No menu items!
27.5 C
Sri Lanka
29 March,2024

මෛත‍්‍රීට එකතුවෙන්න මහින්ද කැමතියි

Must read

මෛත‍්‍රීපාල සිරිසේන ජනාධිපතිවරයා යටතේ මහින්ද රාජපක්ෂ මහතා අගමැති ධුරයට පත්කිරීම පිළිබඳව ශ‍්‍රීලනිපය සහ ඒකාබද්ධ විපක්ෂය අතර එකඟතාවක් ඇති කරගැනීම සම්බන්ධයෙන් මහින්ද රාජපක්ෂ ජනාධිපතිවරයා ධනාත්මක පිළිතුරක් ලබාදුන් බව අනිද්දා සමඟ අදහස් දැක්වූ ප‍්‍රජාතන්ත‍්‍රවාදී වාමාංශික පෙරමුණේ ප‍්‍රකාශකයෙක් පැවසීය.

ප‍්‍රජාතන්ත‍්‍රවාදී වාමාංශික පෙරමුණේ නායක වාසුදේව නානායක්කාර මහතා ඇතුළු එම පක්ෂයේ දේශපාලන මණ්ඩල සභිකයන් පිරිසක් අගෝස්තු 29 වැනිදා මහින්ද රාජපක්ෂ මහතාගේ නිල නිවසේදී ඒ පිළිබඳව සාකච්ඡුා කර ඇත. අනිද්දා සමඟ අදහස් දැක්වූ ප‍්‍රජාතන්ත‍්‍රවාදී වාමාංශික පෙරමුණේ ප‍්‍රකාශකයා පෙන්වාදුන්නේ මහින්ද රාජපක්ෂ මහතාට අගමැතිධුරය ලබාදීමට මෛත‍්‍රීපාල සිරිසේන මහතා කැමැත්තක් දක්වන බව එම පක්ෂයට තොරතුරු ලැබී තිබෙන බවයි. ඒ බව අගෝස්තු 27 වැනිදා මාධ්‍ය සාකච්ඡාවකදී ප‍්‍රජාතන්ත‍්‍රවාදී වාමාංශික පෙරමුණේ නායක වාසුදේව නානායක්කාර විසින් ප‍්‍රකාශ කර තිබුණි. ප‍්‍රජාතන්ත‍්‍රවාදී වාමාංශික පෙරමුණ විසින් ඉදිරිපත් කර තිබෙන යෝජනාව වන්නේ වත්මන් ආණ්ඩුව ඡන්ද විමසීමකදී පරාජය කොට, වත්මන් කැබිනට් මණ්ඩලය විසුරුවාහැර, මහින්ද රාජපක්ෂ මහතා නව අගමැතිවරයා ලෙස පත් කළ යුතු බවයි.

ඉන්පසුව ජවිපෙ ඉදිරිපත් කළ 20 වන සංශෝධනය හෝ වෙනත් ව්‍යවස්ථා සංශෝධන යෝජනාවක් හරහා විධායක ජනාධිපති ක‍්‍රමය අහෝසි කළ යුතු බව ප‍්‍රජාතන්ත‍්‍රවාදී වාමාංශික පෙරමුණේ යෝජනාව වී ඇත.

මහින්ද රාජපක්ෂ සහ මෛත‍්‍රීපාල සිරිසේන යන නායකයන් දෙදෙනා යළි එක් කිරීම මේ දිනවල ඒකාබද්ධ විපක්ෂය අභ්‍යන්තරයේ ප‍්‍රධාන සංවාදය බවට පත්ව ඇතැයි එම මාතෘකාව පිළිබඳව අදහස් දක්වමින් ඒකාබද්ධ විපක්ෂයේ පක්ෂ නායකයෙක් අනිද්දා සමඟ ප‍්‍රකාශ කළේය.
ගෝඨාභය රාජපක්ෂ ජනාධිපති අපේක්ෂකයා බවට පත්කිරීමේ අරමුණෙන් කටයුතු කරන පිරිසක් එම යෝජනාවට අකැමැත්ත පළකර ඇතත් මහින්ද රාජපක්ෂ මහතාට සමීප බහුතර කණ්ඩායම එම යෝජනාවට පක්ෂ බව එම පක්ෂ නායකයා ප‍්‍රකාශ කළේය.

කෙසේ වෙතත් මේ සම්බන්ධයෙන් ඒකාබද්ධ විපක්ෂය සහ ශ‍්‍රීලනිපය අතර පැහැදිලි සාකච්ඡුාවක් තවම සිදුවී නැතැයි අනිද්දා සමඟ අදහස් දැක්වූ ඒකාබද්ධ විපක්ෂයේ ප‍්‍රකාශකයෙක් පැවසීය.

අනුරංග ජයසිංහ

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි