හිටපු පාර්ලිමේන්තු මන්ත්‍රී හිරුණිකා ප්‍රේමචන්ද්‍ර මහත්මියට නියම කළ සිරදඬුවමට එරෙහිව ගොනුකර ඇති අභියාචනය විභාග කිරීම සඳහා අභියාචනාධිකරණ සභාපතිවරයා විසින් ත්‍රිපුද්ගල විනිසුරු මඬුල්ලක් පත්කර තිබේ.
අදාළ නඩුවේ තීන්දුව සලකා බැලීමේදී විනිසුරුවරුන් අතර මතභේදයක් ඇතිවීම හේතුවෙන් වැඩිදුර පියවර ගැනීම සඳහා එම අභියාචනය අභියාචනාධිකරණ සභාපතිවරයා වෙත යොමු කර තිබිණි. ඒ අනුව අද (11) අභියාචනාධිකරණ සභාපති විනිසුරු රොහාන්ත අබේසූරිය මහතා හමුවේ අභියාචනය කැඳවූ අවස්ථාවේදී, එය විභාග කිරීම සඳහා ත්‍රිපුද්ගල විනිසුරු මඬුල්ලක් පත්කර ඇත.
අභියාචනාධිකරණ සභාපති විනිසුරු රොහාන්ත අබේසූරිය මහතා සමඟ විනිසුරුවරුන් වන පී. කුමාරරත්නම් සහ ප්‍රදීප් හෙට්ටිආරච්චි යන මහත්වරුන් එම විනිසුරු මඬුල්ලට ඇතුළත් වෙති. අදාළ අභියාචනය 2027 ජනවාරි 21 වැනිදා එම ත්‍රිපුද්ගල විනිසුරු මඬුල්ල හමුවේ විභාගයට ගැනීමට ද අධිකරණය නියෝග කර තිබේ.
2015 දෙසැම්බර් 21 වැනිදා දෙමටගොඩ ප්‍රදේශයේ වෙළෙඳසලක සේවය කළ තරුණයෙකු ඩිෆෙන්ඩර් රථයක් භාවිත කර පැහැරගෙන යාම, නීති විරෝධී ලෙස රඳවා තබා ගැනීම සහ පහරදීම ඇතුළු චෝදනාවලට වරදකරු කරමින් කොළඹ මහාධිකරණය හිරුණිකා ප්‍රේමචන්ද්‍ර මහත්මියට වසර තුනක බරපතළ වැඩ සහිත සිරදඬුවමක් සහ දඩයක් නියම කර තිබිණි.
එම වරදකරු කිරීම සහ දඬුවම අහෝසි කර තමන් සියලු චෝදනාවලින් නිදොස් කොට නිදහස් කරන ලෙස ඉල්ලා හිරුණිකා ප්‍රේමචන්ද්‍ර මහත්මිය අභියාචනයක් ගොනුකර තිබේ.
