• මානව හිමිකම් කොමිසම පොලිස්පතිගෙන් ඉල්ලයි
  • ශිෂ්ට සමාජයක් ලෙස හැසිරෙන්නැයි ජනතාවගෙන් ඉල්ලයි



කොවිඞ්-19 අධි-වසංගතය පැතිර ගොස් ඇති මොහොතේ ජනවර්ගවලට එරෙහිව වෛරී ප‍්‍රකාශ කරන පුද්ගලයන්ට 2007 අංක 56 දරන සිවිල් සහ දේශපාලන අයිතිවාසිකම් සම්මුති පනතේ 3 වගන්තිය ප‍්‍රකාරව දැඩි නීතිමය පියවර ගන්නා මෙන් ශ‍්‍රී ලංකා මානව හිමිකම් කොමිෂන් සභාව වැඩබලන පොලිස්පති සී.ඞී. වික‍්‍රමරත්නගෙන් ලිඛිත ඉල්ලීමක් කර ඇත.


මානව හිමිකම් කොමිසමේ සභාපතිනි ආචාර්ය දීපිකා උඩුගමගේ අත්සනින් යුතුව වැඩබලන පොලිස්පතිවරයා වෙත අපේ‍්‍රල් 03 වැනිදා යොමුකර ඇති ලිපියකින් ඒ බව ඉල්ලා ඇත.


විශේෂයෙන්ම කොවිඞ්-19 ආශ‍්‍රිතව මුස්ලිම් ප‍්‍රජාවට එරෙහිව සමාජ මාධ්‍ය ඔස්සේ හා යම් ප‍්‍රධාන ප‍්‍රවාහයේ මාධ්‍ය ඔස්සේද ප‍්‍රකාශයට පත්කොට ඇති වෛරී ප‍්‍රකාශන පිළිබඳව කොමිෂන් සභාවට නොයෙකුත් පාර්ශ්වයන්ගෙන් පැමිණිලි ලැබී ඇතැයි එම ලිපියෙන් පෙන්වාදී ඇත. මෙම වෛරී ප‍්‍රකාශන තුළින් ඇතිවිය හැකි නොසන්සුන්තාව හැකි ඉක්මනින් වළක්වා ගැනීම සියලූදෙනාගේ යුතුකම බව එම ලිපියෙන් පැහැදිලි කර ඇත.


ශිෂ්ට සමාජයක් ලෙස හැසිරෙන්නැයි මානව හිමිකම් කොමිසම ඉල්ලයි


මේ අතර අපේ‍්‍රල් 04 වැනිදා මානව හිමිකම් කොමිෂන් සභාව නිකුත් කරන ලද මාධ්‍ය නිවේදනයක් මගින් ජනතාවගෙන් මෙම අවස්ථාවේදී ජාති ආගම් භේදයකින් තොරව මුළු මානව වර්ගයාටම එල්ල වී ඇති මාරාන්තික අභියෝගයක් බව තේරුම් ගනිමින් ශිෂ්ට සම්පන්න සමාජයක් ලෙස කටයුතු කරන ලෙස ඉල්ලා ඇත.


ලංකාවේ මුස්ලිම් ජනතාවට එරෙහිව වෛරී ප‍්‍රකාශන වර්ධනය වීමේ ප‍්‍රවණතාවක් නිරීක්ෂණය කරනු ලබන බවද මානව හිමිකම් කොමිෂන් සභාව පෙන්වාදෙයි. එවැනි වෛරී ප‍්‍රකාශන තුළින් අප මුහුණපා ඇති ප‍්‍රබල සෞඛ්‍ය ප‍්‍රශ්නයට ජාතිවාදී තත්වයක් නිර්මාණය කර ඇති බවද පෙන්වාදෙයි. මෙම තත්වය නිසා අනිසි ප‍්‍රතිඵලවලට මුහුණදීමට සිදුවන බවද එයින් පෙන්වා තිබේ. වෛරසය පැතිරීම යම්කිසි ප‍්‍රජාවකට හෝ සමාජ පන්තියකට ලඝු කළ නොහැකි බවද පෙන්වාදී ඇත.


