තමාට විරුද්ධව ත්‍රිපුද්ගල විශේෂ මහාධිකරණයේ විභාගවෙමින් පවතින ඩීඒ රාජපක්‍ෂ කෞතුකාගාරය සම්බන්ධ නඩු විභාගයට එරෙහිව, එහි විත්තිකාර ගෝඨාභය රාජපක්‍ෂ මහතා අභියාචනාධිකරණය ඉදිරියේ ගොනුකරන ලද රිට් පෙත්සම, මාර්තු 8වැනිදා අභියාචනාධිකරණයෙහිදී සලකා බැලීමට නියමිතය.

ත්‍රිපුද්ගල විශේෂ මහාධිකරණය ඉදිරියේ ඉක්මනින් විභාග කොට අවසන් වීමට නියමිත තමාගේ නඩුව අත්හිටුවීම සඳහා රිට් ආඥාවක් නිකුත් කරන ලෙස ගෝඨාභය රාජපක්‍ෂ මහතා සිය පෙත්සමෙන් ඉල්ලා තිබේ.

මේ අතර, අභියාචනාධිකරණයේ සභාපති විනිසුරු හැටියට වැඩ බැලීමට දීපාලි විජේසුන්දර මහත්මිය නැවත වාරයක් ජනාධිපති මෛත්‍රීපාල සිරිසේන විසින්, මාර්තු 6 වැනිදා පත්කරනු ලැබුවාය. ඒ ආණ්ඩුක්‍රම ව්‍යවස්ථා සභාව, ඇය අභියාචනාධිකරණ සභාපති ධුරයට පත්කිරීමට ජනාධිපති විසින් කරන ලද නාමයෝජනාව අනුමත නොකිරීමෙන් පසු, දෙවැනි වරටය.

අභියාචනාධිකරණ සභාපති ධුරයේ වැඩ බැලීම සඳහාවත් ව්‍යවස්ථා සභාවේ අනුමැතියකින් තොරව විනිසුරුවරයකු පත්කිරීමට ජනාධිපතිවරයාට ආණ්ඩුක්‍රම ව්‍යවස්ථාවෙන් බලයක් නැති නිසා, මේ පත්කිරීම ව්‍යවස්ථාව උල්ලංඝනය කිරීමක් බව නීති විශාරදයන් පෙන්වා දී තිබේ.
පසුගියදා පාර්ලිමේන්තුවේ පැවැති ආණ්ඩුක්‍රම ව්‍යවස්ථා සභාව සම්බන්ධ කල් තැබීමේ විවාදයේදී කතාකළ පාර්ලිමේන්තු මුජිබුර් රහුමාන් කීවේ, අභියාචනාධිකරණ විනිසුරු දීපාලි විජේසුන්දර මහත්මියගේ දියණියගේ විවාහ මංගල්‍යය අවස්ථාවේ හිටපු ජනාධිපති මහින්ද රාජපක්‍ෂ මහතා අලුත් ම මෝටර් රථයක් ඇයට තෑගි දුන් බවය.

අභියාචනාධිකරණයේ නඩු ඇසීමට විනිසුරුවරුන් පත්කරන්නේ එහි සභාපති විනිසුරුවරයා හෝ විනිසුරුවරිය විසිනි. ■

අරුණ ජයවර්ධන

තමා අත්අඩංගුවට ගැනීමෙන් වළක්වන නියෝගයක් නිකුත් කරන ලෙස ඉල්ලා හිටපු නාවික හමුදාපති වසන්ත කරන්නාගොඩ ශ්‍රේෂ්ඨාධිකරණයට ඉදිරිපත් කළ මූලික අයිතිවාසිකම් පෙත්සම, මාර්තු 7වැනිදා කැඳවූ අවස්ථාවේදී එම පෙත්සමට මැදිහත්වීමට අවසර ඉල්ලා සිටි පාර්ශ්වයන්ට සිය කරුණු දැක්වීමට ශ්‍රේෂ්ඨාධිකරණයෙන් අවසර ලැබී නැත. මෙසේ මැදිහත්වීමට අවසර ඉල්ලා සිටියේ. නාවික හමුදා කණ්ඩායම විසින් පැහැරගෙන යනු ලැබ ඝාතනය කැරුණු තරුණ ශිෂ්‍යයකු වන රජීව් නාගනාදන්ගේ මව වන සරෝජිනි නාගනාදන් මහත්මියයි. ඒ අගතියට පත් පාර්ශ්වයක් වශයෙනි.

ඇය වෙනුවෙන් පෙනීසිටි ජනාධිපති නීතිඥ ජේසී වැලිඅමුණ එසේ කරුණු දැක්වීමට අවසර ඉල්ලූ විට පසුව ඒ ගැන සලකා බලන බව ශ්‍රේෂ්ඨාධිකරණ විනිසුරු මඬුල්ල දන්වා සිටියත් ඒ අවස්ථාව ලැබුණේ නැත. එහෙත් මීට පෙර එවැනි පෙත්සම් විභාගවලදී මැදිහත්කාර පාර්ශ්වවලට සිය කරුණු දැක්වීමට අධිකරණයෙන් අවසර ලැබීම සිදුවිය.

කරුණු විමසීම අවසානයේදී බුවනෙක අලුවිහාරේ, විජිත් මලල්ගොඩ හා ප්‍රීති පද්මන් සූරසේන යන විනිසුරු මඬුල්ල පෙත්සම්කාර වසන්ත කරන්නාගොඩ අත්අඩංගුවට ගැනීමෙන් වළක්වන නියෝගයක් නිකුත් කළේය.

තිවංක සපරමාදු

ජනාධිපති අභියාචනා කමිටුව විසින්ම අලියොන්ස් රක්ෂණ සමාගමට ලබාදී තිබූ සුරක්ෂා රක්ෂණය අවලංගු කරන ලෙසට ජනාධිපතිවරයා නියෝග කර ඇතැයි වාර්තා වේ.

මාර්තු 06 වැනිදා පැවති කැබිනට් මණ්ඩල රැස්වීමේදී ජනාධිපතිවරයා එම නියෝගය කර ඇති අතර ඒ සම්බන්ධයෙන් තමාට නිරීක්ෂණ ඉදිරිපත් කිරීමට අවශ්‍ය බවද ප්‍රකාශ කර ඇත.

ඊට අමතරව එම රක්ෂණය සම්බන්ධයෙන් අධ්‍යාපන අමාත්‍යාංශ බලධාරීන් සමඟ මාර්තු 07 වැනිදා සාකච්ඡාවක් පැවැත්වීමටද ජනාධිපතිවරයා තීරණය කර තිබූ අතර සාකච්ඡාවේ තොරතුරු කුමක්ද යන්න පුවත්පත මුද්‍රණයට යන තෙක්ම වාර්තාවුණේ නැත.

ඉඳුවර බණ්ඩාර

බලපත්‍රයක් නොමැතිව අලි පැටියෙකු සන්තකයේ තබාගැනීමේ චෝදනාවට උඩුවේ ධම්මාලෝක හිමිට විරුද්ධව කොළඹ මහාධිකරණයේ විභාග වූ නඩුවෙන් ඒ හිමියන් නිදහස් කරමින් ලබාදුන් තීන්දුවට එරෙහිව අභියාචනයක් ගොනුකරන බව නීතිපති දෙපාර්තමේන්තුව ප්‍රකාශ කරයි.

අලි පැටවා විත්තිකාර හිමියන් භාරයේ සිටි බවට පැමිණිල්ල සාක්ෂි ඉදිරිපත් කළත් එම සාක්ෂිවලට, මෙම චෝදනාව සාධාරණ සැකයකින් තොරව ඔප්පු කිරීමට නොහැකිබව ප්‍රකාශ කරමින් මාර්තු 01 දින මෙම නඩු තීන්දුව කොළඹ මහාධිකරණ විනිසුරු සම්පත් විජේරත්න ලබාදුන්නේය.

2015.01.28 දින කිරුළපන ඇලන් මැතිනියාරාමයේදී උඩුවේ ධම්මාලෝක හිමියන් සතුව සිටි මෙම අලි පැටවා වනජිවී භාරයට ගනු ලැබූ අතර පසුව ඒ හිමියන් මාධ්‍යයට ප්‍රකාශ කර තිබුණේ කවුරු හෝ කෙනෙකු මෙම අලි පැටවා පන්සල් වත්තට අතහැර ගොස් සිටියදී, තමන් භාරයට ගෙන ඇතිදැඩි කළ බවය.

මංජු කස්තුරිආරච්චි

ජනාධිපති මෛත්‍රීපාල සිරිසේන මීළඟ ජනාධිපතිවරණයට තරග වැදීමේදී ශ්‍රී ලංකා නිදහස් පක්ෂ යාන්ත්‍රණයට වැඩි බරක් නොතබා පක්ෂයට පිටතින් සිටින කණ්ඩායමක් සමඟ මැතිවරණ සටන මෙහෙයවීමට කටයුතු කරනු ඇතැයි අනිද්දා වෙත වාර්තා වේ.

ශ්‍රී ලංකා නිදහස් පක්ෂය හෝ ශ්‍රී ලංකා පොදුජන පෙරමුණ තමන්ට ජනාධිපතිවරණයකදී අවංකවම සහාය නොදෙනු ඇතැයි මෛත්‍රීපාල සිරිසේන සහ ඔහුට සමීප පාර්ශ්වයේ විශ්වාසය වී ඇත. මේ තත්ත්වය තුළ ශිරාල් ලක්තිලක, චතුරිකා සිරිසේන, දහම් සිරිසේන, මෑතකදී පත්කරනු ලැබූ ආණ්ඩුකාරවරුන්, ත්‍රිවිධ හමුදාවේ ඉහළ නිලධාරීන්, චතුරිකා සිරිසේනට අයත් වෙළඳ ප්‍රචාරණ ආයතනය ආදි පුද්ගලයන් සහ ආයතන එකට කටයුතු කරමින් මැතිවරණ සටන මෙහෙයවනු ඇති බව දැනගන්නට ඇත.

මත්ද්‍රව්‍ය ජාවාරමට වැරදිකරුවූ පුද්ගලයෙකු පෝරකයට නැග්ගවීම, අර්ජුන් මහේන්ද්‍රන් අත්අඩංගුවට ගෙන ලංකාවට ගෙන ඒම ආදි සංදර්ශනාත්මක වැඩ කිහිපයක් සමග ජනාධිපතිවරණ සටන එම පාර්ශ්වය විසින් අරඹනු ඇති බවට දැනගන්නට ලැබේ.