ශ්රී ලංකා පොදුජන පෙරමුණේ ජාතික සංවිධායක සහ පාර්ලිමේන්තු මන්ත්රී නාමල් රාජපක්ෂ මහතා සැප්තැම්බර් 18 වැනිදා දක්වා රක්ෂිත බන්ධනාගාරගත කිරීමට කොළඹ ප්රධාන මහේස්ත්රාත් අසංග එස්. බෝදරගම මහතා අද (04) නියෝග කර තිබේ.
අල්ලස් හෝ දූෂණ චෝදනා විමර්ශන කොමිෂන් සභාව විසින් අත්අඩංගුවට ගත් නාමල් රාජපක්ෂ මහතා අද කොළඹ ප්රධාන මහේස්ත්රාත් අධිකරණයට ඉදිරිපත් කිරීමෙන් අනතුරුව මෙම නියෝගය නිකුත් කර ඇත.
එයාර්බස් ගුවන් යානා ගනුදෙනුව සම්බන්ධයෙන් සිදුකරන විමර්ශනයට අදාළව ප්රකාශයක් ලබාදීම සඳහා අද උදෑසන අල්ලස් කොමිසම හමුවේ පෙනී සිටි නාමල් රාජපක්ෂ මහතාගෙන් පැය පහක් ප්රශ්න කර තිබුණු අතර අනතුරුව ඔහු අත්අඩංගුවට ගෙන අධිකරණයට ඉදිරිපත් කර ඇත.
අල්ලස් කොමිසම වෙනුවෙන් නියෝජ්ය සොලිසිටර් ජනරාල් ජානක බණ්ඩාර මහතා අධිකරණයේ කරුණු ඉදිරිපත් කර ඇති අතර නාමල් රාජපක්ෂ මහතා වෙනුවෙන් නීතිඥවරුන් ද කරුණු ඉදිරිපත් කර තිබේ.
2013 වසරේදී ශ්රීලන්කන් ගුවන් සමාගම සඳහා එයාර්බස් A330 ගුවන් යානා හයක් සහ A350 ගුවන් යානා අටක් මිලදී ගැනීමේ ගනුදෙනුව සම්බන්ධයෙන් මීට පෙර ද චෝදනා එල්ල වී තිබිණි. එම ගනුදෙනුවට අදාළව ඇමෙරිකානු ඩොලර් මිලියන 2ක අල්ලසක් ලබාගත් බවට එවකට ශ්රීලන්කන් ගුවන් සමාගමේ ප්රධාන විධායක නිලධාරී කපිල චන්ද්රසේන මහතා සහ ඔහුගේ බිරිඳ වන ප්රියංකා නියෝමාලි විජේනායක මහත්මියට චෝදනා එල්ල වී තිබේ.
අල්ලස් කොමිසම විසින් දූෂණ විරෝධී පනත යටතේ ආරම්භ කළ විමර්ශනයකට අදාළව කපිල චන්ද්රසේන මහතා මාර්තු 12 වැනිදා අත්අඩංගුවට ගෙන රක්ෂිත බන්ධනාගාරගත කළ අතර පසුව ඇප මත මුදාහැර තිබිණි. ඇප මත සිටියදී මැයි 8 වැනිදා කපිල චන්ද්රසේන මහතා අභිරහස් ලෙස මියගොස් තිබූ අතර, එය සියදිවි නසාගැනීමක් බවට පොලිසිය සැක පළ කර තිබේ.
එයාර්බස් ගනුදෙනුවට අදාළව කොටුව මහේස්ත්රාත් අධිකරණයේ විභාග වන නඩුවේ දෙවැනි සැකකාරිය වන ප්රියංකා නියෝමාලි විජේනායක මහත්මිය සහ තෙවැනි සැකකරු ලෙස නම් කර ඇති ෂමින්ද්ර රාජපක්ෂ මහතා අත්අඩංගුවට ගැනීම සඳහා විවෘත වරෙන්තු ද නිකුත් කර ඇත.
