”අයියප්පන් කෝවිල වදින්න යන්න කලින් දින 55ක් පේවෙන්න ඕනෑ. තපස් ජීවිතයක් ගත කරන්න ඕනෑ. කළු ඇදුම් ඇඳගෙන ඉන්න ඕනෑ. පාවහන් දැමීමෙන් වැළකී ඉන්න ඕනෑ.” හලාවත ප‍්‍රාදේශීය සභාවේ එජාප මන්ත‍්‍රීවරයෙකු වන කෝකිලනාත් සිං ජෙයනන්ද සිං මහතා මෙලෙස පැහැදිලි කළේ හින්දු ආගමික චාරිත‍්‍රයක් පිළිබඳවය.


ඔහු ඉහත කී චාරිත‍්‍රයට අනුව කළු හැඳ දෙසැම්බර් මස 12 වෙනි දින පැවැති හලාවත ප‍්‍රාදේශීය සභා රැුස්වීමට පැමිණ තිබුණි. ඒ මොහොතේ ඔහුට සභාවේ රැුඳී නොසිටින ලෙස කියමින් විරෝධතා එල්ලවී තිබුණි. එය තමන්ගේ ආගමික නිදහසට බාධාවක් එල්ලවීමක් බව කෝකිලනාත් සිං මහතා පෙන්වාදෙයි.


ඔහු පවසන පරිදි ඔහුට විරෝධතාව දක්වා ඇත්තේ ශ‍්‍රී ලංකා පොදුජන පෙරමුණේ මන්ත‍්‍රීවරයෙකු විසිනි. පසුගිය වසරේ මෙම කාලයේදීද තමන් අයියප්පන් කෝවිල වන්දනාමාන කරන්නට ගිය බවත්, ඒ වෙනුවෙන් පසුගිය වසරේ කළු වස්ත‍්‍රයෙන් පැමිණි තමන්ට කිසිදු විරෝධතාවක් එල්ල නොවූ බවත් ඔහු පවසයි. මෙවර විරෝධතාවක් සිදු වූයේ දේශපාලන බලපෑමක් හේතුවෙන් බව ජෙයනන්ද සිං මහතා වැඩිදුරටත් පවසන්නේය.


ඔහු හලාවත මුන්නේශ්වරම ශ‍්‍රී ඊශ්වර දේවාලයේ ගිනි පෑගීමේ පූජාවේ ප‍්‍රධානියා වශයෙන්ද කටයුතු කරන්නෙකි. දකුණු ඉන්දියාවේ කේරළ ප‍්‍රාන්තයේ පිහිටි සබරිමලේ අයියප්පන් දේවාලයේ වාර්ෂික මංගල්‍යයට වසර 14ක පමණ කාලයක සිට කණ්ඩායමක් සමග වන්දනාමාන කිරීමට තමන් යන බව ඔහු කීය. ඒ අනුව එම කාලසීමාවේදී ප‍්‍රාදේශීය සභා රැුස්වීම්වලට ඔහු සහභාගී වී තිබුණේ කළු ඇඳුමෙන්ය. එහෙත් සාමාන්‍ය දිනවලදී ඔහු සම්ප‍්‍රදායට අනුකූල ඇඳුමෙන් සැරසී ප‍්‍රාදේශීය සභා රැුස්වීම්වලට සහභාගි වෙයි.


මීළඟ සභාවාරය පැවැත්වෙන්නේ ජනවාරි මස 12 බවත් එදිනට සාමාන්‍ය ඇඳු1මෙන් සභා රැුස්වීමට සහභාගි වන බවත් ඔහු පැහැදිලි කළේය. උපවාසය ආරම්භ කරනු ලැබ ඇත්තේ නොවැම්බර් මස 15 වෙනි දින බැවින් ජනවාරි 12 වෙනි දිනට පෙර දින 55 සපිරෙන නිසා ඔහු සාමාන්‍ය ඇඳුමෙන් සභාවට යන බව වටහා ගත හැකිය.


