එයාර්බස් ගනුදෙනුව සම්බන්ධයෙන් එල්ල වී ඇති අල්ලස් චෝදනාවට අදාළව පාර්ලිමේන්තු මන්ත්‍රී නාමල් රාජපක්ෂ මහතා ඔක්තෝබර් 29 වැනිදා ස්ථිර ත්‍රිපුද්ගල මහාධිකරණ විනිසුරු මඩුල්ල හමුවට ඉදිරිපත් කරන තෙක් රඳවා තැබීමට කොළඹ ප්‍රධාන මහේස්ත්‍රාත් අසංග එස්. බෝදරගම මහතා අද (27) නියෝග කළේය.
තවද නාමල් රාජපක්ෂ මහතාට එරෙහිව චෝදනා 24ක් ඇතුළත් අධිචෝදනා පත්‍රයක් නීතිපතිවරයා විසින් කොළඹ ස්ථිර ත්‍රිපුද්ගල මහාධිකරණය හමුවේ ගොනු කරනු ලැබ ඇති බව කොළඹ ප්‍රධාන මහේස්ත්‍රාත් අධිකරණයට දැනුම් දී තිබිණි.
නියෝජ්‍ය සොලිසිටර් ජනරාල් ජනක බණ්ඩාර මහතා කොළඹ ප්‍රධාන මහේස්ත්‍රාත් අසංග එස්. බෝදරගම මහතා හමුවේ මේ බව දැනුම් දුන්නේය.
අදාළ අධිචෝදනා පත්‍රයට සාක්ෂිකරුවන් 59 දෙනකු ඇතුළත් කර ඇති බව ද නියෝජ්‍ය සොලිසිටර් ජනරාල්වරයා අධිකරණයට දැනුම් දුන්නේය.
අදාළ සිද්ධිය සම්බන්ධයෙන් නාමල් රාජපක්ෂ මහතාට එරෙහිව ස්ථිර ත්‍රිපුද්ගල මහාධිකරණය හමුවේ අධිචෝදනා ගොනු කර ඇති බැවින්, සැකකරු සම්බන්ධයෙන් තවදුරටත් නියෝග නිකුත් කිරීමට මහේස්ත්‍රාත් අධිකරණයට බලයක් නොමැති බව මහේස්ත්‍රාත්වරයා ප්‍රකාශ කළේය.
සැකකරුට ඇප ලබාදීම සාධාරණීකරණය කළ හැකි සුවිශේෂී කරුණු කිසිවක් ඉදිරිපත් කර නොමැති බැවින් ඇප ලබාදිය නොහැකි බව ද මහේස්ත්‍රාත්වරයා සඳහන් කළේය.
ඒ අනුව නාමල් රාජපක්ෂ මහතා හෙට (28) ස්ථිර ත්‍රිපුද්ගල මහාධිකරණය හමුවට ඉදිරිපත් කරන තෙක් රඳවා තැබීමට නියෝග කළ අතර අදාළ නඩුවේ අධිචෝදනා එම අධිකරණය හමුවේ ගොනු කර ඇති බැවින්, ඇප ලබාදීම හෝ රක්ෂිත බන්ධනාගාරගත කිරීම සම්බන්ධයෙන් තවදුරටත් නියෝගයක් නිකුත් කිරීමේ හැකියාව මහේස්ත්‍රාත් අධිකරණයට නොමැති බව ද අධිකරණය පැහැදිලි කළේය.
