වෛද්‍ය තත්ත්වය පිළිබඳ වාර්තා ඉදිරිපත් කරන්නැයි අධිකරණයෙන් බන්ධනාගාර බලධාරීන්ට නියෝග
හිටපු ජනාධිපති ආර්යා ශිරන්ති රාජපක්ෂ මහත්මියට කොළඹ ශ්‍රී ලංකා ජාතික රෝහලේ හෘද රෝග ඒකකයේදී විවෘත හෘද සැත්කමක් සිදු කිරීමට නියමිත බව ඇය වෙනුවෙන් පෙනී සිටි නීතිඥවරු අද (13) අධිකරණයට දැනුම් දී තිබේ.
ඒ අනුව ඇයගේ වෛද්‍ය තත්ත්වය සහ ප්‍රතිකාර සම්බන්ධ අදාළ වාර්තා අධිකරණයට ඉදිරිපත් කරන ලෙස බන්ධනාගාර බලධාරීන්ට අධිකරණය නියෝග කර ඇත. සිරිලිය සවිය අරමුදලට සම්බන්ධ ගිණුමක සිදුවූ බව කියන මූල්‍ය අක්‍රමිකතා සහ ගනුදෙනු සම්බන්ධයෙන් සිදු කෙරෙන විමර්ශනයකට අදාළව ශිරන්ති රාජපක්ෂ මහත්මිය අල්ලස් හෝ දූෂණ චෝදනා විමර්ශන කොමිෂන් සභාව විසින් ඔක්තෝබර් 7 වැනිදා අත්අඩංගුවට ගනු ලැබීය.
අනතුරුව කොළඹ මහේස්ත්‍රාත් අධිකරණය ඇය ඔක්තෝබර් 13 වැනිදා දක්වා රක්ෂිත බන්ධනාගාරගත කිරීමට නියෝග කළේය. බන්ධනාගාරගතව සිටියදී ඇය අක්ෂි රෝගී තත්ත්වයක් හේතුවෙන් ඔක්තෝබර් 9 වැනිදා ජාතික අක්ෂි රෝහලට ද රැගෙන ගොස් තිබිණි. පසුව ඇය කොළඹ ජාතික රෝහලේ හෘද රෝග ඒකකයට ඇතුළත් කර තිබිණි.
