– ඒ වෛද්‍යවරයා නිරෝධායනය වෙලා නැහැ, තවම සේවයේ
– පීසීආර් පරීක්ෂණයක් කරලා නැහැ
– පොලීසිය නිහඩයි
– හෙළ සුවය දුම් හට්ටියට විද්‍යාත්මක පදනමක් නෑ
– ආයුර්වේද වෛද්‍යවරු දුම් හට්ටිය ප‍්‍රතික්ෂේප කරති
‘මම පෞද්ගලිකව කීවොත් මට පසුගිය දින කිහිපය තුළ මෙයට රෝග ලක්ෂණ ආවා. ඒ කියන්නේ උගුරේ අමාරුව, ඇඟපත රුදාව හා තද උණ ගතිය ආවා. දවස් දෙකයි මට ගියේ මම මේකේ සඳහන් කර ඇති ආකාරයටම දුම් හට්ටිය හොඳට රත් කරලා පැය භාගයෙන් භාගයට එය ආඝ‍්‍රාණය කළා, ඊට පස්සේ පැයකට සැරයක් ආඝ‍්‍රාණය කළා. දින දෙකක් තුළ මාගේ සම්පූර්ණ රෝගී තත්වයන් සමනය වෙලා ගියා. දැඩි සත්කාර ඒකකයට දැමීමට සිටි අසාධ්‍ය රෝගියෙකුට මම මේ ප‍්‍රතිකාරය ලබාදුන්නා. ඇය වයස අවුරුදු හැත්තෑවක පමණ කාන්තාවක්.’
මේ නිරෝෂ් සමරවික‍්‍රම නම් වෛද්‍යවරයෙකු ‘හෙළ සුවය’ නම් පෞද්ගලික ආයතනයෙන් ඖෂධයක් යැයි සඳහන් කරමින් දුම් හට්ටියක් විකිණීම සඳහා ‘අරුණ’ පුවත්පතේ යූටියුබ් නාලිකාවේ අපේ‍්‍රල් 05 වැනිදා පළවූ වීඩියෝවකදී කියා ඇති කතාවකි. එම වෛද්‍යවරයා එතැනින් නොනැවතී තමන් වෙත පැමිණි ශ්වසන රෝග සහිත රෝගීන්ට එම දුම් හට්ටිය ලබාදුන් බවත්, වැලිසර රෝහලේ සම්පූර්ණ කාර්යමණ්ඩලය එම දුම් හට්ටිය පාවිච්චි කරන බවත් එම වීඩියෝවේ නිරෝෂ් සමරවික‍්‍රම වෛද්‍යවරයා පවසයි.
හෙළ සුවය නම් ආයතනය ප‍්‍රියන්තා සේනානායක නම් කාන්තාව ආරම්භ කොට, කිසිදු පදනමක් නැති මිථ්‍යා ප‍්‍රබන්ධ මත පවත්වාගෙන යන ආයතනයකි. ඒ ගැන ඉදිරියේදී වැඩි විස්තර කතාකරන්නෙමු. තර්ක බුද්ධිය වෙනුවට අන්ධ භක්තිය මත කටයුතු කරන මිනිසුන් ඒ ආයතනයේ සේවය ලබාගනී. ඒ ආයතනයෙන් විකුණන කැඳ මුට්ටි හෝ දුම් හට්ටි මිලදී ගැනීම ඒ ඒ අයගේ කැමැත්ත විය හැකිය. එහෙත් භයානක කාරණය වන්නේ රජයේ වෛද්‍යවරුන්, විද්‍යාත්මක පදනමික් තොරව මේ දුම් හට්ටිය ප‍්‍රවර්ධනය කිරීමය.
විශේෂයෙන්ම නිරෝෂ් සමරවික‍්‍රම නම් වෛද්‍යවරයා කියන්නේ මහා භයානක කතාවකි. අසාධ්‍ය රෝගී කාන්තාවකගේ පෙණහලූවලට බලෙන් දුම් ඇල්ලවීම රෝහලකදී කළ හැකි භයානකම ක‍්‍රියාවකි.
