ගලගොඩඅත්තේ ඥානසාර හිමියන්ගේ බෞද්ධ භික්ෂු චීවරය ඉවත් නොකරන ලෙස කෝට්ටේ සංඝ සභාව බන්ධනාගාර කොමසාරිස් ජනරාල්වරයාගෙන් ඉල්ලා තිබේ.
කෝට්ටේ සංඝ සභාව විසින් ඔක්තොබර් 06දින බන්ධනාගාර කොමසාරිස් ජනරාල්වරයා වෙත ලිඛිතව ඉදිරිපත් කළ ඉල්ලීමක මේ බව සඳහන් කර ඇත.
ඥානසාර හිමියන් විනය පිටකයේ සඳහන් වන ආකාරයට චීවරය ඉවත් කිරීමට හේතුවන වරදක් හෝ වෙනත් බරපතළ උල්ලංඝනයක් සිදුකර ඇති බවට තම සංඝ සභාව වෙත කිසිදු තොරතුරක් නොමැති එම සභාව ලිපියේ සඳහන් කර ඇති අතර බුද්ධ ශාසනයේ සම්ප්‍රදායන් සහ මූලධර්ම අනුව සිදුකරන ඕනෑම විනය පරීක්ෂණයක් මෙන්ම, භික්ෂුභාවයෙන් ඉවත් කිරීම සම්බන්ධයෙන් තීරණය කිරීමද කෝට්ටේ සංඝ සභාවේ වගකීමක් බව එම ලිපියේ වැඩිදුරටත් සඳහන් කර තිබේ.
ඒ අනුව ඥානසාර හිමියන්ට බෞද්ධ භික්ෂු චීවරය තවදුරටත් දැරීමට අවසර ලබාදෙන ලෙසත්, අදාළ බලධාරීන් හමුවට චීවරයෙන් සැරසී පෙනී සිටීමට අවස්ථාව සලසන ලෙසත් කෝට්ටේ සංඝ සභාවේ ප්‍රධාන ලේකම් පූජ්‍ය ආචාර්ය කොටපිටියේ රාහුල අනුනායක හිමියන් බන්ධනාගාර කොමසාරිස් ජනරාල්වරයාගෙන් ඉල්ලා ඇත.