එම සම්පූර්ණ නිවේදනය මෙසේය.
‘ශ‍්‍රී ලංකාව තුළ වෙසෙන අප සහෝදර ජනතාව පමණක් නොව ලොව පුරා වෙසෙන ජනතාවද මේ මොහොතේදී ඉතාම දැවැන්ත අර්බුදයකට මුහුණ පා සිටිති. බොහෝ විචාරකයන්ගේ මතය වන්නේ දෙවෙනි ලෝක සංග‍්‍රාමයෙන් පසුව මානව වර්ගයා මුහුණදුන් ප‍්‍රබලතම අභියෝගය කොවිඞ්-19 අධි-වසංගතය හේතුවෙන් පැන නැගී ඇති බවයි. එනමුත් දෙවෙනි ලෝක යුද්ධය මෙන් නොව මෙම අධි-වසංගත අභියෝගය ජයගත හැකි වන්නේ සාමාන්‍ය පුරවැසියන්ගේ අධිෂ්ඨාන ශක්තිය සහ ස්වයං පාලනයට ඇති හැකියාව තුළින් බව අපි මතක් කොට සිටිමු.


වෙනත් සෑම අවස්ථාවකදීම මෙන් දැනුදු අපගේ සෞඛ්‍ය ඇතුළු සියලූ මානව අයිතිවාසිකම් ඉහළ මට්ටමකින් භුක්ති විඳීම සඳහා පුරවැසියන් වශයෙන් අප වෙත පැවරී ඇති යුතුකම්ද මැනැවින් ඉටු කළ යුතුමය. මෙම තීරණාත්මක අවස්ථාවේදී මානව හිමිකම් කොමිෂන් සභාව අපගේ සහෝදර ජනතාව වෙත ඉදිරිපත් කරන බලවත් ආයාචනය වන්නේ තමන්ගේ සෞඛ්‍ය ආරක්ෂා කරගැනීමටත්, එමෙන්ම අනෙක් සියලූ සහෝදර ජනතාවගේ සෞඛ්‍ය ආරක්ෂා කරගැනීමටත් වගකීමෙන් සහ ගෞරවාන්විත ලෙස කටයුතු කළ යුතු බවයි. දිවා ? නොතකා අප සියලූදෙනා වෙනුවෙන් වෙහෙසෙන සියලූම බලධාරීන්ටත්, විශේෂයෙන්ම සෞඛ්‍ය ක්ෂේත‍්‍රයේ නියැලී සිටින නිලධාරී මහත්ම මහත්මීන්ටත්, මෙම කොමිෂන් සභාව සිය හෘදයංගම ප‍්‍රණාමය මෙම අවස්ථාවේ පුද කරනු ලබන අතර ඔවුන්ගේ එම ප‍්‍රයත්නයන් සාර්ථක කරගැනීම සඳහා අපගේ පූර්ණ සහයෝගය ලබා දීමට අප කැපවිය යුතු බව අවධාරණය කර සිටිමු.


දැනට උද්ගතවී ඇති අපහසු වාතාවරණය තවදුරටත් තීව‍්‍ර කරමින් පසුගිය දින කිහිපය පුරා සමාජ මාධ්‍ය ඔස්සේ මෙන්ම ප‍්‍රධාන ප‍්‍රවාහයේ මාධ්‍ය විකාශන තුළින්ද ලංකාවේ මුස්ලිම් ජනතාවට එරෙහිව වෛරී ප‍්‍රකාශන වර්ධනය වීමේ පැහැදිළි ප‍්‍රවණතාවයක් අප විසින් නිරීක්ෂණය කරනු ලැබේ. මෙම වෛරී ප‍්‍රකාශයන්ගේ හරය ලෙස නිරීක්ෂණය වන්නේ මුස්ලිම් ප‍්‍රජාවේ ක‍්‍රියාකලාප තුළින් කොවිඞ්-19 වෛරසය පැතිරීමට වැඩි ඉඩකඩ සැලසී ඇති බවයි. මෙවැනි වෛරී ප‍්‍රකාශන තුළින් දැනට අප මුහුණපා ඇති ප‍්‍රබල සෞඛ්‍ය තත්වයට ජාතිවාදී මුහුණුවරක් නිර්මාණය කිරීමක් සිදුවන බව පැහැදිලි වේ. මෙම ප‍්‍රයත්නවල මූලික අරමුණ හා පසුබිම කුමක් වුවද ඒවායේ ප‍්‍රතිඵල ඉතාමත්ම අනිසි ඵල විපාක ගෙන දීමට සමත් විය හැක. මෙය පෙර අත්දැකීම්වලින් හඳුනාගෙන ඇත්තෙමු.


