පවතින දේශපාලන අර්බුදය අවසන් වූ වහාම විධායක ජනාධිපති ක්‍රමය අහෝසි කිරීම සඳහා 20 වැනි ව්‍යස්ථා සංශෝධනය ඉදිරියට ගෙනයෑමට බලාපොරොත්තු වන බව ජනතා විමුක්ති පෙරමුණේ පාර්ලිමේන්තු මන්ත්‍රී බිමල් රත්නායක පවසයි.
අනිද්දා සමඟ අදහස් දැක්වූ මන්ත්‍රීවරයා ප්‍රකාශ කළේ මේ වනවිට එක්සත් ජාතික පක්ෂය සහ දෙමළ ජාතික සන්ධානය සමඟ 20 වැනි ව්‍යවස්ථා සංශෝධනය ඉදිරිපත් කිරීම ගැන මූලික මට්ටමෙන් සාකච්ඡා කර තිබෙන බවත්, විධායක ජනාධිති ක්‍රමය අහෝසි කිරීම සම්බන්ධයෙන් එම පාර්ශ්ව දෙකම කැමැත්ත පළ කර තිබෙන බවත්ය.
මීට පෙර ජනාධිපති ක්‍රමය අහෝසි කිරීම සඳහා වූ 20 වැනි සංශෝධනය පාර්ලිමේන්තුවට ඉදිරිපත් කර තිබෙන බවත්, ජනාධිපතිවරයා විසින් පාර්ලිමේන්තු සැසිවාරය අවසන් කර නව සැසිවාරයක් ආරම්භ කළා වුවද 20 ව්‍යවස්ථා වැනි සංශෝධනය නැවත අලු‍තෙන් ඉදිරිපත් කළ යුතු නොවන බවත් එම මන්ත්‍රීවරයා පෙන්වා දුන්නේය. අර්බුදය අවසාන වීමෙන් ප්‍රථමයෙන් සිදුකරන කටයුත්ත වන්නේ 20 වැනි සංශෝධන යෝජනාව සම්මත කරගැනීමට අවශ්‍ය කටයුතු සිදුකිරීම බව එම මන්ත්‍රීවරයා කීය.
මේ අතර එක්සත් ජාතික පෙරමුණේ ආරංචි මාර්ග ප්‍රකාශ කරන්නේ විධායක ජනාධිපති ක්‍රමය අහෝසි කිරීම සම්බන්ධයෙන් විරෝධය දැක්වූ පාර්ශ්වයන් සමඟ නොනිල වශයෙන් සාකච්ඡා කර ඇති බවයි. එක්සත් ජාතික පෙරමුණේ බහුතර පිරිසක් විධායක ජනාධිපති ක්‍රමය අහෝසි
20
කිරීමට පක්ෂ බවත්, විධායක ජනාධිපති ක්‍රමය අහෝසි කිරිම අතිශය වැදගත් කාරණයක්යැයි පිළිගෙන තිබෙන බවත් අනිද්දා සමඟ අදහස් දැක්වූ එක්සත් ජාතික පෙරමුණේ ප්‍රබලයෙක් පැවසීය.

අභියාචනාධිකරණය විසින් නීති විරෝධී ආණ්ඩුව තහනම් කරමින් අතුරු තහනම් නියෝගයක් ලබාදීමෙන් පසුව අමාත්‍යාංශ ලේකම්වරුන් ප්‍රමුඛ රාජ්‍ය සේවකයන්ට ක්‍රියාත්මක විය නොහැකි තත්වයක් උදාවී තිබෙන බවත්, රාජ්‍ය සේවය අකර්මණ්‍ය වී තිබෙන බවත් විශ්‍රාමික පරිපාලන නිලධාරීහු කිහිපදෙනෙක් අනිද්දා සමඟ පැවසූහ.
