අවිස්සාවේල්ල සීතාවක කර්මාන්ත පුරවරයේ බ්රැන්ඩික්ස් ඇඟළුම් කර්මාන්ත ශාලාවේ සේවය කරමින් සිටියදී එම ආයතනයේ නොසැලකිල්ල නිසා රාජකාරි අවස්ථාවේදී පරමසිවම් පුෂ්පලතා ඔක්තෝබර් 10 වන දා මියගොස් ඇති බව වාර්තා විය.
පුෂ්පලතා යටියන්තොට, කිරිපෝරුව වත්තේ පදිංචි දරුවන් දෙදෙනෙකුගේ මවකි. ඇගේ සැමියා, මව සහ ඇස් නොපෙනෙන සොහොයුරියන් දෙදෙනා සමඟ ඇය ජීවත් වී ඇති අතර බ්රැන්ඩික්ස් ආයතනයේ සේවයට පැමිණ ඇත්තේ මීට වසර දහතුනකට පෙරය. උදෑසන 5.30ට සේවා ස්ථානයට පැමිණ රාත්රී 7.30ට ඇය නිවසට යන බව ඇය සමඟ සේවය කරන අයෙක් අප සමඟ පැවසීය.
ඔක්තෝබර් 10 වන දා ඇය තම වැඩමුරයේ නිරත වී සිට ඇත්තේ අසනීප තත්වය මත බවත් ඇගේ අංශය භාර නිලධාරිනියට තමන් අසනීප බව පවසා සිටියද ඇඟළුම් කර්මාන්ත ශාලාවල රීතියක් ලෙස පවත්වාගෙන යන දවසේ ටාගට් එක පුෂ්පලතා සම්පූර්ණ කර නොතිබීම නිසා ඇයට රෝහලට යෑමට අංශභාර නිලධාරිනිය අවසර ලබා දී නොමැති බවත් වාර්තා විය.
පුෂ්පලතා තම සේවා ස්ථානය තුළ සිහිසුන්ව ඇද වැටී ඇති අතර ඉන් අනතුරුව සේවා ස්ථානයේ කිහිපදෙනෙකු එකතු වී ඇය රෝහල වෙත රැගෙන ගොස් ඇත.
ඇගේ පශ්චාත් මරණ පරීක්ෂණයේ දී ඇය මිය ගොස් ඇත්තේ හදිසි අනතුරකින් බව පවසා ඇති නමුත් මරණයට හේතුව කුමක් දැයි ලේඛනයේ සඳහන් කර නොමැති බව නිදහස් වෙළද කලාප පොදු සේවක සංගමයේ නිලධාරියෙක් පැවසීය.
පුෂ්පලතාගේ මරණය සැක සහිත බවත් ඒ පිළිබඳව පොලිසිය හෝ කම්කරු අමාත්යාංශයෙන් කිසිදු පරීක්ෂණයක් සිදු නොකරන බවත් එබැවින් තමන්ගේ බිරිඳගේ මරණයට වගකිව යුතු බ්රැන්ඩික්ස් ආයතනය සහ මරණයට වගකිව යුතු පුද්ගලයන් සම්බන්ධයෙන් විමර්ශනයක් කර ස්වාධීන තීන්දුවක් ලබා දෙන ලෙස ඉල්ලමින් පරමශිවන් පුෂ්පලතාගේ සැමියා, නිදහස් වෙළඳ කලාප පොදු සේවක සංගමය සහ වානිජ හා වෙළඳ සේවක සංගමය නොවැම්බර් 07 වන දින මානව හිමිකම් කොමිෂන් සභාවට පැමිණිල්ලක් කර තිබිණි.
තම බිරිඳගේ මරණය ගැන පරමශිවම් සිවකුමාර් අප වෙත අදහස් දක්වමින් මෙසේ පැවසීය.
