ත්‍රස්තවාදය වැළැක්වීමේ පනත යටතේ රෙගුලාසි නිකුත් කිරීමට ආරක්ෂක විෂයභාර අමාත්‍යවරයෙකු නොමැති හෙයින් ආණ්ඩුක්‍රම ව්‍යවස්ථාවේ 4(ආ) ව්‍යවස්ථාව යටතේ ජනාධිපතිවරයාට එම රෙගුලාසි නිකුත් කළ හැකි බව නීතිපතිවරයා උපදෙස් දී ඇතැයි වාර්තා වේ.

නීතිපතිවරයා එම උපදෙස් දී ඇත්තේ ආරක්ෂක අමාත්‍යාංශ ලේකම් කමල් ගුණරත්නටය. ඒ ත්‍රස්තවාදය වැළැක්වීමේ පනත යටතේ අත්අඩංගුවට ගත් පුද්ගලයන් පුනරුත්ථාපන කිරීමේ බලතල පුනරුත්ථාපන කොමසාරිස් ජෙනරාල්වරයාට පැවරීම සම්බන්ධයෙන් නීතිපතිවරයාට යොමුකරන ලද රෙගුලාසි ගැන ප්‍රතිචාර දක්වමින්ය.

ආණ්ඩුක්‍රම ව්‍යවස්ථාවේ 4(ආ) ව්‍යවස්ථාවේ ඒ ගැන සඳහන් වන්නේ මේ ආකාරයටය. ‘රටේ ආරක්ෂාව ඇතුළුව ජනතාවගේ විධායක බලය ජනතාව විසින් තෝරාපත්කරගනු ලබන ජනරජයේ ජනාධිපතිවරයා විසින් ක්‍රියාත්මක කළ යුත්තේය.’

නීතිපතිවරයා එම උපදෙස් ලබාදීමට හේතුවී ඇත්තේ රට තුළ ආරක්ෂක විෂයභාර අමාත්‍යවරයෙකු නොසිටීමත්, ත්‍රස්තවාදය වැළැක්වීමේ පනත යටතේ රෙගුලාසි පැනවිය හැක්කේ ආරක්ෂක විෂයභාර අමාත්‍යවරයාට පමණක් වීමත් නිසාය.

ආරක්ෂක අමාත්‍යාංශයෙනුත් යොමු කර තිබූ එම රෙගුලාසිවලට නීතිපතිවරයා සංශෝධන සිදුකරනු ලැබූ බව නීතිපති දෙපාර්තමේන්තුවේ නිලධාරිනියක් අනිද්දා කළ විමසීමකදී පැවසුවාය.

දැනගන්නට ලැබෙන පරිදි නීතිපතිවරයා සංශෝධනයට ලක් කළ එම රෙගුලාසි මේ වනවිට නීති කෙටුම්පත් දෙපාර්තමේන්තුවේ අධීක්ෂණ සඳහා යොමුකර තිබේ.

පාස්කු ඉරිදා ප්‍රහාරය සම්බන්ධයෙන් ත්‍රස්තවාදය වැළැක්විමේ පනත යටතේ අත්අඩංගුවට ගත් බරපතල චෝදනා නොමැති පුද්ගලයින් පුනරුත්ථාපන කඳවුරුවලට යොමුකිරීමට බව පවසමින් මෙම රෙගුලාසි ගෙනඒමට නියමිතය.

පුනරුත්ථාපන කටයුතු සඳහා විශේෂ රෙගුලාසි අවශ්‍යද යන්න පිළිබඳ අනිද්දා කළ විමසීමකදී නිර්නාමිකව පෙනී සිටීමට කැමති ජ්‍යෙෂ්ඨ නීතිඥයෙකු පැවසුවේ එල්ටීටීඊ යුද්ධයේදී අත්අඩංගුවට ගත් හා බාර වූ පුද්ගලයන් පුනරුත්ථාපනය කළේ විශේෂ රෙගුලාසියක් නොමැතිව බවය.