අප සමග අදහස් දැක්වූ විශ්‍රාමික අමාත්‍යාංශ ලේකම්වරයෙකු වන ඒ.පී.ඒ. ගුණසේකර මහතා ප්‍රකාශ කළේ පරිපාලන නිලධාරීන් සියලු‍ දෙනාම 4 වැනි ව්‍යවස්ථාවේ සඳහන් ආකාරයට ආණ්ඩුක්‍රම ව්‍යවස්ථාව ආරක්ෂා කරන බවට පොරොන්දු වී රාජ්‍ය සේවයේ තනතුරු ලබා තිබෙන බවයි. ඒ අනුව ව්‍යවස්ථානුකූල නොවන ආකාරයෙන් ආණ්ඩුවක් ලෙස පෙනී සිටිමින් යමෙකු ලබා දෙන ඕනෑම තීන්දුවක් ප්‍රතික්ෂේප කළ යුතු බවත්, එසේ නොවුණහොත් එම නිලධාරීන්ට එරෙහිව නීතිය ක්‍රියාත්මක කළ හැකි බවත් ඔහු කීය. ඔහු පෙන්වාදුන්නේ නිලධාරීන්ට එලෙස නීතියෙන් දඬුවම් ලබන්නට සිදුවුණහොත් මෙවැනි අවස්ථාවක නියෝග ලබාදෙමින් බලපෑම් කළ දේශපාලනඥයන් නිලධාරීන්ගේ ආරක්ෂාවට නොපැමිණෙනු ඇති බවයි.
මේ වනවිට මහින්ද රාජපක්ෂට දේශපාලන බලයක් නොමැති බවත්, මහින්ද රාජපක්ෂ පිළේ පුද්ගලයෙකු යම් තීන්දුවක් ගන්නැයි නියෝග කළහොත් එවැනි නියෝග ප්‍රතික්ෂේප කළ යුතු බවත් ඔහු පැවසීය. මැතිවරණයක් පවත්වන අවස්ථාවකදී රජයේ නිලධාරීන් කිසිදු පාර්ශ්වයකට වාසිදායක නොවන ආකාරයට මධ්‍යස්ථව කටයුතු කළ යුතු බවත්, මෙම අවස්ථාවද මැතිවරණ අවස්ථාවක් ලෙස සලකමින් කටයුතු කිරීම වඩා සුදුසු බවත් ගුණසේකර මහතා කීය.
අනිද්දා සමඟ අදහස් දැක්වූ විශ්‍රාමික අමාත්‍යාංශ ලේකම්වරයෙකු වන ටී. අශෝක පීරිස් මහතා ප්‍රකාශ කළේ ආණ්ඩුවක් නොමැති මෙවැනි තත්වයක් මීට පෙර උදා වී නොමැති බවත් අමාත්‍යාංශ ලේකම්වරුන්ට කිසිම කටයුත්තක් කරගත නොහැකි තත්වයක් උදාවී තිබෙන බවත්ය. අමාත්‍යවරයෙකු නොමැතිව අමාත්‍යාංශ ලේකම්වරයෙකුට උපදෙස් ලබාගත හැක්කේ ජනාධිපති ලේකම් කාර්යාලයෙන් පමණක් බවත්, ජනාධිපති ලේකම් කාර්යාලයට අමාත්‍යාංශ විශාල ප්‍රමාණයක් පාලනය කළ නොහැකි බවත් ඔහු කීය.
මෙවැනි අවස්ථාවක කිසිම අමාත්‍යාංශ ලේකම්වරයෙකු අවදානම් සහගත තීන්දු නොගනු ඇති බවත් ඔහු පැවසීය. ඒ අනුව ඉදිරියේදී ටෙන්ඩර් කැඳවීම වැනි අත්‍යවශ්‍ය තීන්දු බොහොමයක් නොගෙන රාජ්‍ය සේවය ඇනහිටිනු ඇතැයි ඔහු පෙන්වාදුන් අතර මෙම තත්වයට ඉදිරියට ගියහොත් ඖෂධ වැනි අත්‍යවශ්‍ය ද්‍රව්‍යවල හිඟයක් නිසැකවම ඇතිවන බවද කීය.
