දේශපාලන පළිගැනීම් පිළිබඳව සෙවීමට පත් කළ ජනාධිපති කොමිෂන් සභාව සිය කාර්යභාරයට පිටින් කටයුතු කරන බව ප්‍රකාශ කරමින් රිට් ආඥාවක් ඉල්ලා අභියාචනාධිකරණය ඉදිරියේ පෙත්සමක් ගොනු කිරීමට බලාපොරොත්තු වන බව සමගි ජන බලවේගයේ නායකයෝ කිහිපදෙනෙක් පැවසූහ.

පෞද්ගලික සමාගමක් වන ඇවන්ගාඞ් සමාගමේ නිශ්ශංක සේනාධිපතිගේ පැමිණිල්ලක් මත ඔහුට සිදු වුණායැයි කියන පළිගැනීමක් පිළිබඳ විමර්ශනය කිරීම එම කොමිසමේ විෂයට පරිබාහිර ක්‍රියාවක් බව පෙන්වාදීමට බලාපොරොත්තු වන බව එම නායකයෝ කීහ. අනිද්දා කළ විමසීමකදී අදහස් දැක්වූ හිටපු අමාත්‍ය රාජිත සේනාරත්න ප්‍රකාශ කළේ ඒ සඳහා නීතිඥවරුන් සමඟ සාකච්ඡා කර ඇති බවත්, ඉදිරියේදී පෙත්සම ගොනු කිරීමට බලාපොරොත්තු වන බවත්ය.

මේ පිළිබඳ අදහස් දක්වමින් සමගි ජන බලවේගයේ මහලේකම් රංජිත් මද්දුමබණ්ඩාර ප්‍රකාශ කළේ ඉහත කී තර්කයට අමතරව මැතිවරණ සමයකදී එම ක්‍රියාවලියට බලපෑමක් වන ලෙස මැතිවරණයට ඉදිරිපත් වන අපේක්ෂකයන්ට එරෙහිව තහවුරු නොවූ චෝදනා ඉදිරිපත් කිරීමට වේදිකාවක් ලෙස මෙම කොමිසම පාවිච්චි කරන බවයි. ඒ පිළිබඳවද අධිකරණය ඉදිරියේ කරුණු දැක්වීමට බලාපොරොත්තු වන බව ඔහු කීය. මෙම ජනාධිපති කොමිසමට එරෙහිව රිට් ආඥාවක් නිකුත් කරන ලෙස ඉල්ලමින් අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ශානි අබේසේකර ජුලි 13 වැනිදා අභියාචනාධිකරණයේ පෙත්සමක් ගොනු කළ අතර, ජනතා විමුක්ති පෙරමුණේ නායක අනුර කුමාර දිසානායකද එදිනම පෙත්සමක් ගොනු කළේය.■