උතුරු, නැගෙනහිර සහ වතුකරයේ ජනතාව නියෝජනය කරන විපක්ෂයේ පාර්ලිමේන්තු මන්ත්රීවරුන් සමඟ විශේෂ සාකච්ඡාවක් විපක්ෂ නායක සජිත් ප්රේමදාස මහතාගේ ප්රධානත්වයෙන් අද (10) පාර්ලිමේන්තුවේ පිහිටි විපක්ෂ නායක කාර්යාලයේදී පවත්වා ඇත.
වර්තමාන ආර්ථික තත්ත්වය හමුවේ එම ප්රදේශවල ජනතාව මුහුණ දෙන සමාජ, ආර්ථික හා ජීවන ගැටලු පිළිබඳව විපක්ෂ නායකවරයා මන්ත්රීවරුන්ගෙන් තොරතුරු සාකච්ඡා කර ඇති අතර ජනතාවගේ වත්මන් ජීවන තත්ත්වය, පවුල් ආදායම් මට්ටම්, උද්ධමනය සහ දෛනික ජීවන වියදම ඉහළ යාමෙන් ඇති වී තිබෙන බලපෑම් මෙන්ම යටිතල පහසුකම් සම්බන්ධ ගැටලු පිළිබඳව මෙහිදී අවධානය යොමු වී ඇති බව විපක්ෂ නායක කාර්යාලය පවසා ඇත.
එමෙන්ම උතුරු, නැගෙනහිර සහ වතුකරයේ ජනතාවගේ සෞඛ්ය හා අධ්යාපන අවශ්යතා, ගුණාත්මක සෞඛ්ය සේවාවන් සඳහා ඇති ප්රවේශය, පාසල් අධ්යාපනය සහ දරුවන්ගේ පෝෂණ මට්ටම් සම්බන්ධයෙන් පවතින ගැටලු පිළිබඳවද සාකච්ඡා කර තිබේ. දීර්ඝ කාලයක් පුරා එම ජනතාව මුහුණ දෙන සමාජ හා ආර්ථික ගැටලු සම්බන්ධයෙන් ප්රායෝගික අවධානය යොමු කරමින්, ඔවුන්ගේ ජීවන තත්ත්වය නගාසිටුවීම සඳහා ගත යුතු ඉදිරි ක්රියාමාර්ග පිළිබඳවද මන්ත්රීවරුන් අතර අදහස් හුවමාරු වී ඇත.
උතුරු හා නැගෙනහිර මෙන්ම වතුකරයේ ජනතාවගේ ගැටලු සම්බන්ධයෙන් අඛණ්ඩව අවධානය යොමු කරමින්, ඒ සඳහා පාර්ලිමේන්තුව තුළ මෙන්ම ඉන් පිටතදීද අවශ්ය මැදිහත්වීම් සිදුකිරීමේ වැදගත්කම විපක්ෂ නායකවරයා අවධාරණය කර ඇති බව එම කාර්යාලය පවසා ඇත.
එමෙන්ම ජනතාවගේ සැබෑ ගැටලු පිළිබඳව ප්රාදේශීය මට්ටමින් තොරතුරු රැස් කර ඒවාට විසඳුම් ලබාදීම සඳහා විපක්ෂයේ මන්ත්රීවරුන් අතර වඩාත් සමීප සම්බන්ධීකරණයක් පවත්වාගෙන යාම පිළිබඳවද මෙහිදී අවධානය යොමු වී ඇත.