මේ පිළිබඳව අනිද්දාට අදහස් පළකරමින් රජයේ තනතුරු ගණනාවක සේවය කර තිබෙන නිලධාරියෙකු වන ලයනල් ප්‍රනාන්දු මහතා ප්‍රකාශ කළේ රාජ්‍ය සේවකයන් පැහැදිළිවම හෘදය සාක්ෂියට අනුව කටයුතු කළ යුතු බවත්, එසේ නොවුණහොත් ඔවුන්ට එරෙහිව නිතිමය පියවර ගත හැකි බවත්ය.

ආරක්ෂක මාණ්ඩලික ප්‍රධානී රවීන්ද්‍ර විජේගුණරත්න අත්අඩංගුවට ගත් පසුගිය නොවැම්බර් 28 දින රාත්‍රී ඔහුගේ බිරිඳ වන යමුනා ද සේරම් නාවික හමුදා මූලස්ථානයේ අවන්හලට පැමිණ කළහකාරී ලෙස හැසිරී බලහත්කාරකම් පා ඇතැයි වාර්තා වේ.
එදින රාත්‍රියේ නාවික හමුදා මූලස්ථානයේ නිලධාරි අවන්හල තුළ තරුණයන් 11 දෙනෙකු පැහැරගෙන යැමේ නඩුවේ ප්‍රධාන සාක්ෂිකරු වන ලු‍තිනන් කමාන්ඩර් ගලගමගේ ලක්සිරි හා තවත් නිලධාරීන් දෙදෙනෙකු මත්පැන් පානය කරමින් සිට ඇත.
එම දිනයේ රාත්‍රී 8.30ට පමණ අවන්හලේ පුවත්පත් බලන ස්ථානයේ සිට මත්පැන් පානය කරන ස්ථානයට රවීන්ද්‍ර විජේගුණරත්නගේ බිරිඳ සහ ඇගේ පුත්‍රයා පැමිණ ඇත. එම අවස්ථාවේදී නාවික හමුදා මාණ්ඩලික ප්‍රධානියාගේ හා නාවික හමුදා මෙහෙයුම් අධ්‍යක්ෂවරයාගේ ෆ්ලෑග් ඔෆිසර් යනුවෙන් හඳුන්වන නිලධාරීන් දෙදෙනා ඇයට ගුඞ් මෝර්නිං මැඩම් යනුවෙන් ආමන්ත්‍රණය කර ඇත. එහිදී ලු‍තිනන් කර්නල් ලක්සිරිගේ නම කියමින් අසභ්‍ය වචනයෙන් ඇය බැණවැදී ඇත.
එම අවස්ථාවෙන් මඟහැරීම සඳහා ලු‍තිනන් කර්නල් ලක්සිරි අවන්හලේ වෙනත් දොරටුවකින් පිටවී ඇති අතර එම අවස්ථාවේදී එසේ පිටවී යන්නේ කවුදැයි රවීන්ද්‍ර විජේගුණරත්නගේ බිරිඳ විමසා ඇතත් ඔහු ඊට ප්‍රතිචාර නොදක්වා පිටවී ඇත.
ඉන්පසු අවන්හලේ මත්පැන් පානය කරන කොටසේ ඉතිරවී සිටි අනෙක් නිලධාරීන් දෙදෙනාට හා අවන්හලේ සේවකයන් දෙදෙනාට පිටතට යන ලෙස නියෝග කර ඇති ඇය සහ ඇගේ පුත්‍රයා නාවික හමුදා මාණ්ඩලික ප්‍රධානී හා එහි අධ්‍යක්ෂ ජෙනරාල් මෙහෙයුම් සමග රාත්‍රී 10 පසුවන තුරු පැය දෙකකට අධික කාලයක් සාකච්ඡාවක නිරත වී සිට ඇත.■

ජනාධිපති මෛත්‍රීපාල සිරිසේන තමාගේ ව්‍යවස්ථා විරෝධී කුමන්ත්‍රණය නිවැරදි කර නොගතහොත් ජනාධිපතිවරයාට එරෙහිව දෝෂාභියෝගයක් ඉදිරිපත් කිරීම පිළිබඳව සාකච්ඡා කර ඇතැයි අනිද්දා සමග අදහස් දැක්වූ එක්සත් ජාතික පෙරමුණේ මන්ත්‍රීවරු පිරිසක් පැවසූහ.
ජනාධිපති සිරිසේනගේ ව්‍යවස්ථා විරෝධී ක්‍රියාවන්ට එරෙහිව දැනටමත් මන්ත්‍රීවරුන් 122ක් සිටින බවත් තවත් මන්ත්‍රීවරුන් 28 දෙනෙකු සහයෝගය පළ කළහොත් දෝෂාභියෝගයක් සම්මත කරගත හැකිවනු ඇති බවත් එක්සත් ජාතික පෙරමුණේ නායකයන් සාකච්ඡා කර ඇත.
ව්‍යවස්ථා විරෝධී කුමන්ත්‍රණය සාර්ථක කරගැනීමට ජනාධිපතිවරයා අසමත් වූ නිසා ජනාධිපතිවරයාට එරෙහි දෝෂාභියෝගයකට මහින්ද රාජපක්ෂ පාර්ශ්වය සහයෝගය දැක්වීමේ ඉඩක් ඇති බවටත් එම කණ්ඩායමේ සහයෝගය ලබාගැනීමට උත්සාහ කළ යුතු බවටත් අදහස් පළවී තිබේ. ජනාධිපති සිරිසේන කැබිනට් මණ්ඩලයක් පත් නොකර තනි පුද්ගල ආණ්ඩුවක් ලෙස දිගින් දිගටම කටයුතු කළහොත් එවැනි පියවරක් ගැනීමට සිදුවනු ඇතැයිද ඔවුන් සාකච්ඡා කර ඇත.
ව්‍යවස්ථාවේ 38(2)(අ) ව්‍යවස්ථාව අනුව ජනාධිපතිවරයාට දෝෂාභියෝගයක් ඉදිරිපත් කිරීමේ හැකියාව තිබෙන අතර එහි පළමු අනුව්‍යවස්ථාවෙහි සඳහන් වන්නේ ජනාධිපතිවරයා චේතනාන්විතව ආණ්ඩුක්‍රම ව්‍යවස්ථාව උල්ලංඝනය කිරීමේ වරද කළහොත් ඔහුට එරෙහිව දෝෂාභියෝගයක් ඉදිරිපත් කළ හැකි බවයි.
දෝෂාභියෝගයක්
දෝෂාභියෝගයක් ඉදිරිපත් කිරීම සඳහා ජනාධිපතිවරයා ව්‍යවස්ථාව උල්ලංඝනය කර ඇතැයි චෝදනා කරමින්, ඒ පිළිබඳව පරීක්ෂා කොට බලා වාර්තා කරන ලෙස ඉල්ලා සිටින්නා වූ යෝජනාවක්, පාර්ලිමේන්තුවේ නොපැමිණි මන්ත්‍රීවරුන්ද ඇතුළුව සියලු මන්ත්‍රීවරුන්ගෙන් තුනෙන් දෙකක පිරිසක් විසින් ඉදිරිපත් කළ යුතුය. ශ්‍රේෂ්ඨාධිකරණය විසින් අදාළ චෝදනා පිළිබඳව පරීක්ෂා කළ යුතු අතර ජනාධිපතිවරයාට පෞද්ගලිකවම හෝ නීතිඥයෙකු මාර්ගයෙන් අධිකරණය ඉදිරියේ කරුණු ඉදිරිපත් කිරීමට අයිතියක් තිබේ.
ශ්‍රේෂ්ඨාධිකරණය විසින් ස්වකීය තීරණය හා ඊට හේතු දැක්වෙන වාර්තාවක් පාර්ලිමේන්තුවට ලබාදිය යුතුය. එම වාර්තාවෙන් ජනාධිපතිවරයා වරදක් කර ඇතැයි තීන්දු කර තිබුණහොත් පාර්ලිමේන්තුවේ මන්ත්‍රීවරුන්ගෙන් නොපැමිණි මන්ත්‍රීවරුන්ද ඇතුළු මුළු මන්ත්‍රී සංඛ්‍යාවෙන් තුනෙන් දෙකක ඡන්දයෙන් දෝෂාභියෝගයක් සම්මත කරගත හැකිය.

