බත්තරමුල්ල අකුරේගොඩ ප්රදේශයේ නීතිඥ බුද්ධික මල්වආරච්චි සහ ඔහුගේ බිරිඳ නිසංසලා මල්ලවආරච්චි වෙඩි තබා ඝාතනය කිරීමේ සිද්ධියට ආධාර අනුබල දුන් බවට සැක කෙරෙන පුද්ගලයින් සිව් දෙනෙකු හඳුනාගෙන ඇති බව පොලිසිය පවසයි.
අකුරේගොඩ අධිආරක්ෂිත කලාපයේ පිහිටා ඇති සුපිරි වෙළඳසැලක වාහන අංගනයේදී මෝටර් රථයේ සිටි නීතිඥවරයා සහ ඔහුගේ බිරිඳව තවත් මෝටර් රථයකින් පැමිණි වෙඩික්කරුවන් දෙදෙනෙකු විසින් පෙබරවාරි 13 වන දින වෙඩි තබා ඝාතනය කර පළා ගොස් තිබිණි.
මෙම ඝාතනය සිදු කිරීමට යොදා ගත් EP KI 7738 දරණ කාර් රථය යැයි සැකකෙරෙන මෝටර් රථයක් ගාල්ල, බද්දේගම ප්රදේශයේ ගිනි ගනිමින් තිබියදී සොයා ගෙන තිබුණු අතර මෙම ඝාතන සම්බන්ධයෙන් විර්ශනය කිරීම සඳහා අපරාධ පරීක්ෂණ දෙපාර්තුමේන්තුව, පොලිස් විශේෂ කාර්ය බළකාය, කොළඹ අපරාධ කොඨටාසය සහ විශේෂ විමර්ශන ඒකකය ඇතුළු කණ්ඩායම් 10ක් යොදවා ඇත.
කෙසේ වෙතත් නීතීඥවරයාට සහ ඔහුගේ බිරිඳට වෙඩි තබා ඝාතනය කිරීමේ සිද්ධියට විරෝධය පළ කරමින් දිවයින පුරා අධිකරණවල පෙබරවාරි 16 දින කැදවනු ලබන නඩු විභාග කටයුතුවලට පෙනී නොසිට වෘත්තිය කටයුතුවලින් ඉවත්වීමට ශ්රී ලංකා නීතීඥ සංගමයේ සියලු නීතීඥවරු තීරණය කර තිබුණි.
