ජානකී සිරිවර්ධනගේ ඇප ඉල්ලීම ප්‍රතික්ෂේපයි – නාමල්ගේ ඇප නියෝගය මීළඟ නඩු දිනයේදී
ක්‍රිෂ් සමූහ ව්‍යාපාරය සම්බන්ධ අල්ලස් ලබා ගැනීමේ සිද්ධියක් සම්බන්ධයෙන් රක්ෂිත බන්ධනාගාරගත කර සිටින පාර්ලිමේන්තු මන්ත්‍රී නාමල් රාජපක්ෂ මහතා සහ ක්‍රිෂ් සමූහ ව්‍යාපාරයේ හිටපු විධායක අධ්‍යක්ෂවරියක වන ජානකී සිරිවර්ධන මහත්මිය ලබන ඔක්තෝබර් 23 වැනිදා දක්වා තවදුරටත් රක්ෂිත බන්ධනාගාරගත කිරීමට කොළඹ ප්‍රධාන මහේස්ත්‍රාත් අධිකරණය නියෝග කර තිබේ.
අද අධිකරණය හමුවේ නඩුව කැඳවූ අවස්ථාවේදී ජානකී සිරිවර්ධන මහත්මිය වෙනුවෙන් ඉදිරිපත් කළ ඇප ඉල්ලීම ප්‍රතික්ෂේප කිරීමට කොළඹ ප්‍රධාන මහේස්ත්‍රාත් අසංග එස්. බෝදරගම මහතා නියෝග කර ඇති අතර නාමල් රාජපක්ෂ මහතා වෙනුවෙන් ඉදිරිපත් කර ඇති ඇප ඉල්ලීම සම්බන්ධ නියෝගය තවමත් සූදානම් නොමැති බැවින් එය මීළඟ නඩු දිනයේදී ප්‍රකාශයට පත් කරන බව ද මහේස්ත්‍රාත්වරයා අධිකරණය හමුවේ දැනුම් දී තිබේ.
ක්‍රිෂ් සමූහ ව්‍යාපාරයේ කටයුතුවලට අදාළව රුපියල් මිලියන 70ක අල්ලසක් ඉල්ලා සිටීම සහ ලබාගැනීම සම්බන්ධයෙන් එල්ල වී ඇති චෝදනා මත අල්ලස් හෝ දූෂණ චෝදනා විමර්ශන කොමිෂන් සභාව විසින් සැකකරුවන් දෙදෙනා අත්අඩංගුවට ගෙන අධිකරණයට ඉදිරිපත් කර තිබිණි. අදාල නඩුවේ වැඩිදුර කටයුතු ඔක්තෝබර් 23 වැනිදා සිදු කිරීමට නියමිතය.