පාර්ලිමේන්තුව විසුරුවා හැරීමට විරුද්ධ‍ව ශ්‍රේෂ්ඨාධිකරණයට ඉදිරිපත් වූ මූලික අයිතිවාසිකම් පෙත්සම් විභාගයට ගෙන එම විසුරවා හැරීම නීති විරෝධී යැයි ශ්‍රේෂ්ඨාධිකරණය කියා සිටියහොත්, එම තීරණය ද ජනාධිපති සිරිසේන විසින් පිළිනොගන්නවා ඇතැයි ජනාධිපතිවරයාට සමීප පාර්ශව වෙතින් අදහස් පළවේ.
පාර්ලිමේන්තුව විසුරවා හැර මහ මැතිවරණයක් පැවැත්වීමට ජනපතිවරයා ගත් පියවර ශ්‍රේෂ්ඨාධිකරණය තුළ අභියෝගයට ලක්කළ නොහැකියැයි යන නීතිපතිවරයාගේ තර්කය මත පදනම්ව එම තීරණය ගනු ඇතැයි අදහස් පළවේ.
ඉහත තර්කය මත පදනම් වෙමින් නීතිපති ජයන්ත ජයසූරිය ශ්‍රේෂ්ඨාධිකරණයට ප්‍රකාශ කර තිබුණේ මෙම පෙත්සම් නීති විරෝධී සහ ව්‍යවස්ථා විරෝධී බැවින් ඒවා විභාග කිරීමට තබා භාර ගැනීමටවත් ශ්‍රේෂ්ඨාධිකරණයට බලයක් නැති බවය. ඒ අනුව එම නීති විරෝධී තත්ත්වය තුළ දෙන අධිකරණ තීන්දුවට අවශ්‍ය නම් ජනාධිපතිවරයාට අභියෝග කිරීමේ හැකියාවද ඇතැයි එම පාර්ශ්වයේ අදහසයි.■

මංජු කස්තුරිආරච්චි

ජනාධිපති මෛත්‍රීපාල සිරිසේන කුමක් ප්‍රකාශ කළද රනිල් වික්‍රමසිංහ හැර වෙනත් පුද්ගලයෙකුගේ නමක් තමන්ගේ බහුතරය ඇති පුද්ගලයා ලෙස ඉදිරිපත් නොකරන බව එක්සත් ජාතික පෙරමුණේ නායකයෝ පැවසූහ.
අනිද්දා සමඟ අදහස් දැක්වූ රාජිත සේනාරත්න, මනෝ ගනේෂන් ඇතුළු නායකයන් පිරිසක් කියා සිටියේ ජනාධිපතිවරයාට කැමති ප්‍රකාශයක් කළ හැකි නමුත් ක්‍රියා කිරීමට වෙන්නේ ව්‍යවස්ථාවට අනුව බවයි.
තම ස්ථාවරයට හේතුව වන්නේ රනිල් වික්‍රමසිංහ නම් පුද්ගලයා නොවන බවත් ජනාධිපතිවරයාම කළ වැරැද්ද නිවැරදි කිරීමේ අවශ්‍යතාව බවත් එම නායකයෝ අනිද්දා සමඟ අදහස් දක්වමින් ප්‍රකාශ කළෝය. ජනාධිපතිවරයා ඔක්තෝබර් 26 වැනිදා ගත් තීන්දුව ව්‍යවස්ථා විරෝධී එකක් බව තම කණ්ඩායම දැඩිව විශ්වාස කරන බවත් නැවත ඔක්තෝබර් 26 වැනිදාට පෙර තිබුණු තත්වයට යා යුතු බවත් ඔවුහු පෙන්වා දුන්නෝය. ඒ අනුව රනිල් වික්‍රමසිංහ අගමැතිවරයා ලෙස පත් කළ යුතු බවත්, ඉන්පසුව ජනාධිපතිවරයා සමඟ සාකච්ඡා කිරීමට සූදානම් බවත් එම ඇමතිවරු කීහ.