අපි පරීක්ෂා කර බැලූවෙමු. මේ දුම් හට්ටිය ප‍්‍රතිඵලදායක ඖෂධයක් බව කියන්නට කිසිදු පිළිගත හැකි විද්‍යාත්මක පර්යේෂණයක් කර නැත. පර්යේෂණවලින් තහවුරු නොවූ විද්‍යාත්මක නොවන ප‍්‍රතිකාර සිදුකිරීම බරපතළ අපරාධයකි. විශේෂයෙන්ම අතිභයානක වසංගතයක් පැතිර ගොස් පවතින පසුබිමක ශ්වසන රෝහලකට පැමිණෙන කොවිඞ්-19 රෝග ලක්ෂණ පෙන්වන රෝගීන් පරීක්ෂණ සහ සුදුසු ප‍්‍රතිකාර සඳහා යොමු නොකර දුම් ඇල්ලවීම භයානක අපරාධයකි.
ඊටත් වඩා භයානක අපරාධය වන්නේ යම් වෛද්‍යවරයෙකු තමන්ට මේ භයානක වසංගත රෝගයේ රෝග ලක්ෂණ ඇතිවීමෙන් පසුව නිරෝධායනය නොවී, වෛද්‍ය පරීක්ෂණයකට ලක් නොවී ශ්වසන රෝගීන් සඳහා ප‍්‍රතිකාර කරමින් සිටීමය. අප අපේ‍්‍රල් 14 වැනිදා කළ සොයාබැලීමකදී තහවුරු වුණේ තමන්ට කොවිඞ්-19 රෝග ලක්ෂණ ඇතැයි කී වෛද්‍ය නිරෝෂ් සමරවික‍්‍රම තවමත් වැලිසර රෝහලේ ප‍්‍රතිකාර කරමින් සක‍්‍රිය සේවයේ නිරත වන බවය.
අප කළ විමසීමකදී වැලිසර රෝහලේ අධ්‍යක්ෂ වෛද්‍ය ඊ.ආර්. මොහොමඞ් තවුෆීක් පැවසුවේ නිරෝෂ් සමරවික‍්‍රම නම් වෛද්‍යවරයාට කොවිඞ්-19 රෝගය ඇතැයි පරීක්ෂණවලින් තහවුරු වී නොමැති බවය. බාහිර රෝගී අංශයේ වෛද්‍යවරයෙකු වන එම වෛද්‍යවරයාගේ වගකීම් විරහිත හැසිරීම පිළිබඳව තමන් ඉතා තදින් අවවාද කළ බවද ඔහු කීය. දැන් ඔහු සාමාන්‍ය ආකාරයට සේවයේ යෙදෙන බව අධ්‍යක්ෂවරයා පැවසීය.
තමන්ට කොවිඞ්-19 රෝග ලක්ෂණ තිබුණායැයි යම් රෝහලක වෛද්‍යවරයෙකු කී පසුව රෝගියෙකු එම රෝහලට විශ්වාසයෙන් ගොස්, ප‍්‍රතිකාර ලබන්නේ කෙලෙසද?
විශේෂයෙන්ම කොවිඞ්-19 රෝගය යනු කෙළින්ම ශ්වසන පද්ධතියට පහරදී, ශ්වසන පද්ධතිය දුර්වල කරන රෝගයකි. ඒ නිසා කොවිඞ්-19 රෝගය නිසා ශ්වසන රෝග ඇති පුද්ගලයන් ඉහළ අවදානමකට ලක්වෙයි. එවැනි පසුබිමක වැලිසර ශ්වසන රෝහලේ වෛද්‍යවරයෙකුට මෙලෙස වගකීම් විරහිතව හැසිරීමේ හැකියාවක් තිබේද?
වගකිවයුත්තෝ නිදිද?
තමන්ට කොවිඞ්-19 රෝග ලක්ෂණ ඇතැයි ප‍්‍රසිද්ධ මාධ්‍යයක ප‍්‍රකාශ කොට, කිසිදු ප‍්‍රතිකාරයකට හෝ ස්වයං නිරෝධායනයකට යොමු නොවූ රජයේ වෛද්‍යවරයෙකු, කිසිදු ගැටලූවක් නැතිව තවම සේවයේ යෙදෙන්නේ කෙලෙසද?
කොවිඞ්-19 පිළිබඳව වැරදි මත ප‍්‍රචාරය කරන, ව්‍යාජ පුවත් පතුරුවන පුද්ගලයන් අත්අඩංගුවට ගන්නා බව පොලීසිය කියා ඇත. ඒ යටතේ ‘ගෝඨාභය කොවිඞ්-19 පරීක්ෂණයෙන් පොසිටිව්. දුකයි.’ යැයි ඉංග‍්‍රීසි භාෂාවෙන් අපේ‍්‍රල් 01 වැනිදා පෝස්ටුවක් පළකළ කාන්තාවක අත්අඩංගුවට ගෙන ඇතැයි වාර්තා විය.
ගෝඨාභයලා දහස් ගණනක් සිටිනවා විය හැකි රටක එවැනි පෝස්ටුවක් පළ කරන ලද තනි පුද්ගලයෙකු නිසා සිදුවිය හැකි හානිය ගැන සාමාන්‍ය බුද්ධියක් ඇති අයෙකුට තක්සේරු කරගත හැකිය. එවැනි කෙනෙකු අත්අඩංගුවට ගත්තා නම්, තමන්ට කොවිඞ්-19 රෝග ලක්ෂණ ඇතැයි ප‍්‍රසිද්ධ මාධ්‍යයකට කියා ශ්වසන රෝහලක ප‍්‍රතිකාර කරමින් සිටින වෛද්‍යවරයෙකුට කෙබඳු පියවරක් ගත යුතුද? පොලීසිය දැනට ගෙන ඇති පියවර නම් දෑස් වසාගෙන සිටීමයි. වෛද්‍ය සභාව, සෞඛ්‍ය අමාත්‍යාංශය හා රජයේ වෛද්‍ය නිලධාරීන්ගේ සංගමයත් නොදැක්කා සේ සිටී. අප දන්නා හඳුනන වෛද්‍යවරුන් කිහිපදෙනෙක් මේ සිදුවීම පිළිබඳව තම කළකිරීම නිර්නාමිකව ප‍්‍රකාශ කළා පමණි.
වැලිසර රෝහලේ අධ්‍යක්ෂ වෛද්‍ය ඊ.ආර්. මොහොමඞ් තවුෆීක් ඉහත කී ප‍්‍රකාශයෙහි බරපතළකම දැක, එම වෛද්‍යවරයා ගෙන්වා දැඩිව අවවාද කර තිබුණත් ඉන් එහාට පියවරක් ගෙන තිබුණේ නැත.
වෛද්‍ය නිරෝෂ් සමරවික‍්‍රම ඉහත ප‍්‍රකාශය කර තිබුණේ හෙළ සුවය නම් ආයතනයේ ‘ව්‍යාපාර වුවමනා’ වෙනුවෙනි. වත්මන් ආණ්ඩුව හා එහි හිතවතුන් හෙළ සුවය ව්‍යාපාරයටත් එම ව්‍යාපාරය වෙනුවෙන් වැරදි ප‍්‍රකාශ නිකුත් කරන අයටවත් අත නොතබන බවට පැරණි අත්දැකීම් අනුව කිව හැකිය. එය ‘දේශපේ‍්‍රමී’ ව්‍යාපාරයක් ලෙස සලකන නිසා විය හැකිය.
පාදෙණියගේ දුම
මේ අතර කොවිඞ්-19 රෝගයට ප‍්‍රතිකාර ලෙස දුම් ඇල්ලීම සිදුකරන ලෙස ළමා රෝග විශේෂඥ වෛද්‍ය, රජයේ වෛද්‍ය නිලධාරීන්ගේ සංගමයේ සභාපති අනුරුද්ධ පාදෙණිය උපදෙස් තිබේ. ඔහු කියන්නේ තමන් රජයෙන් පත්කළ විශේෂ පර්යේෂණ කමිටුවක ප‍්‍රධානියා බවයි. එම පර්යේෂණ කමිටුවේ මතයක් ලෙස ඔහු ‘දුම් හට්ටි’ ප‍්‍රවර්ධනය කර ඇත.
විද්‍යාව ‘පර්යේෂණය’ යන වචනය සෙල්ලමට පාවිච්චි නොකරයි. අනෙක් අතට විද්‍යාත්මක පර්යේෂණයක පවා අඩුපාඩු තිබිය හැකිය. ඒ නිසා අනුරුද්ධ පාදෙණිය වෛද්‍යවරයා කියන ‘පර්යේෂණ’ ගැන ඉදිරියේදී කතාකළ යුතුය.
එහෙත් අප විශේෂයෙන් පෙන්වාදිය යුතු කාරණය වන්නේ ළමා රෝග විශේෂඥ වෛද්‍යවරයෙකු වන අනුරුද්ධ පාදෙණිය මහතා නිර්දේශ කරන දුම් හට්ටිය ගැන ලංකාවේ ආයුර්වේද දෙපාර්තමේන්තුවේ සිටින වගකිව යුතු ආයුර්වේද විශේෂඥ වෛද්‍යවරුන්ට තිබෙන්නේ වෙනස් මතයක් වන බවය. බීබීසී සිංහල සේවය සමඟ අපේ‍්‍රල් 13 වැනිදා සම්මුඛ සාකච්ඡුාවකට එක්වූ ආයුර්වේද කොමසාරිස් චතුර කුමාරතුංග පවසා තිබුණේ කොවිඞ්-19 දුම් ඇල්ලීම ඇතැම්විට හානිදායක විය හැකි බවය.
මේ සියල්ල මැද තවත් අපූරු කාරණයක් සිහියේ තබාගත යුතුය. ඒ වෛද්‍ය අනුරුද්ධ පාදෙණිය දේශීය ප‍්‍රතිකාර ක‍්‍රම ගැන කියද්දී, එයින් හෙළ සුවය නම් පෞද්ගලික ආයතනයට වාසි ලැබීමය. මීට පෙර අනුරුද්ධ පාදෙණිය මහතා කිරිපිටි වර්ගවල ඇති විෂ සහිත බව ගැන කතාකරමින්, කැඳ පානය කරන්නැයි කියන විට උක්ත ආයතනයේ කැඳ වර්ගයක් වක‍්‍රාකාරව ප‍්‍රවර්ධනය විය.
දැන් ඔහු දුම් ඇල්ලීම ගැන කියන විට, ඒ පෞද්ගලික ආයතනයෙන් දුම් ඇල්ලීමට ‘ඖෂධ’ පැකට්ටුවක් යැයි කියමින් වෙළඳාමක් පටන්ගෙන තිබේ. ඇතැම් විට හෙළ සුවය හා වෛද්‍ය පාදෙණිය අතර සම්බන්ධය අහම්බයක් විය හැකිය.
හෙළ සුවය
හෙළ සුවය ප‍්‍රවර්ධනය වෙනුවෙන් පෙනී සිටින වෛද්‍යවරුන් ගණනාවක් සිටී. අනුරුද්ධ පාදෙණිය වෛද්‍යවරයා හෙළ සුවය ප‍්‍රවර්ධනය වෙනුවෙන් ඍජුව පෙනී ඉන්නේ නැති නිසා, වෛද්‍ය පාදෙණිය හෙළ සුවය සිතාමතා ප‍්‍රවර්ධනය කරන අයෙකු ලෙස හැඳින්විය නොහැක.
කෙසේ වෙතත් පැහැදිලිවම හෙළ සුවය මිනිසුන්ගේ අන්ධ විශ්වාස මත ආයෝජනය කර ලාභ ලබන ව්‍යාපාරයකි. එම ව්‍යාපාරයෙන් ඖෂධීය නිෂ්පාදන ලෙස ඉදිරිපත් කරන වෙළඳ භාණ්ඩ කිසිවකට කිසිදු විද්‍යාත්මක පදනමක් නැත. එවැන්නක් එම ව්‍යාපාරයට අයත් නිල වෙබ් අඩවියක හෝ නිල සමාජ මාධ්‍ය පිටුවක දක්නට නැත.
එහෙත් සමකාලීන සමාජයේ ඇති සෞඛ්‍ය ප‍්‍රශ්න ඉලක්ක කරමින්, ව්‍යාජ නිල පිළිගැනීමක් ලබාගෙන, මිනිසුන්ව රවටා භාණ්ඩ අලෙවි කිරීමට එම ව්‍යාපාරය සමත්ය. දේව මණ්ඩල ගැන, නාග ලෝකය ගැන කෙළවරක් නැති විකාර කතාන්දර ගොඩක් මේ කැඳ සහ දුම් හට්ටි අලෙවි කරන උදවිය සමාජගත කරයි. ඒ විකාරවල ඇත්ත නැත්ත ගැන අප මෙහි තර්ක කරන්නේ නැත. තර්ක කරන්නට හේතුවක්ද නැත.
‘හෙළ සුවය’ සිදු කරන්නේ ආයුර්වේද වෙදකම නොවන බවත් එය ”හෙළ නිල වෙදකම” බවත් එය තමන් දෙවිවරුන්ගෙන් ලැබෙන ඖෂධ වට්ටෝරු සමඟ තනිවම ආරම්භ කළ වෙදකමක් බවත් අපේ‍්‍රල් 13 වැනිදා ෆේස්බුක් පෝස්ටුවක් තබමින් හෙළ සුවය වෙළඳාමේ නිර්මාතෘ ලෙස පෙනීසිටින ප‍්‍රියන්තා සේනානායක කියා තිබේ.
‘දිව්‍ය ලෝක නාග ලෝක බ‍්‍රහ්ම ලෝකවලට සම්බන්ධ වෙලා තමයි වෙදකම පවතින්නේ. මමත් වෙදකම ඉගෙනගන්න යොමු වුණා. ඒක ඉගෙනගන්න කරන්න ඕනෑ භාවනා කිරීම. ඒ භාවනා කිරීමේදී යම් මට්ටමකට පැමිණියාම පත්වෙන්න පුළුවන්.’ මේ දුම් හට්ටිය ප‍්‍රවර්ධනය වෙනුවෙන් පෙනීසිටින වෛද්‍යවරයෙකු එසේ කියා තිබුණේ වසර ගණනාවක් වෛද්‍ය විද්‍යාලයක තමන් ලැබූ අධ්‍යාපනය දෙකේ කොළයට දමමින්ය.
හෙළ සුවය ප‍්‍රවර්ධනය වෙනුවෙන් කියන කතාන්දර ඇහෙද්දීම එය විකාරයක් බව නොවැටහෙන යමෙක් සිටී නම්, එවැන්නෙකුට ඇත්ත පහදා දීම වෙනුවෙන් තර්ක කර වැඩක් නැත. එය කාලය අපතේ හැරීමකි. අප කිව යුත්තේ මේ කැඳ හා දුම් හට්ටිවල ගුණදායක බව තහවුරු කිරීමට කිසිදු විද්‍යාත්මක පර්යේෂණයක් කර නැති බව පමණි.
එහෙත් වසර කිහිපයකට පෙර මහින්ද රාජපක්ෂ ජනාධිපතිවරයාගේ ආණ්ඩුව බලයේ සිටියදී හෙළ සුවයෙන් අලෙවි කරන ලද කැඳ වර්ගයකට රජයේ අනුග‍්‍රහය ලබාගැනීමට සමත් විය. වකුගඩු රෝගයට ගුණදායක යැයි කියමින් උතුරුමැද පළාතේ පාසල්වලට එම කැඳ වර්ගය අලෙවි කර තිබුණි. ඊට අමතරව කොළඹ රාජකීය විද්‍යාලයේ විදුහල්පතිවරයාගේ මැදිහත්වීමෙන් රාජකීය විද්‍යාලයට එම කැඳ වර්ගය අලෙවි කළේය.
පාසල්වලින් එම කැඳ වර්ගය මිලදී ගැනීම, කැඳ වර්ගය එදිනෙදා වෙළඳපොලේ අලෙවි කිරීම සඳහා ඔවුන් පාවිච්චි කළ ප‍්‍රධාන වෙළඳ ප‍්‍රචාරක උපක‍්‍රමයක් විය. එහෙත් එම කැඳ වර්ගය රජයේ අනුග‍්‍රහයෙන් ප‍්‍රවර්ධනයට පෙර කැඳ වර්ගයේ ගුණාත්මකභාවය ගැන කිසිදු විද්‍යාත්මක පර්යේෂණයක් කර තිබුණේ නැත. කැඳ අලෙවි කරන අය ප‍්‍රසිද්ධියේම කීවේ නාථ දෙවියන් හීනෙන් පෙනී සිට කියූ වට්ටෝරුවක් මත එම කැඳ නිපදවූ බවය. මේ වන විට හෙළ සුවය කැඳ වට්ටෝරුව අන්තර්ජාලයේ විකිණෙන්නේ රුපියල් 555කටය.
වෙනස වන්නේ වසර කිහිපයකට පෙර වකුගඩු රෝගය අල්ලාගෙන ව්‍යාපාර කළ හෙළ සුවය කණ්ඩායම දැන් කොවිඞ්-19 ගෝලීය වසංගතය අල්ලාගෙන ව්‍යාපාර කිරීමට පටන්ගෙන තිබීමය.
හෙළ සුවය වෙබ් අඩවියේ රුපියල් 280ක මිලට දුම් හට්ටිය විකුණන්නට ඇත. සුපුරුදු ලෙස පැකට්ටුවේ ඇත්තේ වටින්නේ නැති ශාකමය අමුද්‍රව්‍ය කිහිපයකි.
සිළුමිණ, අරුණ, මව්බිම යන පුවත්පත් සහ හිරු ටීවී යන මාධ්‍ය ආයතන මේ ජාවාරම ප‍්‍රවර්ධනය කරන අන්දමේ ලිපි සහ පුවත් පළකර ඇත.
පළමු රෝගියා
අප මුලින් කී පරිදි භයානක කාරණය වන්නේ මේ ‘හෙළ සුවය’ ජාවාරම සඳහා කොවිඞ්-19 වසංගතයට ප‍්‍රතිකාර කරන රාජ්‍ය යාන්ත‍්‍රණය අවභාවිත කරමින් සිටීමය. එසේ කිරීමෙන් තර්ක බුද්ධියක් ඇති මිනිසුන්ට රාජ්‍ය යාන්ත‍්‍රණය පිළිබඳ අවිශ්වාසයක් ඇති වීමය.
අප මුලින් කී වෛද්‍ය නිරෝෂ් සමරවික‍්‍රමගේ කතාව හෙළ සුවය දුම් හට්ටි විකුණන්නට දැන් පාවිච්චි කරන ප‍්‍රධාන ප‍්‍රචාරක උපක‍්‍රමයක් වී ඇත. ඊට අමතරව කොවිඞ්-19 වැළඳුණු පළමු රෝගියාට සුවය ලැබුණේ මේ දුම් හට්ටිය නිසා බවත් එම ප‍්‍රචාරක කටයුතු සඳහා කියමින් සිටී.
ව්‍යාජ පුවත්වලට ක‍්‍රියාත්මක වෙනවායැයි කියන නීතිය මේවා හමුවේ සද්දයක් නැත. රජයේ වෛද්‍යවරුන් මේ ජාවාරමට ප‍්‍රසිද්ධියේ සම්බන්ධ වුණත් වෛද්‍ය සභාව, සෞඛ්‍ය අමාත්‍යාංශය වැනි ආයතනද නිහ`ඩය.
ආයුර්වේදය
ඒ අතරේ මේ විකාරවලට යම් පිළිතුරක් හෝ ලබාදී තිබුණේ ශ‍්‍රී ලංකාවේ ආයුර්වේද වෛද්‍යවරුන්ය.ආයුර්වේද විශේෂඥ වෛද්‍ය ටී. වීරරත්න හිරු ටීවී ප‍්‍රවෘත්ති වෙබ් අඩවිය වෙත සම්මුඛ සාකච්ඡුාවක් ලබාදෙමින් මෙසේ කියා තිබුණි.
‘අපේ ආයුර්වේද වෛද්‍ය ක‍්‍රමය තුළ තියෙන ප‍්‍රතිකාර අංශ ගත්තාම දුම් ඇල්ලීමයි, ඔය කියන වෙනිවැල්ගැට කොත්තමල්ලි කියන්නේ සාගරයක් වගේ ආයුර්වේද ක‍්‍රමයෙන් දශම එකක්. ආයුර්වේද වෛද්‍ය ක‍්‍රමයේ පංචකර්ම චිකිත්සා විධි කියලා තියෙනවා. ඒ අතරේ පූර්ව කර්ම කියලා එක් ක‍්‍රමයක් තියෙනවා. ඒකේ එක කොටසක් තමයි දුම් ඇල්ලීම කියන්නේ. දුම් ඇල්ලීමත් හැම එක්කෙනෙකුටම කරන්න බැහැ. රෝග අවස්ථාව අනුව සිදු නොකළ යුතු අවස්ථා තියෙනවා. දුම් ඇල්ලීම තුළ රෝගියාගේ තත්වය උත්සන්න වෙන්න පුළුවන්.
දුම් ඇල්ලීම නිරෝගී පුද්ගලයන්ට කරන්න පුළුවන්. ඒත් අපි දැක්කා රෝගීන් සඳහාත් රෝහල්වල දුම් අල්ලනවා. යම් වෛද්‍ය විද්‍යාවක් සම්බන්ධයෙන් වෛද්‍ය උපදෙස් ලබාදීමත් නිවැරදිව සිදුකළ යුතු බව කියනවා. ඒ සඳහා අදාල සුදුසුකම්, දැනුම හා අධිකාරී බලය තියෙන අය තමයි කරන්න ඕනෑ. නොදන්නා අය කරන්න ගියාම ඇතිවන තීරණ නිසා බලපෑම් සිද්ධවෙන්න පුළුවන්.
මම ආයුර්වේද වෛද්‍යවරයෙක් හැටියට මගේ වගකීම තමයි ආයුර්වේද වෛද්‍ය ක‍්‍රමය සහ අදාල දේශීය වෛද්‍ය ක‍්‍රමවලින් ප‍්‍රතිකාර ලබාදීම සඳහා උපදෙස් ලබාදීම. එහෙම නැති කෙනෙක් ඒක කළාම, උපද්‍රවකාරී අවස්ථාවල දුම් ඇල්ලූවොත් රෝගය උත්සන්න වෙන්න පුළුවන්.’
ආයුර්වේද කොමසාරිස්වරයා මෙන්ම ශ‍්‍රී ලංකා ආයුර්වේද වෛද්‍ය සභාවේ සභාපතිවරයාද වන චතුර කුමාරතුංග බීබීසී සිංහල සේවය වෙත අදහස් පළකරමින් මෙසේ කියා තිබුණි.
‘නිරෝගි පුද්ගලයෙකුට නම් කැඳ පානය හා දුම් ඇල්ලීම ගැන ගැටලූවක් නැහැ මොකද තමන්ගේ ප‍්‍රතිශක්තීකරණය වර්ධනය කරගන්න කැඳ පානය ඉතාමත්ම හොඳයි. ඒ වගේම සාමාන්‍ය උණක් හෙම්බිරිස්සාවක් හැදුණාම අපි දුම් ඇල්ලීම කරනවා. නමුත් මේ රෝගී තත්වයත් එක්ක මාස තුනක් වගේ කාලයක් තමයි වෛරසය ගැන දැනුවත් වෙලා ඉන්නේ. ආයුර්වේද වෛද්‍ය ක‍්‍රමයක් අත්හදා බලන්න යනවානම් ඒ වගේ දේවල් මේ වෙලාවේ නුසුදුසුයි. ආයුර්වේද වෛද්‍යවරයෙකුගේ අධීක්ෂණය යටතේ තමයි ප‍්‍රතිකාර කරන්න ඕනෑ.
විවිධ කැඳ වර්ග තියෙනවා. මුගුණුවැන්න, හාතාවාරිය වගේ කැඳ වර්ග සමහර වෙලාවට සෙම අවුස්සන කැඳ වර්ග වෙන්න පුළුවන්. ඒ වගේ දේවල්වලට මේ වගේ කැඳවර්ග අහිතකර වෙන්න පුළුවන්. රෝගියාට නිර්දේශයක් කරන්න ඕනෑ ගැළපෙන්නේ මොනවගේ කැඳ වර්ගයක්ද? හුමාලය අල්ලන්න ඕනෑ කොළ වර්ගයත් තෝරාගත යුතුයි.
සමාජ මාධ්‍ය ජාලා ඔස්සේ විවිධ ඖෂධ වර්ග සුදුසුයි කියලා නිර්දේශ කරන්න ඕනෑ. සායනික පරීක්ෂණ කරලා අවශ්‍ය විදියට වටපිටාව සකසාගෙන ප‍්‍රතිකාර කරන්න ඕනෑ. අපරීක්ෂාකාරී ඖෂධ භාවිතයෙන් වඩා වැඩි රෝග තත්වයක් ඇති වෙන්න පුළුවන්.’
ආයුර්වේද වෛද්‍ය විද්‍යාව හැදෑරූ වෛද්‍යවරුන් එසේ කියන අතරතුර ව්‍යාජ කතාන්දර කියමින් ප‍්‍රසිද්ධියේ ජාවාරම් සිදුකරන පුද්ගලයන් ගැන අපට ගැටලූවක් නැත. ගැටලූව ඇත්තේ ඒ ජාවාරම් හමුවේ නිරෝධායන පනත ඇතුළු නීතිරීති ක‍්‍රියාත්මක නොකරන පොලීසිය ඇතුළු රාජ්‍ය යාන්ත‍්‍රණය ගැනය.
