ජාතික බුද්ධි සේවාවේ හිටපු ප්රධානී සුරේෂ් සලේ අත්අඩංගුවට ගැනීමෙන් පසු ඒ ගැන විවිධ අය විවිධ මත පළකරන බව පෙනේ. බුද්ධි ක්ෂේත්රයේ ඔහු කළ කාර්යය සලකා මෙලෙස අත්අඩංගුවට ගැනීම නොකළ යුතු ව තිබිණැයි සමහරු කියති.
තවත් සමහරුන් කියන්නේ පාස්කු දින ප්රහාරය සම්බන්ධයෙන් විවිධ අයගෙන් ලත් තොරතුරු මත ඔහු අත්අඩංගුවට ගැනුණු බවයි. මේ සතිය මැද දී විශේෂ මාධ්ය හමුවක් පැවැත්වූ පොලිසියේ ප්රධානින්, සලේ අත්අඩංගුවට ගත්තේ කුමන හේතුවක් නිසාදැයි පැහැදිලි ව කීවේ නැත. ‘ඒක කියන්න පුළුවන් වෙන්නේ විමර්ශනවලින් පසුවයි’ පොලිස් ප්රධානියෙක් එහි දී කීවේ ය.
පොලිස් ප්රධානියාගේ මේ කතාවෙන් අපේ පොලිසිය කරන ආවේණික දුෂ්ටකමක් තහවුරු වෙයි. එනම්, විමර්ශන කරන්නට පෙර අත්අඩංගුවට ගැනීමයි. අපේ රටේ නීතිය අනුව, පුද්ගලයකු අත්අඩංගුවට ගත හැක්කේ අපරාධයක් කළ බවට සාධාරණ සැකයක් ඇතිවන්නේ නම් පමණි. එවැනි සාධාරණ සැකයක් ඇතිවීමට නම්, පළමුව ඒ ගැන විමර්ශනයක් සිදුවී තිබිය යුතු ය.
එවැනි විමර්ශනයකුත්, එයින් පැනනගින සාධාරණ සැකයකුත් නැති නම්, එම අත්අඩංගුවට ගැනීම නීති විරෝධී ය.
පොලිසියේ තවත් දුෂ්ට පුරුද්දක් වන්නේ කිසිදු සාධාරණ සැකයක් නැතිව අත්අඩංගුවට ගන්නා පුද්ගලයන්ට දසවධ දී ඔහුගෙන් අපරාධයට සම්බන්ධ තොරතුරු හෙළිකර ගැනීමයි. එවිට අත්අඩංගුවට ගැනීමට සාධාරණ සැකයක් අවශ්ය නැත. වරදක් සිදුවී ද නැද්ද යන්න තීරණය කරන්නේ අත්අඩංගුවට ගැනීමෙන් පසුව ය.
සලේ අත්ඩංගුවට ගැනීම නොකළ යුතුව තිබුණු බවට ඇතැමෙකු කියද්දී, හිටපු ජනාධිපති රනිල් වික්රමසිංහගේ බිරිය, පොලිස් මූල්ය අපරාධ කොට්ඨාසයට කැඳවීම ගැන කනස්සල්ල දක්වමින් ද නිවේදනයක් සංසරණය වනවා පෙනිණ. ඒ නිවේදනයේ තේරුම, අඩු ගණනේ ප්රශ්න කිරීම්වල දී ඇයට සුදුසු ලෙස සලකන්න යන්න ය.
මහාචාර්ය මෛත්රී වික්රමසිංහ ලංකාවේ ප්රකට ශාස්ත්රවන්තයෙකි. ඇය දේශපාලනය නොකරන නිසා, තම සැමියා ජනාධිපති වූ කාලයේ කරන ලද විවිධාකාර දේශපාලන හා නෛතික නොපනත්කම් ගැන, කිසිවක් කීමට හෝ ඒවා වැළැක්වීමට ඇයට තිබුණු නොහැකියාව ගැන අලුතෙන් කියන්නට දෙයක් නැත. කෙසේ වෙතත්, එෆ්සීඅයිඩීය තුළදී ඇයට හොඳින් සලකනවාද යන්න තීරණය වන්නේ පොලිසියේ ශිෂ්ට අශිෂ්ටභාවය මත ය. ලංකාවේ පොලිසිය ප්රසිද්ධ වී තිබෙන්නේ ශිෂ්ටබව සඳහා නොවේ. අශිෂ්ටබව සඳහා ය.
