පාර්ලිමේන්තුවට ඉදිරිපත් කර ඇති 22 වැනි ආණ්ඩුක්රම ව්යවස්ථා සංශෝධන පනත් කෙටුම්පතට එරෙහිව ගොනු කර ඇති පෙත්සම් ශ්රේෂ්ඨාධිකරණයේ සියලුම විනිසුරුවරුන්ගෙන් සමන්විත පූර්ණ විනිසුරු මඬුල්ලක් හමුවේ සලකා බලන ලෙස පෙත්සම්කරුවන් කළ ඉල්ලීම ශ්රේෂ්ඨාධිකරණය අද (01) ප්රතික්ෂේප කර ඇත.
ඒ අනුව අදාළ පෙත්සම් පංච පුද්ගල ශ්රේෂ්ඨාධිකරණ විනිසුරු මඬුල්ල ඉදිරියේ තවදුරටත් සලකා බැලීමට නියමිතය.
අගවිනිසුරු ප්රීති පද්මන් සූරසේන මහතාගේ ප්රධානත්වයෙන් යුත් පස් දෙනෙකුගෙන් සමන්විත විනිසුරු මඬුල්ලක් හමුවේ අද මෙම පෙත්සම් කැඳවනු ලැබීය.
එහිදී එක් පෙත්සම්කරුවෙකු වෙනුවෙන් පෙනී සිටි ජනාධිපති නීතිඥ එම්.ඒ. සුමන්තිරන් මහතා අධිකරණයෙන් ඉල්ලා සිටියේ මෙම පෙත්සම් ශ්රේෂ්ඨාධිකරණයේ දැනට සේවයේ නිරත සියලුම විනිසුරුවරුන්ගෙන් සමන්විත පූර්ණ විනිසුරු මඬුල්ලක් හමුවේ සලකා බැලීමට පියවර ගන්නා ලෙසයි.
මෙම ඉල්ලීමට සහාය පළ කරමින් ජනාධිපති නීතිඥවරුන් වන සාලිය පීරිස්, අලි සබ්රි, ජෙෆ්රි අලගරත්නම්, එරාජ් ද සිල්වා, ශ්රීනාත් පෙරේරා, අනුර මැද්දෙගොඩ සහ මෛත්රී ගුණරත්න යන මහත්වරු ඇතුළු තවත් නීතිඥවරු පිරිසක්ද කරුණු ඉදිරිපත් කර ඇත.
කෙසේ වෙතත් නීතිපතිවරයා වෙනුවෙන් පෙනී සිටි සොලිසිටර් ජනරාල් විරාජ් දයාරත්න මහතා එම ඉල්ලීමට විරෝධය පළ කරමින් කරුණු ඉදිරිපත් කර තිබිණි. විනිසුරු මඬුල්ලක සංයුතිය සහ එහි විනිසුරුවරුන් සංඛ්යාව තීරණය කිරීමේ බලය අගවිනිසුරුවරයා සතු බව සොලිසිටර් ජනරාල්වරයා අධිකරණයට පෙන්වා දී ඇත.
ආණ්ඩුක්රම ව්යවස්ථාවේ 132(3) වගන්තියට අවධානය යොමු කරමින් ඔහු සඳහන් කළේ විනිසුරු මඬුල්ලක විනිසුරුවරුන් සංඛ්යාව තීරණය කිරීම අගවිනිසුරුවරයාගේ අභිමතය පරිදි සිදුකරන කටයුත්තක් බවය. එම බලතල සම්බන්ධයෙන් වෙනත් පාර්ශ්වයකට මැදිහත් වීමට හැකියාවක් නොමැති බවද සොලිසිටර් ජනරාල්වරයා අධිකරණය හමුවේ කරුණු දක්වා ඇත.
අතරමැදි පෙත්සම්කරුවෙකු වෙනුවෙන් පෙනී සිටි ජනාධිපති නීතිඥ නයිජල් හැච් මහතා ඇතුළු නීතිඥවරුද විනිසුරු මඬුල්ලේ සංයුතිය තීරණය කිරීමේ අභිමතය අගවිනිසුරුවරයා සතු බව පෙන්වා දෙමින් කරුණු ඉදිරිපත් කළහ. පෙත්සම්කරුවන් සහ අනෙකුත් පාර්ශ්ව වෙනුවෙන් ඉදිරිපත් වූ සියලු කරුණු සහ අධිකරණය හමුවේ ඉදිරිපත් වූ කරුණු සලකා බැලීමෙන් අනතුරුව පස් දෙනෙකුගෙන් සමන්විත ශ්රේෂ්ඨාධිකරණ විනිසුරු මඬුල්ල මෙම නියෝගය නිකුත් කර ඇත.
ඒ අනුව 22 වැනි ආණ්ඩුක්රම ව්යවස්ථා සංශෝධන පනත් කෙටුම්පතට එරෙහිව ගොනු කර ඇති පෙත්සම් පූර්ණ විනිසුරු මඬුල්ලක් හමුවේ සලකා බැලීමේ ඉල්ලීම ප්රතික්ෂේප කර ඇති අතර ඒවා පත්කර ඇති පංච පුද්ගල විනිසුරු මඬුල්ල ඉදිරියේ තවදුරටත් විභාගයට ගැනීමට නියමිතය.
