– සමාජ හුවමාරු තත්වය ගැන අවදානමක්
– පරීක්ෂණ වැඩි කරන්නැයි විශේෂඥයෝ කියති
පිළියන්දල ප‍්‍රදේශයෙන් වාර්තා වූ රෝගියා, කොළඹ 12, බණ්ඩාරනායක මාවතෙන් වාර්තා වූ රෝගීන් ඇතුළු කොවිඞ්-19 රෝගීන් කණ්ඩායම්වලට වෛරසය ආසාදනය වූණේ කෙලෙසදැයි තවම තහවුරු කරගෙන නොමැතිි නිසා කොවිඞ්-19 වසංගතයේ භයානක තත්වය වන සමාජ හුවමාරු තත්වයට ඉදිරියේදී ශ්රී ලංකාව ගමන් කරනු ඇතිදැයි සැකයක් ඇතිව තිබෙන බව සෞඛ්‍ය ක්ෂේත‍්‍රයේ නිලධාරීහු කිහිපදෙනෙක් පැවසූහ.
දැනට කරන පරීක්ෂණ සංඛ්‍යාව දිනකට පරීක්ෂණ 600ක් පමණ බවත්, එම සංඛ්‍යාව මෙන් කිහිපගුණයක් පරීක්ෂණ කළ යුතු බවත්, සමාජයෙහි සිටින ආසාදිතයන් වැඩි වේගයකින් හඹා යා යුතු බවත් ඔවුහු පැවසූහ.
අනිද්දා සමඟ නිර්නාමිකව අදහස් දැක්වූ සෞඛ්‍ය අමාත්‍යාංශයේ නිලධාරියෙක්, සෞඛ්‍ය වෛද්‍ය නිලධාරීවරයෙක් සහ මහජන සෞඛ්‍ය පරීක්ෂකවරු කිහිපදෙනෙක් ඇතුළු නිලධාරීහු කිහිපදෙනෙක් මෙම තත්වය පිළිබඳව අනතුරු හැඟවීම් සිදුකළෝය.
බණ්ඩාරනායක මාවතෙන් හමුවූ පළමු රෝගී කාන්තාව ඉන්දියාවේ සිට පැමිණි කාන්තාවක නිසා ඇගෙන් අනෙකුත් පුද්ගලයන්ට රෝගය ආසාදනය වී ඇතැයි දැනට විශ්වාස කරන නමුත්, එම කාන්තාවට රෝගය ඇතැයි තහවුරු වී තිබුණේ ඉන්දියාවේ සිට පැමිණ දින 31කට පසුවය. ඒ අනුව ඇයට ලංකාවේදී රෝගය බෝවී ඇතිදැයි සැකයක් පවතින බව අනිද්දා සමඟ අදහස් දැක්වූ නිලධාරීහු පැවසූහ.
මේ අතර ඬේලි මිරර් පුවත්පතේ වෙබ් අඩවිය වාර්තා කර තිබුණේ පිළියන්දල ප‍්‍රදේශයෙන් වාර්තා වූ රෝගියාට කොවිඞ්-19 වෛරසය ආසාදනය වුණේ කෙලෙසදැයි තහවුරු වී නොමැති බවය. එම රෝගියා සමඟ ආශ‍්‍රය කළ කොවිඞ්-19 ඇතැයි තහවුරු වූ පුද්ගලයෙකු නොමැති බවත්, ඕස්ටේ‍්‍රලියාවේ සිට පැමිණි එම රෝගියාගේ සහෝදරයාට කොවිඞ්-19 නොමැති බව පරීක්ෂණයකින් තහවුරු වූ බවත් ඬේලි මිරර් පුවත්පත වාර්තා කර ඇත.
පිළියන්දල ප‍්‍රදේශයෙන් හමුවූ රෝගියා පිළියන්දල, වෑතර මාළු අලෙවිසැලේද සේවය කර ඇති අතර, රෝගය තිබියදී මාළු වෙළඳසැලට ගොස් ඇතැයි හෙළිවී තිබේ. මේ වන විට එම රෝගියා සමඟ ආශ‍්‍රය කළ 81 දෙනෙකු නිරෝධායනය සඳහා යොමුකර ඇති අතර ඔවුන් පරීක්ෂාවට ලක් කිරීමද ආරම්භ කර ඇත.
මාළු අලෙවිසැලේ සිට කෙතරම් දුරට රෝගය පැතිර ගොස් තිබේදැයි තවම නිශ්චිතව හඳුනාගෙන නොමැත.
පවතින තත්වය යටතේ හැකි ඉක්මනින් රෝගය පාලනය කරගැනීමට නම් දැනට කරන පරීක්ෂණ ප්රමාණය විශාල වශයෙන් වැඩි කිරීමත්, විවිධ පරීක්ෂණ ක‍්‍රම පාවිච්චි කිරීමත්, සමාජය හඹා ගොස් පරීක්ෂණ සිදුකිරීමත් ඇතුළු ක්රියාමාර්ග ගත යුතු බව වෛද්‍ය රසායනාගාර විද්‍යා වෘත්තියවේදීන්ගේ විද්වත් ආයතනයේ සභාපති රවී කුමුදේශ් පැවසීය.
ඔහු ප්රකාශ කළේ දැනට පෙනී යන ආකාරයට, දැනටමත් සමාජ හුවමාරු තත්වයක් නොමැති බව ප්රකාශ කිරීමත් අසීරු බවය. සමාජ කොටස් අතර රෝගය පැතිර යන බවත් වහා ක්රියාත්මක විය යුතු බවත් ඔහු කීය.
තමන්ද සාමාජිකත්වය දරන, කොවිඞ්-19 පරීක්ෂණ පැවැත්වීම පිළිබඳව නිර්දේශ ඉදිරිපත් කිරීම සඳහා සෞඛ්‍ය අමාත්‍යාංශය පත්කළ විශේෂඥ කමිටුවෙන් කාර්යක්ෂමව පරීක්ෂණ කිරීමට අදාළව නිර්දේශ රැසක් ඉදිරිපත් කර ඇති බවද ඔහු පෙන්වාදුන්නේය.
හඳුනාගත් පුද්ගලයන්ගේ සාම්පල් ලබාගෙන, පරීක්ෂණ කිරීම සඳහා දැනට ගෙනයන ක‍්‍රියාකාරීත්වය කාර්යක්ෂම නොවන බවත් ජංගම රසායනාගාර සේවාවක් ක්රියාත්මක කොට සමාජයෙහි සිටින රෝගීන් හඹා යා යුතු බවත් ඔහු පැවසීය. දැනට පරීක්ෂණ වැඩි සංඛ්‍යාවක් සිදුකරන වෛද්‍ය පර්යේෂණ ආයතනය රෝග ලක්ෂණ පෙන්වන පුද්ගලයන් පරීක්ෂා කිරීමට වෙන් කොට, කොළඹ ජාතික රෝහල වැනි වෙනම ස්ථානයක් කේන්ද්‍ර කරගනිමින් සමාජයේ සිටින රෝග ලක්ෂණ නොමැති ආසාදිතයන් පරීක්ෂාවට ලක් කළ යුතු බව ඔහු කීය.
තරිඳු උඩුවරගෙදර/ රේඛා නිලූක්ෂි හේරත්
