බොදු බල සේනා සංවිධානයේ මහ ලේකම් ගලගොඩඅත්තේ ඥානසාර හිමියන්ට හිටපු ජනාධිපති මෛත්රීපාල සිරිසේන මහතා විසින් ලබාදුන් ජනාධිපති සමාව වලංගු නොවන බව ශ්රේෂ්ඨාධිකරණය අද (10) තීන්දු කර තිබේ.
මාධ්යවේදී හා දේශපාලන කාටූන් ශිල්පී ප්රගීත් එක්නැලිගොඩ අතුරුදන්වීම සම්බන්ධයෙන් දීර්ඝ කාලයක් පුරා යුක්තිය ඉල්ලා සිටින ඔහුගේ බිරිඳ සන්ධ්යා එක්නැලිගොඩ විසින් ගලගොඩඅත්තේ ඥානසාර හිමියන්ට හිටපු ජනාධිපතිවරයා විසින් ලබාදුන් ජනාධිපති සමාව අභියෝගයට ලක් කරමින් ශ්රේෂ්ඨාධිකරණය හමුවේ මූලික අයිතිවාසිකම් පෙත්සමක් ගොනු කර තිබූ නඩුකරයක් විභාගයට ගනිමින් ශ්රේෂ්ඨාධිකරණය විසින් අදාල තීන්දුව ලබා දී ඇත.
2019 දෙසැම්බර් 17 දින ගොනු කර ඇති සංශෝධිත පෙත්සම මගින් ඇය සඳහන් කර ඇත්තේ ඥානසාර හිමියන් අධිකරණයට අපහාස කිරීම සම්බන්ධයෙන් වරදකරු කර දඬුවම් ලබා සිටියදී 2019 මැයි 23 වැනිදා පමණ හිටපු ජනාධිපතිවරයා විසින් ජනාධිපති සමාව ලබාදී නිදහස් කළ බව පෙත්සමේ සඳහන් වේ. එම සමාව ලබාදීමේ ක්රියාවලියට අදාළ ලේඛන තමන්ට හෙළි කර නොමැති බවද පෙත්සම්කාරිය පෙන්වා විසින් පෙන්වා දී තිබිණී.
ඥානසාර හිමියන්ට එරෙහිව පැවති නඩු කටයුතු සහ ඔහුට ලබාදී තිබූ දඬුවම් පිළිබඳවද පෙත්සමේ දීර්ඝ විස්තරයක් ඉදිරිපත් කර තිබේ. අධිකරණයට අපහාස කිරීම සම්බන්ධයෙන් පැවති නඩු විභාගයකදී ඔහුට වසර 19ක බරපතළ වැඩ සහිත සිර දඬුවමක් නියම කර තිබූ බව පෙත්සමේ සඳහන් කර තිබිණි.
ජනාධිපති සමාව ලබාදීමේ තීරණය අත්තනෝමතික, අයහපත් අරමුණකින් සහ වෙනත් අරමුණක් සඳහා ගත් තීරණයක් බවට සන්ධ්යා එක්නැලිගොඩ සිය පෙත්සමෙන් චෝදනා කරයි. එමගින් සාධාරණ නඩු විභාගයකට ඇති අයිතිය, අධිකරණයේ ස්වාධීනත්වය සහ වින්දිතයන්ගේ හා සාක්ෂිකරුවන්ගේ අයිතිවාසිකම් බලපෑමට ලක්වන බවද ඇය පෙන්වා දී තිබේ.
එමෙන්ම ජනාධිපති සමාව ලබාදීමේ බලය ආණ්ඩුක්රම ව්යවස්ථාවේ 34 වැනි වගන්තිය යටතේ පැවතියද එම බලය මූලික අයිතිවාසිකම් සම්බන්ධ අධිකරණ පරීක්ෂාවට යටත් විය යුතු බව පෙත්සම්කාරියගේ ස්ථාවරය වී තිබේ.
ඒ අනුව ජනාධිපති සමාව ලබාදීමට අදාළ තීරණය හා ලේඛන අධිකරණයට ඉදිරිපත් කරන ලෙස නියෝගයක් ලබාදීම, එම ක්රියාවලිය මගින් තම මූලික අයිතිවාසිකම් උල්ලංඝනය වී ඇති බවට ප්රකාශයක් නිකුත් කිරීම සහ ජනාධිපති සමාව අවලංගු කිරීම ඇතුළු සහන රැසක් පෙත්සමෙන් ඉල්ලා තිබේ.
