23.7 C
Sri Lanka
6 July,2022

රවිට නාවික හමුදාවෙන් සෙබළු 126යි, වාහන 19යි

Must read

 

 

 

අපරාධ පරීක්‍ෂණ දෙපාර්තමේන්තුවට කට උත්තරයක් ලබාදීම මඟහැර මෙක්සිකෝවට ගොස් සිටින ආරක්ෂක මාණ්ඩලික ප‍‍්‍රධානී අද්මිරාල් රවීන්ද්‍ර විජේගුණරත්න ඔහුගේ කටයුතු සඳහා නාවික හමුදා සාමාජිකයන් 126 දෙනෙකු හා නාවික හමුදා රථ 19ක් භාවිත කරන බව වාර්තාවේ.

එම නාවික හමුදා සාමාජිකයන්ගෙන් බහුතරයක් අද්මිරාල් රවීන්ද්‍ර විජේගුණරත්නගේ පෞද්ගලික කාර්ය මණ්ඩලය වශයෙන් යොදාගෙන ඇති අතර එම සංඛ්‍යාව 86කි. ප‍‍්‍රවාහන සංචිතය වශයෙන් යොදාගෙන ඇති සංඛ්‍යාව 29කි. ආරක්ෂක මාණ්ඩලික ප‍‍්‍රධානි කාර්යාලයේ කටයුතු සඳහා ඉතිරි  අය යොදාගෙන ඇති අතර ඉන් 3 දෙනෙකු එහි මාධ්‍ය අංශය සඳහා යොදාගෙන ඇත.  තවත් 3 දෙනෙකු තොරතුරු තාක්ෂණ අංශය සඳහා යොදාගෙන ඇත. ඉතිරි පිරිස එහි අනෙකුත් කටයුතු සඳහා යොදාගෙන ඇත.

නාවික හමුදාවෙන් ලබාගෙන ඇති  වාහන 19 අතර කාර්, ඩබල් කැබ්, කැබ්, වෑන්, ජීප්, ති‍‍්‍රවීල් හා මෝටර් සයිකල් යන වාහන වේ. මේ වාහනවලින් වාහන දෙකක් ඔහුගේ බිරිඳගේ හා පුතාගේ පරිහරණයට ලබාදී ඇත.

මීට අමතරව නාවික හමුදාපති සමයේ ඔහු භාවිත කළ නාවික හමුදා මූලස්ථානයේ මහල් ගොඩනැඟිල්ල ඔහුගේ නිවාස අවශ්‍යතා සඳහා තවමත් භාවිත කරන අතර ඔහුගේ වාහන නැවැත්වීම සඳහාද නාවික හමුදා මූලස්ථානයේ මෙන්ම ඒ අසල චෛත්‍ය ප‍‍්‍රදේශයේ ස්ථාන වෙන්කරගෙන තිබේ.

ආරක්ෂක මාණ්ඩලික ප‍‍්‍රධානී කාර්යාල වෙබ් අඩවිය අනුව ඔහුත් ඇතුළු‍ එහි සංවිධාන ව්‍යුහය වශයෙන් පුද්ගලයන් 38 දෙනෙකුගේ සටහනක් පෙන්නුම් කෙරේ. ඒ අය අතර හිටපු හෝ වත්මන් ති‍‍්‍රවිධ හමුදා සාමාජිකයන් මෙන්ම සිවිල් පුද්ගලයන්ද සිටින බව පෙනේ.

2009 අංක 35 දරන ආරක්ෂක මාණ්ඩලික ප‍‍්‍රධානි කාර්යාල පනත අනුව ආරක්ෂක අමාත්‍යාංශ ලේකම්වරයාගේ විධානය අධීක්ෂණය හා පාලනය යටතේ ඔහු කටයුතු කළ යුතු අතර සන්නද්ධ හමුදා සාමාජිකයන් එම කාර්යාලයේ කටයුතු සඳහා යොදාගන්නේ නම් ආරක්ෂක අමාත්‍යාංශ ලේකම්වරයා ති‍‍්‍රවිධ හමුදාපතිවරුන් විමසා එය සිදුකළ යුතුය.

නාවික හමුදා සාමාජිකයන් 126 දෙනෙකු එහි වාහන 19ක්, නාවික හමුදා මූලස්ථානයේ නවාතැන් ඇතුළු පහසුකම් අද්මිරාල් රවීන්ද්‍ර විජේගුණරත්නට ලබාදී ඇත්තේ ඇයිද යන්න පිළිබඳ නාවික හමුදා මාධ්‍ය ප‍‍්‍රකාශක කමාන්ඩර් දිනේෂ් බණ්ඩාරගෙන් අප විමසූ අතර ඒ පිළිබඳව පසුව පිළිතුරු ලබාදෙන බව ඔහු පැවසුවද පුවත්පත මුද්‍රණයට යනතෙක් ඔහුගෙන් පිළිතුරක් ලැබුණේ නැත.

 

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි