කොළඹ නගර සභාව වසංගත තත්වයට මුහුණදෙන දිළිඳු පවුල් සඳහා එක් රුපියල් 2500ක වටිනාකමින් යුත් අත්‍යවශ්‍ය ද්‍රව්‍ය පැකට් 50,000ක් බෙදීම ආරම්භ කර ඇත. සම්පූර්ණ ව්‍යාපෘතිය සඳහා වෙන්කර ඇති මුදල රුපියල් ලක්ෂ 1200කි.


කොළඹ නගරයේ ජීවත්වන පුද්ගලයන් පවතින වසංගත තත්වය නිසා විශාල අර්බුදයකට මුහුණදී ඇත. කුඩා නිවාසවල ජීවත්වන නාගරික දිළිඳු ජනයා මෙන්ම එදිනෙදා වැටුපක් ලබන රැුකියා කරන විශාල පිරිසක්ද ඇත. ඒ රැකියා ත‍්‍රීවීලර් පැදවීම, පදික වෙළෙන්දන් ලෙස කටයුතු කිරීම, කුඩා වෙළඳසැල්වල සේවය කිරීම, කුලී රැුකියා සහ ලිංගික ශ‍්‍රමික රැුකියා දක්වා විශාල පරාසයක විහිදෙයි. ලක්ෂ ගණනක් වන මේ සම්පූර්ණ ප‍්‍රජාවට කාර්යක්ෂමව ආධාර ලබාදීමේ වැඩපිළිවෙළක් ක‍්‍රියාත්මක විය යුතුය. එම ක‍්‍රියාවලිය එක් යාන්ත‍්‍රණයක් ලෙස ක‍්‍රියාත්මක වීමත්, එම ක‍්‍රියාවලියෙන් සැබෑ ලෙසම දිළිඳු පවුල්වලට ආධාර ලැබීමත් වැදගත්ය.


කෙසේ වෙතත් අප ඉහත සඳහන් කළ නගර සභාවේ භාණ්ඩ බෙදාදීමේ වැඩසටහන වෙනම ක‍්‍රියාත්මක වන අතර, දිස්ත‍්‍රික් ලේකම් කාර්යාලයෙන් තවත් වැඩසටහනක් ක‍්‍රියාත්මක වෙයි.


මේ අතර නගර සභාවෙන් බෙදා දෙන ලක්ෂ 1200ක බඩු තොගය බෙදාදීමේ කටයුත්තට කොළඹ නගර සභාවේ නාගරික මන්ත‍්‍රීවරුන් මැදිහත්වීම නිසා සැබෑ දිළිඳු පවුල් වෙනුවට දේශපාලන හිතවතුන් වෙත ආධාර ලබාදෙන තත්වයක්ද ඇතිව තිබේ. කොළඹ නාගරික මන්ත‍්‍රීවරුන් 119 දෙනෙකු සිටින අතර එම මන්ත‍්‍රීවරුන්ගේ මැදිහත්වීම ඉහත කී දැවැන්ත වටිනාකමකින් යුත් ආධාර තොගය බෙදාදීමේ කටයුත්ත දුර්වල කිරීමට හේතු වී තිබේ.


මේ අතර භාණ්ඩ බෙදාදීමේ කටයුත්තට දායක වී සිටින නගර සභාවේ සහන නිලධාරීන්, තමාට කොවිඞ්-19 රෝගය වැළඳීමේ අවදානමක් ඇති බව කියමින් අපේ‍්‍රල් 03 වැනිදා භාණ්ඩ බෙදාදීමේ කටයුතුවලින් ඉවත් වෙන බව ප‍්‍රකාශ කර ඇත.
මෙම තත්වය පිළිබඳව කළ විමසීමකදී කොළඹ නාගරික කොමසාරිස් නීතිඥ රොෂානි දිසානායක මෙසේ පැවසුවාය.


‘කොළඹ නගර සීමාවේ සිටින දිළිඳු පවුල් සංඛ්‍යාව 160,000ක් පමණ වෙනවා. එහෙත් එම පවුල් සියල්ලටම ආධාර ලබාදීමට වියදම් කරන්නට මුදල් නගර සභාව සතුව නැහැ. ඒ නිසා ආධාර අත්‍යවශ්‍ය වන පවුල් 50,000කට භාණ්ඩ ලබාදීමට තීරණය කළා. එක් භාණ්ඩ පැකට්ටුවකට ඇස්තමේන්තුගත සිල්ලර වටිනාකම රුපියල් 2500ක්. සම්පූර්ණ වියදම ඇස්තමේන්තුව අනුව ලක්ෂ 1200ක්.


එම භාණ්ඩ බෙදාදීම සඳහා සුදුසු පවුල් තෝරාගැනීමට අවශ්‍ය සංඛ්‍යාලේඛන නගර සභාව සතුව නැහැ. සැබෑ ලෙසම ආධාර අවශ්‍ය වන දිළිඳු පවුල් මොනවාද කියලා හඳුනාගැනීමට හරිහැටි දත්ත තිබුණේ නැහැ. එය නගර සභාවේ අදාල අංශවල දුර්වලතාවක්.


ඒ අනුව ආධාර ලැබිය යුත්තේ කාටද කියලා තීන්දු කිරීමට නාගරික මන්ත‍්‍රීවරුන්ගේ උදව් ලබාගත්තා. ඔවුන් ලැයිස්තු සකස් කළා. අපි කමිටුවක් මගින් එම ලැයිස්තු අනුමත කළා. ඉන්පසුව අපේ සහන නිලධාරීන්, ගුවන් හමුදාවේ නිලධාරීන් හා යුද හමුදා නිලධාරීන් එක්වෙලා භාණ්ඩ බෙදන්න පටන්ගත්තා. නාගරික මන්ත‍්‍රීවරුන් භාණ්ඩ බෙදාදීමට මැදිහත් වෙන්නේ නැහැ.


එහෙත් මේ අතර සහන නිලධාරීන් පිරිසක් භාණ්ඩ බෙදාදීමේ ක‍්‍රියාවලියට සහභාගි වෙන්න බැරි බව කීවා. ඒ නිසා අපේ‍්‍රල් 03 වැනිදා වැඬේ මඳක් අඩපණ වුණා. එහෙත් ඔවුන් මේ මොහොතේ ජනතාවට සහන සැලසීම සඳහා සේවය කළ යුතු නිලධාරීන්. ඒ නිසා මම එයට මැදිහත් වුණා. විනය ක‍්‍රියාමාර්ග පවා ගත්තා. දැන් ඒ ගැටලූව විසඳිලා. අපේ‍්‍රල් 04 වැනිදා වන විට භාණ්ඩ බෙදාදීමේ ක‍්‍රියාවලිය නැවත ආරම්භ වෙලා.
අපි දන්නවා කොළඹ නගරයේ සිටින සියලූ දුප්පත් අයට මේ භාණ්ඩ බෙදාදීමේ ක‍්‍රියාවලිය ප‍්‍රමාණවත් නැති බව. දැනට දිස්ත‍්‍රික් ලේකම් කාර්යාලයෙනුත් වැඩසටහනක් ක‍්‍රියාත්මක වෙනවා. මේ අතර මම ජනාධිපති කාර්ය සාධක බලකායෙන් ලිඛිත ඉල්ලීමක් කළා, කොළඹ නගරයේ සිටින දිළිඳු පවුල් සහ එදිනෙදා වැටුප්වලින් යැපෙන පවුල් ගැන විශේෂ ක‍්‍රියාමාර්ගයක් ගන්න කියලා.’


කෙසේ වෙතත්, නාගරික කොමසාරිස්වරියගේ අනුදැනුම ඇතිව හෝ නැතිව භාණ්ඩ බෙදාදීමේ ක‍්‍රියාවලියට කොළඹ නාගරික මන්ත‍්‍රීවරුන් මැදිහත්ව ඇති බවත්, ඔවුන් තම හිතවතුන් වෙත භාණ්ඩ ලබාදෙන බවත් අනිද්දා සංස්කාරක මණ්ඩල සාමාජිකයන් නිරීක්ෂණය කළ කාරණයකි.


එමෙන්ම සියළු ආයතන නිසි කළමණාකරණයකින් තොරව, විවිධ තැන්වල විවිධාකාරයෙන් බඩු බෙදාදීම පවතින තත්වයට සැබෑ විසඳුම නොවන බවත්, ජාතික මට්ටමෙන් එක් සහන ලබාදීමේ වැඩපිළිවෙලක් ක‍්‍රියාත්මක විය යුතු බවත් පැහැදිළිව පෙනෙන කාරණයකි.