කොකේන් ග්‍රෑම් 1,200කට අධික ප්‍රමාණයක් සන්තකයේ තබා ගැනීම සහ ජාවාරම් කිරීම සම්බන්ධයෙන් ප්‍රධාන පෙළේ මත්ද්‍රව්‍ය ජාවාරම්කරුවෙකු බවට චෝදනා එල්ල වී ඇති ශිරාන් බාසික් ඇතුළු විත්තිකරුවන් තිදෙනෙකුට එරෙහිව පවරා ඇති නඩුව වැඩිදුර පූර්ව නඩු විභාග සම්මන්ත්‍රණයක් සඳහා 2027 ජනවාරි 25 වැනිදා යළි කැඳවීමට කොළඹ මහාධිකරණය නියෝග කර තිබේ.
කොළඹ මහාධිකරණ විනිසුරු නයෝමි වික්‍රමසේකර මහත්මිය හමුවේ අද (11) මෙම නඩුව කැඳවනු ලැබිණි. දෙපාර්ශ්වය ඉදිරිපත් කළ කරුණු සලකා බැලීමෙන් අනතුරුව වැඩිදුර පූර්ව නඩු විභාග සම්මන්ත්‍රණයක් සඳහා නඩුව ජනවාරි 25 වැනිදා යළි කැඳවීමට විනිසුරුවරිය නියෝග කර ඇත.
කොකේන් ග්‍රෑම් 1,200කට අධික ප්‍රමාණයක් සන්තකයේ තබා ගැනීම සහ ජාවාරම් කිරීම සම්බන්ධයෙන් විත්තිකරුවන් තිදෙනාට එරෙහිව නීතිපතිවරයා විසින් මෙම නඩුව ගොනු කර තිබේ. වෙනත් කොකේන් සන්තකයේ තබා ගැනීමේ නඩුවක් සම්බන්ධයෙන් මේ වන විට රක්ෂිත බන්ධනාගාරගතව සිටින ශිරාන් බාසික්වද මෙම නඩුවේ විත්තිකරුවෙකු ලෙස නම් කර ඇත.
