මන්නාරම් දිස්ත‍්‍රික්කයේ සිවිල් ක‍්‍රියාකාරික : මුජුබර් රහුමාන්

මන්නාරම ප‍්‍රදේශයේ යුද්ධයෙන් අවතැන්වූවන්ගේ ප‍්‍රශ්න විසඳිලාද?

යුද්ධයෙන් අවතැන්වූවන්ගේ ඉඩම් ප‍්‍රශ්න තවම විසඳිලා නැහැ. මන්නාරමේ ඉඳලා අවතැන් වෙලා ගිහින් පුත්තලමේ ජීවත් වුණු මුස්ලිම් ජාතිකයන්ගේ ප‍්‍රශ්න තවමත් තියෙනවා. ඉදිරියට එන්නේ ඡුන්ද කාලයක් නිසා අපි මේ ගැන ප‍්‍රධාන වශයෙන්ම කතා කරන්න  ඕනෑ. මන්නාරමේ ඉඳලා අවතැන් වෙලා පුත්තලමට ගිය පවුල්වලින් සීයයට 55ක් විතර තවම ඉන්නේ පුත්තලමේ. පුත්තලමේ ජීවත් වෙන මිනිස්සු තමන්ගේ ඡුන්දය භාවිත කරනවා නම් මන්නාරමට එන්න  ඕනෑ. ජනාධිපතිවරණයේදී ඡුන්දය භාවිත කරන්න පුත්තලමේ ඉඳලා ආපු මිනිසුන්ට තන්තිරිමලේදී පහරදීලා තිබුණා. දැන් තමන්ගේ ඡුන්දය භාවිත කිරීමට පුත්තලමේ ඉඳලා මන්නාරම නගරයට පැමිණීම ජනතාවට අවදානම්සහගත කාර්යක් වෙලා. මේ ප‍්‍රශ්නයට රජය කිසිම මැදිහත් වීමක් කරලා නැහැ. පුත්තලමේ ඡුන්ද මධ්‍යස්ථානයක් පවත්වන බවට මැතිවරණ කොමිෂන් සභාවෙන් දැනුම් දීමක් කරලා තිබුණා. එහෙත් මේ වෙන තෙක් ඒ බව නීත්‍යනුකූලව දන්වලා නැහැ.

අවතැන් වූ අයට ඉඩම් නොදුන් තැන් තියෙනවා නේද?

යුද්ධය වෙලාවේ අතහැරලා ගිය මිනිස්සුන්ගේ ඉඩම් යුද හමුදාව සහ නාවික හමුදාව යටතේ තියෙනවා. ඒ ඉඩම්වල හමුදා කඳවුරු හදලා. යුද්ධය නිමා වෙලා අවුරුදු 10ක් ගතවෙලා තියෙද්දීත් අවතැන් වු අයට තමන්ගේ ඉඩම් ලැබිලා නැහැ. දකුණේ අය කියන්නේ දැන් බලයට පත්වෙලා ඉන්නේ ආරක්ෂාව සම්බන්ධයෙන් වගකියන ආණ්ඩුවක්. ඒ නිසා රටේ කවුරුත් ආරක්ෂාව සම්න්ධයෙන් බය වෙන්න  ඕනෑ නැහැ කියලා. මේ ආණ්ඩුව මේ තරම් ආරක්ෂාවට වගකියනවා නම් ඇයි මේ තරම් යුද හමුදා කඳවුරු දාලා තියෙන්නේ. අසරණ මිනිසුන්ට ඒ අයගේ ඉඩම් ලබා දෙන්න පුළුවන්නේ. ඒ මිනිස්සු තමන්ගේ ඉඩම්වල පදිංචි වෙලා. මේ රජයට මල් තියලා වඳීවි.

මන්නාරමේ ගොවීන්ට ගොවිතැන් කිරීම අසීරුද?

ගොවිතැන් කරන්න වතුර නැතිවීම නම් සෑහෙන්න බලපානවා. වතුර  ප‍්‍රශ්නය අපි උතුරේ දේශපාලන නායකයෝ එක්ක කතා කළා. ඒ අය ඉන්පස්සේ අපිට ගොවිතැන් කරන්න වතුර ලබා දෙන්න ක‍්‍රමයක් හදන්නම් කියලා පොරොන්දු වුණා. මල්වතු ඔයෙන් අපිට වතුර ලබා දෙන්න ව්‍යාපෘතියක් ආරම්භ කළා.  මල්වතු ඔයෙන් තන්තිරිමලය හරහා ගලාගෙන එන වතුර මන්දගාමී කරලා. ඒ වතුර ගලා ගෙන එන්න තවත් වැවක් හදලා ඒ වැවෙන් මන්නාරමේ ගොවීන්ට වතුර ලබා දෙන්න තමයි මේ ව්‍යාපෘතියෙන් සැලසුම් කරලා තිබුණේ. ජනාධිපතිවරණයට කලින් රනිල් වික‍්‍රමසිංහ සහ මෛත‍්‍රිපාල සිරිසේන මහත්වරුන් ඇවිත් ඒ ව්‍යාපෘතියට මුල්ගල තිබ්බා. නමුත් මේ වෙන කොට ඒ ව්‍යාපෘතිය නැවතිලා.

පානීය ජලය පහසුකම් තියෙනවාද?

