හිටපු ජනාධිපති රනිල් වික්‍රමසිංහ මහතා සහ හිටපු ජනාධිපති ලේකම් සමන් ඒකනායක මහතාට එරෙහිව රුපියල් මිලියන 16.6කට අධික රාජ්‍ය මුදල් අවභාවිත කළ බවට එල්ල වී ඇති චෝදනා සම්බන්ධයෙන් අපරාධ පරීක්ෂණ දෙපාර්තමේන්තුව ගොනු කළ නඩුව අද (11) කොළඹ කොටුව මහේස්ත්‍රාත් අධිකරණයේදී යළි කැඳවීමට නියමිතය.
නඩුව අද කැඳවනු ලබන්නේ ඉදිරි නීතිමය ක්‍රියාමාර්ග සම්බන්ධයෙන් නීතිපතිවරයා ලබාදී ඇති උපදෙස් පිළිබඳ යාවත්කාලීන තොරතුරු අධිකරණයට දැනුම්දීම සඳහාය.
2023 වසරේදී හිටපු ජනාධිපති රනිල් වික්‍රමසිංහ මහතා සිය බිරිඳගේ උපාධි ප්‍රදානෝත්සවයට සහභාගී වීම සඳහා එක්සත් රාජධානියට ගිය අවස්ථාවට අදාළව රාජ්‍ය මුදල් අවභාවිත කළ බවට මෙම චෝදනා එල්ල වී තිබේ. මහජන දේපළ පනත යටතේ හිටපු ජනාධිපතිවරයාට සහ ඔහුගේ හිටපු ජනාධිපති ලේකම්වරයාට එරෙහිව මෙම නඩුව ගොනු කර ඇත.
පසුගිය ඔක්තෝබර් 30 වැනිදා නඩුව කැඳවූ අවස්ථාවේදී හිටපු ජනාධිපති රනිල් වික්‍රමසිංහ මහතා සහ සමන් ඒකනායක මහතා අධිකරණය හමුවේ පෙනී සිටියහ. එහිදී විමර්ශනවල ප්‍රගතිය සහ නීතිපතිවරයාගේ උපදෙස් ලබාගැනීමේ අවශ්‍යතාව සලකා බැලූ මහේස්ත්‍රාත්වරයා නඩුව අද (11) යළි කැඳවීමට නියෝග කර තිබිණි.
මේ අතර අදාළ චෝදනා සම්බන්ධයෙන් සිදුකළ විමර්ශන අවසන් කර ඇති බව අපරාධ පරීක්ෂණ දෙපාර්තමේන්තුව මීට පෙර අධිකරණයට දැනුම් දී තිබිණි. වැඩිදුර ක්‍රියාමාර්ග සඳහා අදාළ විමර්ශන ගොනු සහ ලේඛන නීතිපතිවරයා වෙත යොමු කර ඇති බව ද එම දෙපාර්තමේන්තුව සඳහන් කර තිබේ.
ඒ අනුව, නීතිපතිවරයාගේ උපදෙස් සහ නඩුව සම්බන්ධයෙන් ගනු ලබන ඉදිරි ක්‍රියාමාර්ග පිළිබඳව අද අධිකරණයට දැනුම්දීමට නියමිතය.