මෙම සිදුවීම පිළිබඳව හලාවත ප‍්‍රාදේශීය සභාවේ සභාපති සරත් ද සිල්වාගෙන් විමසූ විට ඔහු පැවසුවේ කෝකිලනාත් සිං ජෙයනන්ද සිං මන්ත‍්‍රීවරයාට පොදුජන පෙරමුණේ මන්ත‍්‍රීවරයෙකු විරෝධතා සිදු කළේ නව ආණ්ඩුව පත් වී රැුස්වුණ පළමු සභා රැුස්වීමේ නිසා එයට විරෝධය පෑමට මෙසේ කළු ඇඳුමෙන් පැමිණියා යැයි සිතූ නිසා බැවින් බවය.


පසුගිය වසරේ මේ අයුරින් කළු ඇදගෙන පැමිණි බවක් මතක නැතැයි සභාපතිවරයා පවසයි. තවද ප‍්‍රාදේශීය සභා රැුස්වීමකට සහභාගි වීමේදී ඇඳිය යුතු නිල ඇඳුමක් පිළිබඳව රීතියක් නොමැති වුවද සාමාන්‍ය සම්ප‍්‍රදාය පරිදි සුදු හෝ ළා පැහැති ඇඳුමකින් පැමිණ සහභාගි විය යුතු බව ඔහු පවසයි. ඔහු වැඩිදුරටත් පවසන්නේ කෝකිලනාත් සිං ජෙයනන්ද සිං මන්ත‍්‍රීවරයා ඔහුගේ ආගමික වතාවන් පිළිබඳව පැහැදිලි කිරීමක් සිදු කළා නම් විරෝධතා මතු නොවන බවයි. ඒ බව වැඩිදුර පැහැදිලි කිරීමක් සිදු නොකර ඔහු සභාවෙන් පිට වී ගිය බවද මෙම විරෝධය සිදු වූයේ නොදැනුවත්කම හා කලබලකාරීත්වය අනුව එම මන්ත‍්‍රීවරයා කටයුතු කළ ආකාරය අනුව බවද ඔහු වැඩිදුරටත් පැවසීය.

කෙසේ වෙතත් සභා රැුස්වීම්වලට සහභාගීවීමට නියමිත නිල ඇඳුමක් පිළිබඳව නීතියක් නැති බැවින් ඔවුනොවුන්ගේ ආගමික හේතූන් මත ඔවුනට අවශ්‍ය ඇඳුමකින් සැරසී සිටීමේ අයිතිය අනිවාර්යයෙන් ම තිබිය යුතුය. එය අපක්ෂපාතීව, කිසිදු ජාති භේදයකින් තොරව සිදු විය යුතුය.


ශ‍්‍රී ලංකාවේ පාර්ලිමේන්තුවේදී අඳින්නට සම්ප‍්‍රදායානුකූල ඇඳුම් කිහිපයක් ඇත. බටහිර ඇඳුම, ජාතික ඇඳුම, සාරිය ආදි ඇඳුම් ඒ අතර වෙයි. එහෙත් එම සම්ප‍්‍රදායානුකූල ඇඳුම්වලට පිටින් පසුගිය දශක දෙකක කාලයක් තිස්සේ බෞද්ධ හිමිවරු චීවරය හැඳ පාර්ලිමේන්තුවට පැමිණෙති. එය එම හිමිවරුන්ගේ ආගමික අයිතියක් ලෙස සැලකීමෙහි වරදක් නැත.


එහෙත් අනෙකුත් ආගම් අදහන පුද්ගලයන්ට ද එම අයිතිය තිබිය යුතුය. මේ පිළිබඳව සියල්ලන් තුළම අවබෝධයක්, දැනුවත්භාවයක් තිබිය යුතුය. ආගමික හේතූන් මත හෝ වෙනයම් හේතූන් මත සභාවේ සාමාජික සාමජිකාවන්ට සුදු හෝ ඊට ආවේණික වූ වර්ණයන්ගෙන් යුක්ත වූ ඇඳුම් භාවිත කිරීම අත්‍යවශ්‍ය වූවක් නොවන බව ඔවුනොවුන් තුළ දැනුවත්භාවයක් ලබා දීම තුළින් විරෝධතා හෝ ගැටුම් හෝ ඇතිවීම වළක්වා ගත හැකිය.

අනුරුද්ධිකා දිල්රංගි