2025 වසර සඳහා පැවැත්වූ 27 වැනි ජනමාධ්‍ය විශිෂ්ටතා සම්මාන උළෙලේදී ‘අනිද්දා’ පුවත්පත සම්මාන තුනකින් පිදුම් ලබා තිබේ.
නොවැම්බර් 10 කොළඹ සිනමන් ග්‍රෑන්ඩ් හෝටලයේදී පැවැති මෙම සම්මාන උළෙලේදී ‘අනිද්දා’ පුවත්පතේ මාධ්‍යවේදීනි එච්.එම්. රේඛා නිලුක්ෂි 2025 වර්ෂයේ සිංහල භාෂා අංශයේ වසරේ විශිෂ්ටතම විශේෂාංග ලේඛකයාට හිමි උපාලි විජේවර්ධන සම්මානය දිනාගෙන තිබුණු අතර සමාජ ගැටලු පිළිබඳ වාර්තාකරණය වෙනුවෙන් පිරිනැමෙන සුබ්‍රමනියම් චෙට්ටියාර් සම්මානයේ කුසලතා ඇගයීමක් ද ඇයට හිමිව ඇත.
සිංහල භාෂා අංශයේ වසරේ විශිෂ්ටතම පාරිසරික වාර්තාකරුට හිමි සම්මානය අනිද්දා පුවත්පතේ මාධ්‍යවේදී අරුණ ලක්ෂ්මන් විසින් දිනාගෙන තිබිණි.
මෙවර සම්මාන උළෙලේදී ජීවිතයේ එක්වරක් පමණක් පිරිනැමෙන සම්මාන (Lifetime Achievement Awards) චන්ද්‍රා ප්‍රනාන්දු, අනුර බණ්ඩාර රාජගුරු, ඩබ්ලිව්. කේ. ජී. නවරත්න, රොහාන් අබේවර්ධන සහ අශෝක ගුණතිලක යන මහත්ම මහත්මීන්ට පිරිනමනු ලැබීය.
මෙම සම්මාන උළෙලේ ප්‍රධාන ආරාධිතයා ලෙස තොරතුරු දැනගැනීමේ කොමිෂන් සභාවේ කොමසාරිස්, නීතිඥ කිෂාලි පින්ටෝ-ජයවර්ධන මහත්මිය සහභාගී වී තිබුණු අතර මෙවර සම්මාන උළෙලේදී සම්මාන 27ක් සහ කුසලතා ඇගයීම් 16ක් පිරිනමා ඇත.
