අස්වුණොත් විපක්ෂය දිනනු ඇතැයි ආණ්ඩුව තුළ මතයක්
අල්ලස් පනතේ 70 වැනි වගන්තිය අනුව ‘දූෂණය’ නමැති වරදට චෝදනා ලැබ කොළඹ මහාධිකරණයෙන් අධිචෝදනා පත්ර ලබා සිටින බලශක්ති ඇමති කුමාර ජයකොඩි, ඇමතිධුරයෙන් ඉල්ලා අස්නොවන බවත්, ඔහු ඇමතිධුරයෙන් ඉවත්කිරීමට ජනාධිපතිවරයා පියවර නොගනු ඇති බවත් ආණ්ඩුවේ අභ්යන්තර ආරංචි මාර්ග කියයි.
ඔහු ඇමතිධුරයෙන් අස්වුවහොත් හෝ අස්කළහොත් එය විපක්ෂයට ජයග්රහණය ලබාදීමක් වනු ඇතැයි කියන මතය ආණ්ඩුවේ නායකයන් තුළ සාකච්ඡාවට ලක් වී තිබේ.
මාර්තු 31 වැනිදා සතිපතා කැබිනට් මාධ්ය හමුවේදී ඉදිරිපත් වූ ප්රශ්නයකට පිළිතුරු දුන් නලින්ද ජයතිස්ස ඇමතිවරයා, ජයකොඩි මහතා තවදුරටත් ඇමතිධුරයේ සිටිනු ඇති බවත්, ඔහු සම්බන්ධයෙන් ඇමති මණ්ඩලයේ කිසි තීරණයක් ගෙන නැති බවත් තහවුරු කළේය. මේ සම්බන්ධයෙන් විමසූ කල ජාජබ ලේකම් වෛද්ය නිහාල් අබේසිංහ අනිද්දාට පැවසූයේ ඇමති ජයතිස්ස කියන දේට වැඩි යමක් කියන්නට තමාට නැති බවය.
2016දී පොහොර සංස්ථාවේ සිදුකළ මූල්ය දූෂණයකින් රජයට රුපියල් මිලියන 8.8ක පාඩුවක් සිදුකළ බවට අල්ලස් හෝ දූෂණ චෝදනා විමර්ශන කොමිෂන් සභාව ගොනුකළ අධිචෝදනා පත්රය භාරගැනීම සඳහා මාර්තු 26 වැනිදා, කොළඹ මහාධිකරණය ඉදිරියේ පෙනීසිටි ජයකොඩි මහතාට, රුපියල් ලක්ෂ දහය බැගින් දෙදෙනකුගේ පෞද්ගලික ඇප තබන ලෙසද නියම කෙරිණි.
ඒ අනුව, මේ වන විට ජාතික ජන බලවේගයේ ආණ්ඩුවේ ඇමති මණ්ඩලයේ දූෂණ චෝදනාවට ලක්ව ඇප ලබා සිටින ඇමතිවරයෙක් සිටියි.
මාර්තු 26 වැනිදා අධිචෝදනා ලැබීමට පෙරද, ඇමතිවරයා ඉල්ලා අස්වීම හෝ ඔහු ඉවත්කිරීම හෝ විය යුතුයැයි විශාල මතයක් ගොඩනැගී තිබුණු අතර, අධිචෝදනා බාරගැනීමෙන් පසුව, අස්වීම හෝ අස්කිරීම සඳහා තිබෙන එම ඉල්ලීම වඩාත් තීව්ර විය. ජාජබ ආණ්ඩුවේ සමීපතම හිතවතුන් පවා, නඩු විභාගය අවසන් වන තුරු ඇමතිවරයා ධුරයෙන් ඉවත් විය යුතු හෝ ඉවත් කළ යුතු හෝ බවට සමාජ මාධ්යවල කරුණු දැක්වූහ.
