තරුණයන් පස්දෙනෙකු ඇතුළු පුද්ගලයන් 11 දෙනෙකු අතුරුදහන් කිරීමේ නඩුවේ සාක්ෂිකරුවන් කිහිප දෙනෙකු සහභාගී වූ මාධ්‍ය හමුවක් පසුගියදා පැවැත්වුණි.
එම මාධ්‍ය හමුවේ ප‍්‍රධානත්වය ගත්තේ පසුගිය දිනක ස්විස් තානාපති කාර්යාලය අසල මාරාන්තික උපවාසයකට ගොස් රාත‍්‍රියේ භික්ෂු ඉල්ලීමකට යැයි කියා එය අවසන් කළ මේජර් අජිත් ප‍්‍රසන්නය.
මේ මාධ්‍ය හමුවේ මුඛ්‍ය පරමාර්ථය වූයේ තරුණයන් පස්දෙනෙකු ඇතුළු පුද්ගලයන් 11 දෙනෙකු කෙප්පම් ලබාගැනීම සඳහා පැහැරගෙන ගොස් අතුරුදහන් කිරීමේ සිද්ධියේ චූදිතයන්ව ඒ සඳහා නිකරුණේ පටලවා ඇති බව කියන්නටය.
වැඩිදුරටත් ජනාධිපති ගෝඨාභය රාජපක්ෂ මෙම සිද්ධියට සම්බන්ධ බවට සාක්ෂිකරුවන්ගෙන් ප‍්‍රකාශ ලබාගන්නට අපරාධ පරීක්ෂණ දෙපාර්තමේන්තු නිලධාරීන් උත්සාහ කළ බව කියන්නටය.
අපරාධ පරීක්ෂණ දෙපාර්තමේන්තුවත් අතුරුදහන් පුද්ගලයන්ගේ ඥාතීන්වත් ජනාධිපති ගෝඨාභය රාජපක්ෂ මෙම සිද්ධියට සම්බන්ධ යැයි කියා නැත. ඒ සම්බන්ධයෙන් කිසිදු සඳහනක්ද අධිකරණයට ඉදිරිපත් කර නැත. එහෙත් හිටපු නාවික හමුදාපතිවරුන් වන වසන්ත කරන්නාගොඩ හා රවීන්ද්‍ර විජේගුණරත්න මෙම කරුණු දැනසිටි බව හා චූදිත අපරාධකරුවන්ට රැුකවරණ හා ආධාර අනුබල දුන් බව නම් අධිකරණයට වාර්තා කර ඇත.
මීට පෙරත් වසීම් තාජුඞීන් ඝාතන නඩුවේ සාක්ෂිකරුවකු වූ පොලිස් නිලධාරියෙකු මේ ආකාරයටම මාධ්‍ය හමුවකට සහභාගී වෙමින් එම අපරාධය ගැන රාජපක්ෂලාගේ සම්බන්ධයක් ඇති බව කියන ලෙසට බලපෑම් එල්ලවූ බව කියා තිබුණි.
අපරාධ නඩුවල සාක්ෂිකරුවන් මේ ආකාරයට අධිකරඅණයට කිව යුතු කරුණු මාධ්‍ය හමු පවත්වමින් මාධ්‍යයට කීම අධිකරණයේ කටයුතුවලට කෙතරම් බලපෑමක් වනවාද නැද්ද යන්න අධිකරණයේ සැලකිල්ල යොමුවිය යුතු කරුණකි.
මාධ්‍ය හමුවලදී මේ කියන කරුණු අනුව යමකුට සිතිය හැක්කේ තරුණයින් 11 දෙනෙකු අතුරුදහන් වී නැති බවය. ලසන්ත වික‍්‍රමතුංග ඝාතනය වී නැති බවය, ප‍්‍රගීත් එක්නැලිගොඩ අතුරුදහන් කර නැති බවය, කීත් නොයාර් පැහැරගෙන නොගිය බවය, පෝද්දල ජයන්තගේ කකුල කඩා නැති බවය. මේ ලැයිස්තුව තවදුරටත් ලියාගෙන යා හැක.
මුලින් සඳහන් කළ මාධ්‍ය හමුවේදී අදහස් පළකල බස්නායක මුදියන්සේලාගේ විජයකාන්තන් නමැති සාක්ෂිකරු ඉතා වැදගත් ප‍්‍රකාශයක් කළේය. ඒ ඔහු ඇතුළු එල්.ටී.ටී.ඊ. සාමාජිකයන්ව ත‍්‍රිකුණාමලය ගන්සයිඞ් කදවුරේ රඳවාගෙන සිටි බව හා අවසානයට එහි ඉතිරිවූයේ ඔහු පමණක් බවය.
එයින් කියන්නේ එල්ටීටීඊ සාමාජිකයන්ව ගන්සයිඞ් කඳවුරේ රදවාගෙන සිට ඇති බවය. යම් පුද්ගලයෙක්ව බන්ධනාගාරයක හෝ රඳවා තබාගැනීමට නම් කළ ස්ථානයක රඳවා තබාගත හැක්කේ අධිකරණයේ අවසරයකින් පමණය. ත‍්‍රිකුණාමලය ගන්සයිඞ් කඳවුර යනු එවැනි රඳවා තබා ගැනීමේ ස්ථානයක් නොවේ. ඒ අනුව එහි එල්ටීටීඊ සැකකරුවන්ව රඳවා තබාගෙන ඇත්තේ අධිකරණ අවසරයකින් තොරව නීති විරෝධීව බව පෙනී යයි.
මේ යුද අපරාධ පිළිබඳ ශ‍්‍රී ලංකාවට එරෙහිව එල්ලවී ඇති චෝදනාවට කදිම සාක්ෂියකි. එම මාධ්‍ය හමුවෙන් කර ඇත්තේ එකී සාක්ෂිය සැපයීමය.
