ක කතාකරනවා. ඒත් අපි ප‍්‍රතිපත්තිවලට එකඟ නැහැ. මෛත‍්‍රීපාල සිරිසේන මහතා මහින්ද රාජපක්ෂ මහත්තයාගේ ගෙදර මළගෙදර යද්දී සමහරු කිව්වා දේශපාලන සම්බන්ධයක් ඇති කියලා. ඒත් ඒක මනුෂ්‍යත්වයට ගිය ගමනක් විතරයි.
ශ‍්‍රීලනිපයේ මූලස්ථානයට හූ තැබීම ඇතුළුව, ශ‍්‍රීලනිපයට විරුද්ධ පක්ෂයක් ශක්තිමත් කරවීම දක්වා ශ්රීලනිප සාමාජිකයන් විසින් සිදුකළ විනය විරෝධී පියවර ගැන පක්ෂය විදියට පියවරක් ගන්නවාද?
පක්ෂ මූලස්ථානයට හූ කියනවා ටී.වී. එකේ දැක්කාම කවුරුත් ඒක අනුමත කරන්නේ නැහැ. කෙනෙක් ඕනෑම පක්ෂයක සාමාජිකයෙක් වෙන්න පුළුවන්. තව පක්ෂයකට ගලක් ගහනවා නම් එයාලාමනේ දුක් වෙන්න ඕනෑ. ඒ වගේ අයට ස්වභාවධර්මයෙන් දඬුවම් ලැබෙන්න ඕනෑ.
එතකොට පක්ෂය විනය පියවර ගන්නේ නැහැ?
පක්ෂයක විනය තියෙන්න ඕනෑ. මම නම් ඒ ගැන ඉතාමත් දැඩිව ඉන්නවා.
ඔබේ ඒ අවිනිශ්චිත පිළිතුරත් එක්ක සිහිවෙන කාරණයක් තියෙනවා. පක්ෂයේ ඇතැම් අය කියනවා දුමින්ද දිසානායක, අමරවීර දෙන්නා යූඇන්පී එකට යන්න ඉන්නේ කියලා. ඔවුන් කියන දේවල්වල තේරුමක් නැහැ, පක්ෂය ඉදිරියේදී මහින්ද රාජපක්ෂ මහත්තයා ළඟට යාවි කියලා…
අපි යූඇන්පී එකට යන්නේ නැහැ. අපට පක්ෂයක් තියෙනවානේ. ඔය කියන අයම තමයි එහාට මෙහාට වරින්වර ගිහින් තියෙන්නේ. මෛත‍්‍රීපාල සිරිසේන මහතා එක්ක එළියට ආපු කණ්ඩායම එක්සත් ජාතික පෙරමුණට ගියා. ඒත් මම ගියේ නැහැ. මම ශ‍්‍රීලනිපයෙන් ඉල්ලූ‍වා පැරදුණත් කමක් නැහැ කියලා. ඒත් මම දින්නා. ඇයි මම දැන් ශ‍්‍රීලනිපය අත්හරින්නේ. මේක මහින්ද රාජපක්ෂ මහතා ඇතුළු කණ්ඩායම හදපු කතාවක් විතරයි. පහළොස්දෙනාගේ කණ්ඩායම කියපු කතාවක් විතරයි ඕක. අපි ශ‍්‍රීලනිපයෙන් යන්නේ නැහැ. දැන් ශ‍්‍රීලනිපයේ ආණ්ඩුවේ ඉඳපු අය දැන් එහා පැත්තට ගියාම කවුරුවත් පිළිගන්නේ නැහැ. කුමාර වෙල්ගම මැතිතුමාට මම හරිම කැමතියි. එතුමා කෙලින් කතාකරනවා. ඩිලාන් පෙරේරා මැතිතුමා ගියාම කිව්වා දැන් බදුල්ලෙ පොහොට්ටුවේ නායකයා මම. ඩිලාන් පස්සේ ආවාට වැඩක් නැහැ, එයා මගේ පිටිපස්සෙන් ඉන්න ඕනෑ. මේ 15 දෙනා ඇමතිකම් අරගෙන පඩි අරගෙන, නිල නිවාස, රට සවාරි අරගෙන දැන් එතැනට කඬේ යනවා එතැනින් නම හදාගන්න. අපට වැඩියෙන්ම බනින්නේ ඒ අය. එස්.බී. දිසානායක මන්ත‍්‍රීතුමා මොන තරම් ආණ්ඩුවේ ඉන්න කාලයේම මහින්ද මහත්තයාට බැනලා තියෙනවාද. දුමින්ද දිසානායක බැනලා නැහැ. මම හැමදාම දරන මතය තමයි දේශපාලනඥයෙක් නළුවෙක් වෙන්න බැහැ කියන එක. නළුවෙක්ට අද එක ස්ක‍්‍රිප්ට් එකක් දෙනවා. අද ඒකට කතාකරනවා. හෙට තව ස්ක‍්‍රිප්ට් එකක් ලැබුණාම ඒකට රඟපානවා. දේශපාලනඥයාට එහෙම කරන්න බැහැ. ප‍්‍රතිපත්තියක් තියෙන්න ඕනෑ.
2015 ජනාධිපතිවරණයේදී මෛත‍්‍රීපාල සිරිසේන මහතා එක්ක හිටපු එජාපය ඇතුළු සියලූ කණ්ඩායම් 2019 ජනාධිපතිවරණයේදීත් එකට කටයුතු කළයුතු බවට අදහස් පළවෙනවා. ඒ ගැන අදහස මොකක්ද?
තවම ඒක තීන්දු කරලා නැහැ. නමුත් ශ‍්‍රීලනිපය විදියට අපි හැම තිස්සේම විශ්වාස කරනවා පක්ෂයක් විදියට ඉතාම ශක්තිමත් වෙන්න ඕනෑ බව. ඒ ශක්තිමත් වීමත් එක්ක අපි රට වෙනුවෙන් ගත යුතු හොඳම තීන්දුව ගන්න ඕනෑ. මහින්ද රාජපක්ෂ මැතිතුමාට අපි විරුද්ධ වුණේ පුද්ගලික කාරණයකට නෙවෙයිනේ. පක්ෂය වෙන පැත්තකට ගියා, රට වෙන පැත්තකට ගියා. ඒක ඉස්සරහට ගියා නම් රටට ලොකු විනාශයක් වෙන්න තිබුණා. මෛත‍්‍රීපාල සිරිසේන මහතා මහින්ද මහත්තයා වගේ ෆයිල් තියාගෙන හිටියේ නැහැ. තමන්ගේ ළඟ අයට විරුද්ධවත් පරීක්ෂණ කළේ නැහැ. මහබැංකු බැඳුම්කර සිදුවීම වෙලාවේත් පරීක්ෂණ කළා. මේ ක‍්‍රමවේදය හොඳයිනේ. මහින්ද මහත්තයාගේ නඩු ටික ගත්තාම ඬේසි ආච්චිගේ මැණික් මල්ල, නාමල් රාජපක්ෂ තමන්ගේ එකවුන්ට් එකේ තියෙන සල්ලි ගැන දන්නෑ කියලා කිව්වාම ඒවා නඩුවට හදපු බොරු බව අපි දන්නවානේ. අපට ආයේ පාරක් ඒ කාලයේ තිබුණු යුගය ඇතිකරන්න ඕනෑ නැහැ. මාධ්‍ය ආයතන ගිනිතැබූ කාලයක් ඇතිකරන්න ඕනෑ නැහැ. අද මාධ්‍යවල ඔයාලා අපට බනිනවා. ජනාධිපතිතුමාට බනිනවා. ඒත් සැනසිල්ලේ ?ට නිදාගන්නවා. බනින එක හොඳයි කියලා මම කියන්නේ නැහැ. හැබැයි ඔයාලාට නිදහස තියෙනවා. ඒ තත්වය වෙනස් කරන්න ඕනෑ නැහැ.
ඒත් එජාපය කියන්නේ ඊළඟට තනි එජාප ආණ්ඩුවක් නිර්මාණය කරන්න ඕනෑ බවයි….
අපිත් පක්ෂයක් විදියට ඒක කියනවානේ. අපටත් ඕනෑ අපේ ජනාධිපතිවරයෙක්. අපේ ආණ්ඩුවක්. අපේ පළාත් සභාවක්. ඉතින්, අපි ජයග‍්‍රහණය කරන තැනට යන්න තමයි අපි උත්සාහ කරන්නේ. ඒකේ වරදක් නැහැ. 2020 දී වඩාත් සුදුසු දේ අපට ඒ වෙලාවේ බලන්න පුළුවන්.
ජනාධිපතිවරයා තමන්ට විරුද්ධ අදහස් මර්දනය නොකරන බව ඔබ ඉහතින් කීවා. ඇත්තෙන්ම හිටපු ආණ්ඩුවට වඩා මේ ආණ්ඩුව සමයේ අදහස් පළකිරීමේ නිදහසක් තියෙනවා. හැබැයි ඒ නිදහස තමන්ටම පාරාවළල්ලක් වෙලා තියෙන බව දැන් ඔබලා කල්පනා කරනවාද?
අනිවාර්යයෙන්ම. දැන් මේක සරුංගලේ නූල කැඩුණා වගේනේ. දැන් මේ නිදහස ඉතාම කැත විදියට පාවිච්චි කරනවා. අපි විශ්වාස කරනවා ඕක ඔය විදියට කරගෙන ගිහින් එයාලාටම ඇති වෙලා වෙනස් වේවි කියලා. දැන් රූපවාහිනී නාළිකා එකකවත් රටේ සංවර්ධනය ගැන ධනාත්මක ප‍්‍රවෘත්ති පළවෙන්නේ නැහැ. ඉතින් ජාතියක් ගොඩනැගෙන්නේ කොහොමද. අඩුගාණේ ටෙලිනාට්‍යයක් හැදුවත් හදන්නේ ඍණාත්මක දේවල්. පත්තරයක් කියෙව්වත් නරක දේවල්. ඉතින් ජාතියක් ගොඩනංවන්න බැහැ. ජාතියක් ඉදිරියට යන්න නම් ඒ ඉදිරි ගමන මාධ්‍යවලින් නිරූපණය වෙන්න ඕනෑ. අපේ මොන තරම් හොඳ වැඩ තිබුණත් මාධ්‍යවල ඒක දාන්නේ නැහැ. අපි කොච්චර දිග කතාවක් කළත් මොකක් හරි ආඩපාලි කතාවක් තමයි දාන්නේ. දැන් රූපවාහිනියේ වොයිස් කට් දාගන්නම කතා පවත්වන දේශපාලනඥයනුත් බිහිවෙලා ඉන්නවා. අපි තැනකට ගියාම මයික් අරගෙන ගිහින් අහනවා, සර්ට මෙහෙම කිව්වා. දැන් සර් මොකද කරන්නේ කියලා. මේවා වෙනස් වෙන්න ඕනෑ. හැබැයි අපි මර්දනය ගේන්නේ නැහැ. මාධ්‍යවලට වගකීමක් තියෙනවා රටේ යහපත ගැන හිතලා ස්වයංවාරණයක් දාගන්න.
