කුඩා දරුවන් තිදෙනෙකු ඇතුළු සිවිල් වැසියන් අට දෙනෙකු ඝාතනය කිරීම පිළිබඳව වැරදිකරු වී සිරදඩුවම් විඳිමින් සිටි කෝප‍්‍රල් සුනිල් රත්නායකට ජනාධිපති සමාව ලබාදීම ශ‍්‍රී ලංකාවේ යුක්තිය පිළිබඳව වැරදි පණිවුඩයක් ලබාදෙන එකක් යැයි ශ‍්‍රී ලංකා මානව හිමිකම් කොමිෂන් සභාව ජනාධිපතිවරයා වෙත ලිපියක් යවමින් සඳහන් කර තිබේ.

මාර්තු 29 වැනිදා මානව හිමිකම් කොමිෂන් සභාාවේ සභාපතිනි දීපිකා උඩුගම මහත්මියගේ අත්සනින් යුතුව ජනාධිපතිවරයා වෙත එම ලිපිය යවා ඇත. යාපනය මිරුසුවිල් ප‍්‍රදේශයේදී 2000 දෙසැම්බර් 19 වැනිදා සිදුකරන ලද මෙම ඝාතනය පිළිබඳව ශ්‍රේෂ්ඨාධිකරණ විනිසුරු මඩුල්ලක් ඒකමතික තීන්දුවක් ලබාදුන් එකක් බවත්, එය අධිකරණ ඉතිහාසයේ ඓතිහාසික තීන්දුවක් බවත් එම ලිපියෙන් පෙන්වාදී ඇත. එම සිදුවීම වසර ගණනාවකට පෙර ඇඹිලිපිටිය පාසල් සිසුවෙකු ඝාතනය කිරීමේ සිදුවීමට ලබාදුන් තීන්දුවට සමානකම් දක්වන බවද එහි පෙන්වාදී ඇත.


එම තීන්දු දෙකම ශ‍්‍රී ලංකාවේ අපරාධ කරන පුද්ගලයන්ට දඩුවම් නොලැබීම ගැන එල්ලවෙන චෝදනාවලට ප‍්‍රතිචාර දැක්වීම් වන තීන්දු වන බවත්, එවැනි තීන්දු ඇත්තේ කිහිපයක් පමණක් බවත්, එවැනි තීන්දුවකින් දඩුවම් ලැබූ පුද්ගලයෙකුට සමාව ලබාදීම නිශේධනීය තත්වයක් බවත් ලිපියෙන් පෙන්වා තිබේ.


කොමිෂන් සභාව මරණ දඩුවම ලබාදීමට එකඟ නොවන බවත්, එම නිසා මරණ දඩුවම නියම වී සිටි සුනිල් රත්නායකගේ දඩුවම ජීවිතාන්තය දක්වා සිර දඩුවමකට මාරු කළා කොමිෂන් සභාව එයට එකඟ වන බවත් එම ලිපියෙහි වැඩිදුරටත් සඳහන්ය.