එහෙත් ජනාධිපතිවරයාගේත්, ආණ්ඩුවේ මතවාදී යාන්ත්රණය මෙහෙයවන ජනතා විමුක්ති පෙරමුණේත් දැඩි තීරණය වී තිබෙන්නේ ඇමතිවරයාට ඉල්ලා අස්වන්නැයි නොකීමටත්, ජනාධිපතිවරයා ඔහු ඇමතිධුරයෙන් ඉවත් නොකිරීමටත්ය. එසේ වුවහොත්, එය විපක්ෂයට ජයග්රහණයක් ලබාදීමක් වනු ඇතැයි ඔවුන්ගේ මතයයි.
මේ අතර, මාර්තු 31 වැනිදා නිවේදනයක් නිකුත් කළ රටේ ප්රමුඛ සිවිල් සංවිධානයක් වන විකල්ප ප්රතිපත්ති කේන්ද්රය කියා සිටියේ ජයකොඩි මහතා වහාම ඇමතිධුරයෙන් ඉල්ලා අස්විය යුතු බවයි. ‘ඔහු තවදුරටත් අමාත්ය ධුරයේ රැඳී සිටීම අල්ලස් හෝ දූෂණ චෝදනා විමර්ශන කොමිෂන් සභාවේ ස්වාධීනත්වයට සහ එම ආයතනය කෙරෙහි පවතින මහජන විශ්වාසයටද හානියක් බවද සඳහන් කළ යුතුය.’ එම කේන්ද්රය කියයි.
‘රාජ්ය ධුර දරන්නන්, රජය කෙරෙහි මහජන විශ්වාසය තහවුරු වන පරිදි ඉහළම මට්ටමේ සුපිළිපන්භාවයකින් සහ වෘත්තීය මට්ටමකින් කටයුතු කිරීම අත්යවශ්ය වේ. එවැනි ප්රමිතීන්ට පටහැනිව ක්රියා කරන පුද්ගලයන් සම්බන්ධයෙන් කඩිනමින් සහ තීරණාත්මකව පියවර ගත යුතුය. මෙම අධිචෝදනා එල්ල වන්නේ, ජයකොඩි මහතාගේ අමාත්යාංශය යටතට වැටෙන විදුලි උත්පාදනය සඳහා ගල්අඟුරු ප්රසම්පාදනය කිරීමේදී සිදුව ඇති බව කියන අක්රමිකතා පිළිබඳව ද චෝදනා මතු වෙමින් පවතින පසුබිමකය. බලශක්ති අර්බුදයක් පවතින අවස්ථාවක මෙවැනි ක්රියාවන් සිදුවීම, රාජ්ය තීරණ ගැනීමේ විනිවිදභාවය සහ වගවීම මෙන්ම පොදු තනතුරු දරන්නන්ගේ සුදුසුකම සහ අඛණ්ඩතාව පිළිබඳව බරපතළ ප්රශ්න මතු කරයි.
ජාතික ජන බලවේගය 2024 වසරේදී ජනවරම ලබා ගත්තේ පාලන පද්ධතිය වෙනස් කිරීමටත්, වගකීම් සහගත සහ විනිවිදභාවයෙන් යුත් පාලනයක් තුළින් දූෂණය සහ දණ්ඩමුක්තියේ සංස්කෘතිය අහෝසි කිරීමටත් පොරොන්දු වෙමිනි. ජනාධිපති අනුර කුමාර දිසානායක මහතා සහ ජාතික ජන බලවේග රජය, තමන් මැතිවරණ වේදිකාවේදී ප්රකාශ කළ මූලධර්මවලට අනුකූලව කටයුතු කරන බව පෙන්වමින් එම පොරොන්දු ඉටු කළ යුතු අතර, එහිදී කිසිදු පෞද්ගලික අවශ්යතාවන් අතර ගැටුමක් නොමැති බව තහවුරු කළ යුතුය.’ යනුවෙන් එම නිවේදනයේ සඳහන් වෙයි.
කුමාර ජයකොඩි මහතාට එරෙහිව මහාධිකරණ නඩුව මැයි 6 වැනිදා යළි කැඳවේ. ඒ අතර ජයකොඩි ඇමතිවරයාට එරෙහිව විපක්ෂය ඉදිරිපත් කර ඇති විශ්වාසභංග යෝජනාව අප්රේල් 10 වැනිදා විවාදයට ගැනීමට නියමිතය.
