හිටපු අමාත්‍ය ප්‍රේමලාල් ජයසේකර මහතා අත්අඩංගුවට ගෙන අධිකරණයට ඉදිරිපත් කරන ලෙස ශ්‍රේෂ්ඨාධිකරණය විවෘත වරෙන්තුවක් නිකුත් කිරීමට නියෝග කර තිබේ.
අදාල විවෘත වරෙන්තුව මෙසේ නිකුත් කර ඇත්තේ ඔක්තොබර් 21 දින අධිකරණය හමුවේ පැවැති නඩු විභාගයකට ඒ මහතා පෙනී නොසිටීම හේතුවෙනි. අපරාධ පරීක්ෂණ දෙපාර්තමේන්තුවේ අධ්‍යක්ෂවරයා මාර්ගයෙන් අදාළ වරෙන්තුව නිකුත් කරන ලෙස අධිකරණය නියෝග කර ඇති අතර, එය කඩිනමින් ක්‍රියාත්මක කිරීම සඳහා අවශ්‍ය සියලු පියවර ගන්නා ලෙස පොලිස්පතිවරයාට ද දැනුම් දී තිබේ.
තවද අද දින අධිකරණය හමුවේ පෙනී සිටි නඩුවේ සෙසු විත්තිකරුවන් දෙදෙනා රක්ෂිත බන්ධනාගාරගත කිරීමට ද නියෝග කර ඇත.
2015 ජනාධිපතිවරණ සමයේදී එවකට ජනාධිපති අපේක්ෂක මෛත්‍රීපාල සිරිසේන මහතාගේ මැතිවරණ ප්‍රචාරක රැලියක් කහවත්තේදී පැවැත්වෙමින් තිබියදී සිදු වූ වෙඩි තැබීමකින් පුද්ගලයකු මියගොස් තිබුණු අතර එම සිද්ධිය සම්බන්ධයෙන් වරදකරුවන් බවට තීරණය කළ ප්‍රේමලාල් ජයසේකර මහතා ඇතුළු විත්තිකරුවන් තිදෙනකුට රත්නපුර මහාධිකරණය මරණීය දණ්ඩනය නියම කර තිබිණි. කෙසේ වෙතත්, එම තීන්දුවට එරෙහිව ඉදිරිපත් කළ අභියාචනා විභාග කිරීමෙන් පසු අභියාචනාධිකරණය විසින් ජයසේකර මහතා ඇතුළු තිදෙනා නිදොස් කොට නිදහස් කරනු ලැබීය.
අභියාචනාධිකරණයේ එම තීරණයට එරෙහිව අගතියට පත් පාර්ශ්වය විසින් ශ්‍රේෂ්ඨාධිකරණයට අභියාචනයක් ඉදිරිපත් කර තිබුණු අතර එහි විභාගය සැප්තැම්බර් 4 වැනිදා අවසන් කළ ශ්‍රේෂ්ඨාධිකරණය, විත්තිකරුවන් තිදෙනාට අද අධිකරණය හමුවේ පෙනී සිටින ලෙස දැනුම් දී තිබිණි.
නඩුව අද කැඳවූ අවස්ථාවේදී ප්‍රේමලාල් ජයසේකර මහතා අධිකරණයට නොපැමිණීම හේතුවෙන් මෙම නියෝගය ලබා දී ඇත. ඔහු මේ වන විට විදේශගතව සිටින බව නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් ජනක බණ්ඩාර මහතා අධිකරණයට දැනුම් දී තිබේ. අගවිනිසුරු ප්‍රීති පද්මන් සූරසේන මහතා සහ අචල වෙංගප්පුලි හා ගිහාන් කුලතුංග යන විනිසුරුවරුන්ගෙන් සමන්විත ත්‍රිපුද්ගල විනිසුරු මඬුල්ල මෙම නියෝගය ලබා දී ඇත.
