ශ්‍රී ලංකාවේ ගොඩනැගිලි ඉදිකිරීම් සඳහා රට පුරාම ක්‍රියාත්මක කළ හැකි පොදු ප්‍රමිතීන් හඳුන්වාදීමේ අරමුණින් මෙරට පළමු ශ්‍රී ලංකා ජාතික ගොඩනැගිලි කේතය (National Building Code of Sri Lanka) සකස් කිරීමට රජය පියවර ගෙන තිබේ.
ගොඩනැගිලිවල ආරක්ෂාව, ඉදිකිරීම්වල ගුණාත්මකභාවය, තිරසරභාවය සහ ආපදා ඔරොත්තු දීමේ හැකියාව ශක්තිමත් කිරීම මෙම වැඩසටහනේ අරමුණයි.
මෙම වැඩසටහන සම්බන්ධයෙන් සාකච්ඡාවක් ආරක්ෂක අමාත්‍යාංශයේදී ඔක්තෝබර් 8 වැනිදා පවත්වා ඇති අතර, එයට ආරක්ෂක අමාත්‍යංශයේ ලේකම්, විශ්‍රාමික ගුවන් හමුදාපති එයාර් වයිස් මාර්ෂල් සම්පත් තුයියකොන්ත මහතා, ජාතික ගොඩනැගිලි පර්යේෂණ ආයතනය (NBRI), ජාතික ක්‍රමසම්පාදන දෙපාර්තමේන්තුව, නාගරික සංවර්ධන අධිකාරිය (UDA) සහ ඉදිකිරීම් කර්මාන්ත සංවර්ධන අධිකාරිය (CIDA) යන ආයතනවල ජ්‍යෙෂ්ඨ නිලධාරීහු සහභාගි වී ඇත.
ජාතික ගොඩනැගිලි පර්යේෂණ ආයතනය විසින් ඉදිරිපත් කරන ලද ව්‍යාපෘති යෝජනාව 2026–2028 කාලසීමාව තුළ ක්‍රියාත්මක කිරීම සඳහා අනුමත කර තිබේ. ජනාධිපතිවරයා සහ ආරක්ෂක අමාත්‍යවරයා විසින් ඉදිරිපත් කරන ලද කැබිනට් පත්‍රිකාවක් මත 2025 ඔක්තෝබර් 21 වැනිදා මෙම ව්‍යාපෘතියට කැබිනට් අනුමැතියද හිමිව ඇත.
දැනට ශ්‍රී ලංකාවේ ගොඩනැගිලි ඉදිකිරීම් සඳහා නීත්‍යනුකූලව ස්ථාපිත කර ඇති තනි ජාතික ගොඩනැගිලි සංග්‍රහයක් නොමැති අතර ඒ වෙනුවට ජාත්‍යන්තර ගොඩනැගිලි සංග්‍රහය, යුරෝකේත, බ්‍රිතාන්‍ය ප්‍රමිතීන් සහ ඉන්දීය ප්‍රමිතීන් ඇතුළු විවිධ ජාත්‍යන්තර ප්‍රමිතීන් මෙන්ම දේශීය රෙගුලාසිද භාවිත කෙරේ.
මෙලෙස විවිධ ප්‍රමිතීන් භාවිත කිරීම හේතුවෙන් ගොඩනැගිලි සැලසුම් පරීක්ෂා කිරීමේදී, අනුමැතිය ලබාදීමේදී සහ නීති ක්‍රියාත්මක කිරීමේදී ඇතැම් විට නොගැළපීම් ඇතිවිය හැකි බව බලධාරීහු පෙන්වා දී ඇති අතර යෝජිත ජාතික සංග්‍රහය මගින් ජාත්‍යන්තර හොඳම භාවිතයන්ට අනුකූලව ශ්‍රී ලංකාවේ දේශගුණික, භූවිද්‍යාත්මක සහ පාරිසරික තත්ත්වයන්ට ගැළපෙන පොදු රාමුවක් ස්ථාපිත කිරීමට අපේක්ෂා කෙරේ.
ගංවතුර, නායයෑම් සහ දැඩි සුළං වැනි ස්වභාවික ආපදාවලට ශ්‍රී ලංකාව මුහුණදෙන බැවින් ගොඩනැගිලිවල ආරක්ෂාව සහ ආපදා ඔරොත්තු දීමේ හැකියාව වැඩිදියුණු කිරීමද මෙම සංග්‍රහයේ වැදගත් අරමුණක් වී ඇත.
යෝජිත සංග්‍රහයට ව්‍යුහාත්මක ආරක්ෂාව, ගිනි ආරක්ෂාව, තිරසරභාවය සහ සැමට ප්‍රවේශ විය හැකි පහසුකම් ඇතුළු ප්‍රධාන තාක්ෂණික ක්ෂේත්‍ර 10ක් ඇතුළත් වන බවත් ගොඩනැගිලි ඉදිකිරීම සඳහා බලපත්‍ර ලබාදීම, පරීක්ෂා කිරීම, ප්‍රමිතීන්ට අනුකූලතාව තහවුරු කිරීම සහ ඒවා බලාත්මක කිරීම සඳහා ප්‍රායෝගික ක්‍රමවේදද හඳුන්වාදීමට නියමිත බවත් සඳහන් වේ..
මෙම ක්‍රියාවලිය සඳහා රාජ්‍ය ආයතන, වෘත්තීය සංවිධාන, විශ්වවිද්‍යාල හා අධ්‍යයන ආයතන, ඉදිකිරීම් ක්ෂේත්‍රයේ නියෝජිතයන් සහ මහජනතාවගේ අදහස් ලබාගැනීමටද සැලසුම් කර ඇත.
ජාතික ප්‍රසම්පාදන ඒජන්සියේ මාර්ගෝපදේශ අනුව තරගකාරී ප්‍රසම්පාදන ක්‍රියාවලියක් මගින් සුදුසු උපදේශක සමාගමක් තෝරාගැනීමට නියමිතය. එම සමාගමට පැවරෙන කාර්යය මාස 24ක කාලයක් තුළ අවසන් කිරීමට අපේක්ෂා කරන අතර, එහි අවසන් ප්‍රතිඵලය ලෙස ශ්‍රී ලංකාවේ ජාතික ගොඩනැගිලි සංග්‍රහය සකස් කර ගැසට් කිරීම සැලසුමයි.
මෙම ව්‍යාපෘතිය සඳහා ශ්‍රී ලංකා රජයේ ඒකාබද්ධ අරමුදලින් මුදල් සැපයීමට නියමිතය. ජාතික වශයෙන් වැදගත් වන මෙම කාර්යය සඳහා සුදුසු උපදේශක සමාගම්වලින් අභිලාෂ ප්‍රකාශ (Expressions of Interest) කැඳවීමටද ආරක්ෂක අමාත්‍යාංශය සහ ජාතික ගොඩනැගිලි පර්යේෂණ ආයතනය පියවර ගෙන තිබේ.