බහුතරය තිබෙන පුද්ගලයා පත් කිරීම හැර ජනාධිපතිවරයාට විකල්පයක් නැතැයි ඔවුහු වැඩිදුරටත් පෙන්වා දුන්හ.■

රනිල් වික්‍රමසිංහ අගමැතිවරයා ලෙස පත්කිරීම හැර වෙනත් විකල්පයක් නොමැති තත්වයට පත් වුවහොත් තමන් ජනාධිපති ධුරයෙන් ඉල්ලා අස්වී පොළොන්නරුවට යන බව ජනාධිපති මෛත්‍රීපාල සිරිසේන මහතා ප්‍රකාශ කර ඇත.
දෙසැම්බර් 03 වැනිදා අභියාචනාධිකරණය විසින් නීති විරෝධී කැබිනට් මණ්ඩලයට එරෙහිව නිකුත් කළ අතුරු තහනම් නියෝගයෙන් පසුව එදිනම ජනාධිපති මෛත්‍රීපාල සිරිසේන සහ එක්සත් ජාතික පෙරමුණේ නායකයන් අතර පැවති සාකච්ඡාවදී ජනාධිපතිවරයා ඒ බව ප්‍රකාශ කර තිබේ.
එක්සත් ජාතික පෙරමුණේ නායකයන් ප්‍රකාශ කර ඇත්තේ මෙය රනිල් වික්‍රමසිංහ නම් පුද්ගලයා පිළිබඳ කාරණයක් නොවන බවත් ඔක්තෝබර් 26 වැනිදාට පෙර තිබුණු තත්වයට යෑමේ අවශ්‍යතාවක් තිබෙන බවත්ය.
එම අවස්ථාවේ ජනාධිපති සිරිසේන කියා ඇත්තේ තමන් බිත්තියට හිර නොකරන ලෙසත් එසේ වුවහොත් තමන් ඉල්ලා අස්වන බවත්ය. රනිල් වික්‍රමසිංහ සමඟ කටයුතු කිරීමට වඩා පොළොන්නරුවට ගොස් ගොවිතැන් කිරීම යහපත් බව ඔහු ප්‍රකාශ කර ඇත.
කෙසේ වෙතත් එක්සත් ජාතික පෙරමුණේ මන්ත්‍රීවරුන් ප්‍රකාශ කර ඇත්තේ එය තමන්ගේ ප්‍රශ්නයක් නොවන බවත් එය ජනාධිපතිවරයාගේ ප්‍රශ්නයක් වන බවත්ය.
එම සාකච්ඡාවේදී පාර්ලිමේන්තු මන්ත්‍රී රිෂාද් බදියුදීන් විසින් පෙන්වා දී ඇත්තේ
අස්වෙනවා

තමන්ගේ නීතිඥයන් තමන්ට ප්‍රකාශ කළ ආකාරයට ව්‍යවස්ථාව කඩකරන පුද්ගලයෙකුට එරෙහිව සිර දඬුවම් වුව ලබාදීමේ හැකියාවක් තිබෙන බවයි. එය තමාට කරන තර්ජනයක්දැයි ජනාධිපතිවරයා විමසා ඇති අතර බදියුදීන් මන්ත්‍රීවරයා පෙන්වා දී ඇත්තේ එය තර්ජයක් නොවන බවත්, ජනාධිපතිවරයා සිදුකරන්නේ බරපතළ වරදක්යැයි පෙන්වාදීමක් පමණක් වන බවත්ය.
ආණ්ඩුක්‍රම ව්‍යවස්ථාවට අනුව ජනාධිපති ධුරය පුරප්පාඩු වුවහොත් අගමැතිවරයා ජනාධිපති ධුරයේ වැඩකටයුතු ආවරණය කරමින් ඉතිරි ධුරකාලය සම්පූර්ණ කළ යුතුය. එවැනි අවස්ථාවකදී අගමැතිවරයෙකු නොමැති නම් ජනාධිපති ධුරයේ වැඩ බැලීම කථානායකවරයා වෙත පැවරෙන්නේය.■

අනුරංග ජයසිංහ

දැනට ශ්‍රේෂ්ඨාධිකරණය හමුවේ විභාගවන පාර්ලිමේන්තුව විසුරුවා හැරීමට එරෙහි මූලික අයිතිවාසිකම් පෙත්සම් සම්බන්ධයෙන් අගවිනිසුරු නලින් පෙරේරා මුණගැසීම සඳහා පසුගියදා පාර්ලිමේන්තු මන්ත්‍රී උදය ගම්මන්පිල ගත් උත්සාහයක් ව්‍යර්ථ වී ඇතැයි වාර්තා වේ.
