සමගි ජන බලවේගයේ ප්‍රචාරක කටයුතු වලට සහභාගී වූ එක්සත් ජාතික පක්ෂයේ පළාත් පාලන නියෝජිතයන්ගේ මන්ත්‍රීධුර අහෝසි කර, එම තනතුරුවලට වෙනත් පුද්ගලයන් පත් කරන ලෙස මැතිවරණ කොමිෂන් සභාවට ලිඛිතව දැනුම් දීමට කටයුතු සූදානම් කරමින් පවතින බව එක්සත් ජාතික පක්ෂ මහලේකම් අකිල විරාජ් කාරියවසම් පැවසීය.

මේ වන විට ඒ සඳහා ලිපිලේඛන සකස් කරමින් පවතින බව ඔහු කීය.
තවත් පිරිසකගේ එජාප සාමාජිකත්වය ජුලි 16 වැනිදා සිට අත්හිටවූ බවත්, ඒ අතර සිටින පළාත් පාලන නියෝජිතයන්ගේ තනතුරු නුදුරේදීම අහෝසි කරන බවත් ඔහු පැවසීය.

මෙලෙස සාමාජිකත්වය අහෝසි කරන ලද පුද්ගලයන්ට නිදහසට කරුණු ඉදිරිපත් කිරීම සඳහා සති දෙකක කාලයක් ලබාදී තිබුණු බව මේ පිළිබඳ විමසීමකදී කරුණු පැහැදිලි කරමින් එජාප මහලේකම්වරයා කීය.
මීට පෙර සමගි ජන බලවේගයේ අපේක්ෂකත්වය ලබාගත් එජාප ප්‍රබලයන් 102 දෙනෙකුගේ සාමාජිකත්වය දැනටමත් අත්හිටුවා ඇති බවත්, ජුලි 16 වැනිදා සාමාජිකත්වය අත්හිටවූයේ වෙනත් පිරිසකගේ බවත් ඔහු පැහැදිලි කළේය. සමගි ජන බලවේගයේ අපේක්ෂකත්වය ලබාගත්තේ නැතත්, එම පක්ෂයට මැතිවරණයේදී සහයෝගය දැක්වූ අයව ඡායාරූප හා වීඩියෝ ඇසුරෙන් හඳුනාගත් බව ඔහු කීය.

විනය පියවර ගැනීම සිදුකළේ එක්සත් ජාතික පක්ෂයේ කෘත්‍යාධිකාරී මණ්ඩලය යටතේ පත් කරන ලද නීතිඥවරුන්ගේ කමිටුවක් මගින් බව අනිද්දා සමඟ අදහස් දැක්වූ එක්සත් ජාතික පක්ෂයේ කෘත්‍යාධිකාරී මණ්ඩල සභිකයෙකු පැවසීය. එම කමිටුවේ සභාපති ලෙස කටයුතු කළේ නීතිඥ තිලක් මාරපන බව ඔහු වැඩිදුරටත් කීය.
මෙලෙස පක්ෂ සාමාජිකත්වය අහෝසි කිරීමට එරෙහිව කොළඹ සිවිල් අභියාචන මහාධිකරණයේ ගොනුකරන ලද පෙත්සම විභාගයට නොගෙන ඉවත් කළ බවද ඔහු සිහිපත් කළේය.