2015න් පසු මේ ආකාරයට ම හොරුන් වංචනිකයන් පිළිබඳ අපරාධ විමර්ශන, නඩු කටයුතු ඇරඹුණු අවස්ථාවේ දී, අදත් කතා කෙරෙන අපරාධයක් සම්බන්ධයෙන් හිටපු ජනාධිපති බිරිය, ශිරන්ති රාජපක්ෂගෙන් ප්රකාශයක් ගන්නට අවශ්ය වූ අවස්තාව කාටත් මතක ඇතිවා විය යුතු ය. ඒ අවස්ථාවේ දී අගමැති රනිල් වික්රමසිංහ ඇමතූ මහින්ද රාජපක්ෂ හිටපු ජනාධිපතිවරයා, සිය බිරියට හැකි උපරිම ආකාරයේ ගෞරවයෙන් සලකන්නට පියවර ගන්නයැයි කීවේ ලු. එහි ප්රතිඵලය වුණේ, ඇගෙන් සටහන් කරගත් ප්රකාශය, බත්තරමුල්ල කථානායක නිල නිවෙසේ දී ගෞරවනීය ලෙස අපරාධ පරීක්ෂණ දෙපාර්තමේන්තුව විසින් කරනු ලැබීමයි. රාජපක්ෂ බිරියට එසේ ගෞරවනීය ලෙස සැලකූ වික්රමසිංහ මහතා, තම බිරිය එෆ්සීඅයිඩීයට යන විට ද එවැනි ගෞරවයක් බලාපොරොත්තු වීම සාධාරණ ය. එහෙත් එවැනි වෙනස්කමක් කරන්නට මේ ආණ්ඩුවත්, දැන් පවතින පොලිසියත් කැමති නැති බව පැහැදිලි ය. රනිල් වික්රමසිංහ මහතාට ඒ ගැන දුක්වන්නට දෙයක් ලෙස ඇත්තේ, තම පාක්ෂිකයන් දෙකඩ කරමින්, එක් අපේක්ෂකයකු පැරදවීමේ වුවමනාවෙන් ම, තමන් පරදින බව හොඳින් ම දැන දැන ම, ඡන්ද කැඩීමේ අරමුණෙන් පසුගිය ජනාධිපතිවරණයේ දී කළ දේවල්වල දුක්ඛදායක විපාක තමාටත්, තම බිරියටත් දැන් විඳින්නට සිදුවීම ගැන ය.
නීතිය ඉදිරියේ හැමෝ ම සමානය යන්න මේ ආණ්ඩුව දේව වාක්යයක් ලෙස සලකන්නකි. ජනාධිපතිවරයා ද නිතර ම කියන්නේ තමා ද සිටින්නේ නීතියට පහළින් බව ය. ඔහුට එසේ නැවත නැවත මතක් කරන්නට සිදුවන්නේ, තමා දරන ජනාධිපති ධුරය නිමවා ඇත්තේ නීතියට ඉහළින් සිටින සේ වීම නිසා ය. ඔහු නීතිය ඉදිරියේ සමාන වන්නට නම්, වචනවලින් කිය කියා ඉන්නේ නැතිව කළ යුතු දේ, විධායක ජනාධිපති ක්රමය අහෝසි කිරීම ය. ජාතික ජන බලවේග ආණ්ඩුව එය නොකරන බව දැන් ස්ථිර ය. ඒ නිසා ජනාධිපතිතුමාට ඉදිරියේදී ද සිදුවන්නේ, මම නං එහෙම නැහැ යැයි සිල්ලර කතා කියමින් සිටීමට ය.