මන්ත්‍රී උදය ගම්මන්පිල මෙම උත්සාහය ගෙන ඇත්තේ මරදාන, ඩීන්ස් පාරේ, පාතිමා දෙව් මැදුරේ මීසම් පාලක පියනම හමුවී ඔහු මාර්ගයෙන් අගවිනිසුරුවරයා හමුවීමට අවස්ථාවක් උදාකර ගැනීමට සාකච්ඡා කිරීම මගින්ය.
පාතිමා දෙව් මැදුරේ පියනම හමුවී උදය ගම්මන්පිල මහතා මුලින්ම ප්‍රකාශ කර ඇත්තේ තමාට දේව ආශීර්වාද ලබාගැනීම සඳහා පැමිණි බවය.
අගවිනිසුරු නලින් පෙරේරා ඩීන්ස් පාරේ පාතිමා දෙව් මැදුරට පැමිණෙන බවත් ඒ නිසාම එහි මීසම් පාලක පියනම දැන හඳුනන බවත් දැනගැනීමෙන් පසු උදය ගම්මන්පිල මන්ත්‍රීවරයා එම උත්සාහය ගෙන ඇත.
එම සාකච්ඡාවේදී අගවිනිසුරුවරයා හමුවීම සඳහා අවස්ථාවක් ලබාදෙන ලෙසට උදය ගම්මන්පිල මන්ත්‍රීවරයා කරන ලද ඉල්ලීම පාතිමා දෙව් මැදුරේ මීසම් පාලක පියනම දැඩිව ප්‍රතික්ෂේප කර ඇති අතර ඒ අනුව සිය උත්සාහය අතහැර දැමීමට උදය ගම්මන්පිල මන්ත්‍රීවරයාට සිදුවී ඇත.
ජනාධිපතිවරයා නීති විරෝධී ලෙස පාර්ලිමේන්තුව විසුරුවා හැරීමට එරෙහිව ගොනු කරන ලද මූලික අයිතිවාසිකම් පෙත්සම්වලට විරුද්ධව, අතරමැදි පෙත්සම්කරුවකු වශයෙන් ගම්මන්පිල මන්ත්‍රීවරයා කටයුතු කරයි. එම පෙත්සම් විභාගය සඳහා පූර්ණ විනිසුරු මඬුල්ලක් පත්කරන ලෙසද ඔහු පසුගියදා ශ්‍රේෂ්ඨාධිකරණයෙන් ඉල්ලා සිටියේය.
පාතිමා දෙව්මැදුරේ මීසම් පාලක පියනම නිමල මරිය නිකායට අයත් පියනමක් වන අතර සාමාන්‍යයෙන් නිමල මරිය නිකායේ පියවරුන් ස්වාධීන ලෙස කටයුතු කරන අය ලෙස සැලකේ. ඔවුන් මෙම දේශපාලන අර්බුදකාරී අවස්ථාවේද කොළඹ අගරදගුරු කාදිනල් මැල්කම් රංජිත්ට ප්‍රතිවිරුද්ධ මත දරමින් සිටින අය බව තවදුරටත් වාර්තා වේ. කොළඹ අගරදගුරු කාදිනල් මැල්කම් රංජිත්ට බලපෑම් කිරීමට හැකියාවක් ඇත්තේ ඔහු යටතේ ඇති කොළඹ පදවි පියවරුන්ට බවද තවදුරටත් දැනගන්නට ඇත.■

ලසන්ත රුහුණගේ/ අරුණ ජයවර්ධන