ඉතා ඉක්මනින් එක්සත් ජාතික පක්ෂයේ නායකත්වය සජිත් පේ‍්‍රමදාස මහතාට නොදෙන්නේ නම් ඔහු සහ ඔහුගේ හිතවාදී මන්ත‍්‍රී කණ්ඩායම නව පක්ෂයක් පිහිටුවා ගනිමින් ඉදිරි මහ මැතිවරණයට මුහුණ දෙන්නට සූදානම් බව දැනගන්නට ලැබේ.

පක්ෂයේ දැනට උද්ගත නායකත්ව අර්බුදය ඉක්මනින් විසඳා ගැනීම අරමුණෙන් ඉක්මන් කෘත්‍යාධිකාරී මණ්ඩල රැුස්වීමක් කැඳවන්න යැයි පසුගිය සතියේදී අජිත් පී පෙරේරා මන්ත‍්‍රීවරයා පක්ෂයේ මහා ලේකම් අකිල විරාජ් කාරියවසම් වෙත ලිපියක් යොමුකර තිබුණ අතර එම ලිපියට එජාපය නියෝජනය කරන කෘත්‍යාධිකාරී මණ්ඩල සාමාජිකයන් වන පාර්ලිමේන්තු මන්ත‍්‍රීවරුන් 24 දෙනෙක්ද පාර්ලිමේන්තු මන්ත‍්‍රීවරුන් නොවන කෘත්‍යාධිකාරී මණ්ඩල සමාජිකයින් 3 දෙනෙකුද අත්සන් තබා ඇත. එහෙත් මෙම ලිපියට පක්ෂ මහලේකම්වරයාගෙන් ප‍්‍රතිචාරයක් ලැබී නැත.

මේ අතර පසුගිය 17වැනි දා උදෑසන රෝයල් පාක් නිවාස සංකීර්ණයේ පිහිටි සජිත් පේ‍්‍රමදාස මහතාගේ නිවසේදී පේ‍්‍රමදාස මහතා සහ මන්ත‍්‍රීවරුන් 20 දෙනෙකු සහභාගි වූ සාකච්ඡුාවක් පවත්වා ඇත. එහිදී සෑම ආසනයකටම යමින් පක්ෂය තුළ උද්ගත වර්තමාන තත්ත්වය සහ එයට තමන්ගේ ප‍්‍රතිචාරය පිළිබඳව පාක්ෂිකයන් දැනුවත් කිරීමේ වැඩසටහනක් පිළිබඳව සාකච්ඡුා කර ඇත. මෙම හමුවට ලක්ෂ්මන් විජේමාන්න වැනි සජිත් පාර්ශ්වයේ නොවන මන්ත‍්‍රීවරුන්ද සහභාගිවී සිට ඇත.

මෙහිදී සජිත් පේ‍්‍රමදාස මහතා ප‍්‍රකාශ කර ඇත්තේ පක්ෂයේ නායකත්වය නොලැබෙන්නේ නම් අගමැති අපේක්ෂකත්වයද ප‍්‍රතික්ෂේප කර වෙනත් ක‍්‍රියාමාර්ගයකට අවතීර්ණ වෙන බවය. මෙම තත්ත්වය තුළ පක්ෂයේ නායකත්වය සජිත් පේ‍්‍රමදාස මහතාට ලබා නොදෙන්නේ නම් දේශපාලනයෙන් ඉවත්වෙන බව ප‍්‍රකාශ කළ හරීන් ප‍්‍රනාන්දු ඇතුළු පිරිසක් වෙනත් පක්ෂයක් සෑදීම පිළිබඳව සජිත් පේ‍්‍රමදාස මහතාට යෝජනා කර ඇති බව වාර්තා වේ.

අර්බුදය සාර්ථකව විසඳාගෙන එජාපය දෙකඩවීම වළක්වා ගැනීම සඳහා රංජිත් මද්දුමබණ්ඩාර මන්ත‍්‍රීවරයා සහ කබීර් හෂීම් මන්ත‍්‍රීවරයා විශාල වෙහෙසක් ගනිමින් ඇතැයි වාර්තා වේ.

රනිල් වික‍්‍රමසිංහ මහතා දෙසැම්බර් 20වැනි දින විදෙස් ගතවෙන බව වාර්තා වේ. ඒ අනුව ජනවාරි 3වෙනිදා නව පාර්ලිමේන්තු සභා වාරය ආරම්භ කරන අවස්ථාව වනවිට මෙම අර්බුදයට විසඳුමක් නොලැබෙනු ඇතැයි අනුමාන කෙරේ. කථානායක කරු ජයසූරිය සහ නවීන් දිසානායක ඇතුළු පිරිසක් ද මේ දිනවල විදෙස්ගතව සිටින බැවින් එජාපයේ මෙම අර්බුදය තව තවත් දිග්ගැස්සෙන තත්ත්වයක් උද්ගතවී ඇති බව ආරංචි මාර්ග පවසයි.