හිටපු ජනාධිපති මහින්ද රාජපක්ෂ මහතාගේ බිරිඳ වන ශිරන්ති රාජපක්ෂ මහත්මිය ඔක්තෝබර් 13 වැනිදා දක්වා රක්ෂිත බන්ධනාගාරගත කිරීමට කොළඹ මහේස්ත්‍රාත් අධිකරණය අද (07) නියෝග කර තිබේ.
අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් අද පෙරවරුවේ කිරුළපන පූර්වාරාම පාරේ පිහිටි ඇයගේ නිවසේදී අත්අඩංගුවට ගැනීමෙන් අනතුරුව ඇය අධිකරණයට ඉදිරිපත් කර තිබිණි.
‘සිරිලිය සවිය අරමුදලට’ සම්බන්ධ ගිණුමක සිදුව ඇතැයි කියන මූල්‍ය අක්‍රමිකතා සහ ගනුදෙනු පිළිබඳ විමර්ශනයකට අදාළව පැය දෙකකට ආසන්න කාලයක් ප්‍රකාශයක් සටහන් කර ගැනීමෙන් පසුව ඇය අත්අඩංගුවට ගත් බව අල්ලස් කොමිසම සඳහන් කරයි. මේ අතර එම සිද්ධියට අදාළව අත්අඩංගුවට ගත් ජාතික ඉතිරි කිරීමේ බැංකුවේ හිටපු සභාපති සහ හිටපු අගවිනිසුරු ශිරාණි බණ්ඩාරනායක මහත්මියගේ සැමියා වන ප්‍රදීප් කාරියවසම් මහතාට අධිකරණය ඇප ලබාදී තිබේ.
ශිරන්ති රාජපක්ෂ මහත්මිය පසුගිය 05 වැනිදා රාත්‍රියේ ශ්‍රී ලංකාවට පැමිණ තිබූ අතර, ඔක්තෝබර් 13 වැනිදා මූල්‍ය අපරාධ විමර්ශන කොට්ඨාසය හමුවේ පෙනී සිටින ලෙස මීට පෙර දැනුම් දී තිබිණි. ඇය සැප්තැම්බර් 16 වැනිදා අලුයම වෛද්‍ය ප්‍රතිකාර සඳහා සිංගප්පූරුව බලා පිටත්ව ගොස් තිබූ බව සඳහන් වේ. ඊට පෙර සැප්තැම්බර් 15 වැනිදා අසනීප තත්ත්වයක් හේතුවෙන් කොළඹ පෞද්ගලික රෝහලකට ඇතුළත් කර තිබූ අතර පසුව රෝහලේ සිට සෘජුවම ගුවන් තොටුපළ වෙත රැගෙන ගිය බව වාර්තා විය.
මේ අතර, ‘සිරිලිය සවිය’ සංවිධානයේ මූල්‍ය කටයුතු සම්බන්ධයෙන් පැවැත්වෙන විමර්ශනයට අදාළව ඇය අත්අඩංගුවට ගැනීම වැළැක්වීම සඳහා ඇයගේ නීතිඥවරුන් විසින් පසුගිය 05 වැනිදා මාලිගාකන්ද මහේස්ත්‍රාත් අධිකරණයට අපේක්ෂිත ඇප අයදුම්පතක්ද ඉදිරිපත් කර තිබිණි.