මන්නාරමේ මිනිස්සුන්ට බොන වතුර සම්බන්ධයෙන් විශාල ගැටලූවක් තියෙනවා. උණුසුම වැඩි නිසා ආණ්ඩුවෙන් කියන්නේ මේ කාලේ හොඳට වතුර බොන්න කියලා. මන්නාරම ලංකාවේ උණුසුම වැඩිම ප‍්‍රදේශයක්. එහෙත් අපට බොන්න වතුර ලැබෙන්නේ ඉතා සීමීත විදියට බවුසර්වලින්. අවශ්‍ය ප‍්‍රමාණයට බොන්න වතුර නැතිව අපි පීඩා විඳිනවා. ප‍්‍රදේශීය සභාවෙන් දවසකට එක පවුලකට වතුර ලීටර් 20ක් වගේ ප‍්‍රමාණයක් තමයි බෙදන්නේ. සාමාජිකයන් වැඩි පවුලකට නම් මේ වතුර ලීටර් 20 මදි. පානීය ජලය විකුණන තැන් තියෙනවා. එහෙත් සාමාන්‍ය දුප්පත් මිනිසුන්ට සල්ලි දීලා වතුර ගන්න තරම් වත්කමක් නැහැ. ඒ නිසා මිනිසුන් සෑහෙන්න අසරණ වෙනවා.

ධීවර වෘත්තියට පහසුකම් කොහොමද?

මන්නාරමේ ජීවත්වෙන ධීවරයන්ට තියෙන ප‍්‍රධාන ප‍්‍රශ්නය තමයි ඉන්දියාවේ ධීවරයන් මන්නාරම් මුහුදට ඇවිත් මාළු ඇල්ලීම. ඉන්දියාවේ ධීවරයන් එන්නේ ට්‍රෝලර් යාත‍්‍රාවලින්. ඉන්දියාවෙන් මන්නාරමේ මුහුදේ මාළු අල්ලන ධිවරයෝ පොඩි මාළු පැටවුනුත් අල්ලාගෙන යනවා. අනෙක් එක අපේ ධීවරයන්ගේ දැල් කපලා දාලා යන්නේ. මේ විදියේ සිදුවීම් හැමදාම වාර්තා වෙනවා. හැමදාම ඉන්දීය ධීවරයෝ ඇවිත් මන්නාරමේ මාළු අල්ලනවා. නමුත් අත්අඩංගුවට ගන්නේ ඉතා සුළු ප‍්‍රමාණයක්. කිසිම ආණ්ඩුවකින් මේ ඉන්දීය ධීවරයන් මන්නාරම් මුහුදට පැමිණීම සම්බන්ධයෙන් කිසිම පියවරක් ගත්තේ නැති බව කියන්න සිද්ධවෙනවා. මන්නාරමේ ධීවරයෝ ඉන්දිය ධීවරයන් නිසා සෑහෙන්න දුෂ්කරතාවට පත්වෙලා ඉන්නේ. ඒ නිසා රජය මැදිහත් වෙලා මේ ප‍්‍රශ්නයට ඉක්මනින් විසඳුමක් ලබා දෙන්න  ඕනෑ. මේ තරම් ආරක්ෂාවක් තිබිලාත් ඉන්දීය ධීවරයෝ අපේ මුහුදට ඇවිත් අපේ මාළු ටික අල්ලාගෙන ඉන්දියාවට යනවා. ඇයි මෙහෙම වෙන්නේ කියලා අපිට හිතා ගන්න බැහැ.

උතුරු පළාතේ හමුදා සෝදිසි මාර්ග බාධක වැඩිවෙලාද?

මේ වන විට උතුරේ හැමතැනම හමුදාවෙන් සහ පොලීසියෙන් සෝදිසි මාර්ග බාධක දාලා. ඒ අතරින්  මන්නාරමේ මාර්ග බාධක වැඩියෙන් තියෙනවා. ඒ සෝදිසි බාධක දාන්න හේතුවක් විදියට ඒ අය කියන්නේ මන්නාරමෙන් ලංකාවට මත්කුඩු ගෙන්වන බව. ඒ නිසා මේ විදියට සෝදිසි බාධක දාලා තියෙනවාලූ. ලංකාවේ අනෙක් මුහුදු ප‍්‍රදේශවලිනුත් මත්කුඩු අල්ලනවා. මන්නාරමට විතරක් විශේෂයෙන් සෝදිසි බාධක දාලා සෝදිසි කරන්නේ ඇයිද කියා අපැහැදිලියි. පාස්කු  ප‍්‍රහාරයෙන් පසුව කාලයක් යන තුරු මන්නාරමේ සෝදිසි බාධක දැම්මා. නමුත් ටික කාලයකින් ඒ සියල්ලම ඉවත් කළා. ප‍්‍රහාරයෙන් පසුව කළ පරීක්ෂා කිරීම්වලින් පසුව ප‍්‍රදේශයේ විශාල සෝදිසි මෙහෙයුම්  ඕනෑ වුණේ නැහැ. එහෙත් ජනාධිපතිවරණයෙන් පස්සේ නැවත සෝදිසි මාර්ග බාධක දාලා තියෙනවා. දැන් දැඩි සෝදිසි කිරීම් සිද්ධවෙනවා. ඊට අමතරව හිටපු ගමන් ජංගම සෝදිසි මෙහෙයුම් කරනවා. මොනවා හොයනවාද කියලා අපි දන්නේ නැහැ. සෝදිසි කරන අය අපෙන් අහනවා මුස්ලිම් අය ඉන්නවාද, දෙමළ අය ඉන්නවාද කියලා. අපි දන්නේ නැහැ එහෙම දෙමළ, මුස්ලිම් අය ගැන විශේෂයෙන් සෙවීමෙන් බලාපොරොත්තු වෙන්නේ මොනවාද කියලා.x