මෙම අධි- වසංගතය ජාති කුල ආගම් හෝ වෙනත් භේදයකින් තොරව මුළු මානව වර්ගයාටම එල්ල වී ඇති මාරාන්තික අභියෝගයකි. මෙහිදී වෙනත් රටවල මෙන්ම ශ‍්‍රී ලංකාවේද අත්දැකීම වන්නේ වෛරසය පැතිරෙන ආකාරය යම්කිසි ප‍්‍රජාවකට හෝ සමාජ පන්තියකට ලඝු කළ නොහැකි බවයි. ඒ නිසා මෙවැනි අභියෝගාත්මක අවස්ථාවකදී ශිෂ්ට සම්පන්න සමාජයක් ලෙස අප කළ යුතු වන්නේ සියලූ පුරවැසියන් එක්සත් වී මෙම වසංගතය සාමූහිකව පරාජය කිරීමට වගකීමෙන් කටයුතු කිරීම වේ. අපගේ ශිෂ්ට සම්පන්න බව සහ පුරවැසිභාවයේ ගැඹුර අප මෙවැනි අවස්ථාවකදී හැසිරෙන ආකාරයෙන් මැනවින් අවබෝධ කරගත හැකි බව අප පිළිගත යුතු වේ.


එහෙයින් රටේ මානව හිමිකම් කොමිෂන් සභාව ලෙස අපගේ සහෝදර ජනතාවගෙන් අප කාරුණිකව ඉල්ලා සිටින්නේ දැනට ඉස්මතු වී ඇති බැ?රුම් තත්වය හොඳින් අවබෝධ කරගෙන එම අභියෝගය සාමූහික විසඳුම් තුළින් ජය ගැනීමට කටයුතු කිරීම අපගේ එකම අධිෂ්ඨානය බවට පත්කරගත යුතු බවද, වගකීම් විරහිතව කටයුතු කරන වර්ගවාදී හෝ ආගම්වාදී අර්බුදයකට සමාජය ලක් කිරීමෙන් වැළකිය යුතු බවත්ය.
එමෙන්ම, මේ අවස්ථාවේදී අප මහජන නියෝජිතයන්ගෙන්, රාජ්‍ය නිලධාරීන්ගෙන් හා සියලූම මාධ්‍ය ආයතනවලින් වෛරී ප‍්‍රකාශන කිරීමෙන් හා විකාශය කිරීමෙන් වැළකී සිටින මෙන් ඉල්ලා සිටිමු. විශේෂයෙන්ම වෛරසය ආසාදනය වූ පුද්ගලයන් හෝ රෝගීන් වාර්ගික හෝ ආගමික පදනම මත හඳුන්වාදීම කිසිසේත්ම නොකළ යුතු බැව් අපි තරයේ අවධාරණය කරන්නෙමු.


තම ජීවිතය පරදුවට තබා දැඩි කැපවීමෙන් අප සියලූදෙනා වෙනුවෙන් කටයුතු කරන නිලධාරීන් වෙත අප විසින් පුද කළ හැකි ඉහළම ගෞරවය සහ කෘතගුණ සැලකීම වන්නේ ඉහත පරිදි අපගේ වගකීම් ඉටු කිරීමෙන් බව අප විසින් නිරන්තරයෙන් සිහිපත් කළ යුතු වේ.’