‘ඔක්තෝබර් 10 වෙනිදා මගේ බිරිඳ ගාමන්ට් එකේ වැඩට ගියා. එයාගේ හිස කකියනවා සහ පපුව රිදෙන බව අංශ භාරව ඉන්න සුපවයිසර් නෝනාට දැනුම් දීලා තිබුණා. ඇය සුපවයිසර්වරියගෙන් උදේ 9ට විතර අසනීප නිසා නිවාඩුවක් ඉල්ලලා තිබුණා. ඒත් සුපවයිසර්වරිය නිවාඩු දීම ප්රතික්ෂේප කරලා තිබුණා. මගේ බිරිඳව රෝහලට ඇතුළත් කරන්නේ නැතිව ඇගෙන් වැඩ අරගෙන තිබුණා. ඇය බොහෝම අපහසුවෙන් වැඩ කරලා තියෙන්නේ. බිරිඳගේ අසනීප තත්වය හවස 5.30 විතර වැඩි වෙලා තියෙනවා. ඉන්පස්සේ ගාමන්ට් එකේ අය මගේ බිරිඳව රෝහලට ඇතුළත් කරලා තිබුණා. පුෂ්පලතා රෝහලේ ප්රතිකාර ගනිමින් සිටිද්දී, රාත්රී 11.30ට විතර මිය ගියා. මගේ බිරිඳ මට අහිමි වුණා. මගේ දරුවෝ දෙන්නත් එක්ක මම දැන් අසරණ වෙලා ඉන්නේ. බ්රැන්ඩික්ස් ආයතනයෙන් මට සිද්ධවුණ අසාධාරණය තව කෙනෙකුට සිද්ධ වෙන්න නොවෙන්න කටයුතු කරන්නයි මම මානව හිමිකම් කොමිෂන් සභාවට පැමිණිල්ලක් කළේ.
මගේ බිරිඳ අවුරුදු 13ක් බ්රැන්ඩික්ස් ආයතනයේ සේවය කළ කෙනෙක්. එයා ඕලොක් මැෂින් 2ක මහපු කෙනෙක්. ඇය හරිම කාර්යක්ෂම කාන්තාවක්. කිසිමදාක ඇය පැනඩෝල් පෙත්තක්වත් බීපු නැති නීරෝගි කාන්තාවක්. බ්රැන්ඩික්ස් ආයතනයෙන් මගේ බිරිඳගේ අසනීප තත්වය සැලකිල්ලට අරගෙන නැහැ. බිරිඳ දරුවන් එක්ක බොහෝම සතුටින් ජීවත් වුණ කෙනෙක්. ඒ හැම දෙයක්ම අපිට නැති වුණා. අපේ ජිවිත විනාශ වෙලා ගිහින්.
මගේ බිරිඳ උදෑසන 9ට ලක්මාලි කියන සුපවයිසර්වරියට දැනුම් දීලා තිබුණා 11 වෙනකම් වැඩ කරලා ගෙදර යන්නම් කියලා. බිරිඳගේ අසනීප තත්වය ඇය ගණනකට අරගෙන නැහැ. පුෂ්පලතා කිහිපසැරයක්ම සුපවයිසර්වරියට දැනුම් දීලා තිබුණා ඇයට අසනීපයි, ඇගේ ඔළුව කැරකෙනවා, ඇගේ කකුල් දෙක වෙව්ලනවා සහ ඇගේ පපුව රිදෙන බව. නමුත් ඇයට ගෙදර එන්න දීලා නැහැ. උදේ 11ට විතර සික් රූම් එකට ගිහින් ඇය ටිකක් වෙලා ඉන්නකොට සුපවයිසර් නෝනා ඇවිත් මගේ බිරිඳට බැනලා එලවලා තිබුණා. මගේ බිරිඳ ගෙදර යන්න දැයි අහපු අවස්ථාවේ දී ඇයව ගෙදර එවලා තිබුණා නම් අපට අද මේ තත්වය උදාවෙන්නේ නැහැ. මම කොහොමහරි ඇයව බේරගන්නවා.
බිරිඳ මිය ගියේ කොහොමද කියලා මගේ දරුවන්ට පිළිතුරු දෙන්න බැරිව මම අසරණ වෙලා. මගේ දරුවෝ නිතරම අහනවා අම්මාට මොකද වුණේ කියලා. බිරිඳ රෝහලේදී කිව්වා සුපවයිසර් ලක්මාලි තමන්ට ගෙදර යන්න දුන්නේ නැත්තේ ටාකට් එක ඉවර කරන්න ඕනෑ නිසා කියා. සුපවයිසර්වරිය බිරිඳට සැර කරලා තිබුණා අද මේ ඕඩරේ ඉවර කරන්න ඕනෑ කියලා. මගේ බිරිඳ හරිම අහිංසක කෙනෙක්. සුපවයිසර් වරිය මගේ බිරිඳගේ මරණයට වගකි කියන්න ඕනෑ.
අපි කවදාවත් ආයතනයට වරදක් හිතන්නේ නැහැ. අපි ඒ ආයතනය නිසායි මේ තරම් කාලයක් ජීවත් වුණේ. මගේ බිරිඳ මියගිහින් මාසයක් වෙලත්, ආයතනයෙන් මට කිසිම පිළිතුරක් ලබා දුන්නේ නැහැ. මගේ බිරිඳට මේ අසාධාරණය කළේ ඇයි ද කියා ඒ අය මට කීවේ නැහැ.
මගේ ලොකු පුතා මගෙන් නිතරම අහනවා අම්මා අන්තිම වෙලාවේ මොනවාද කිව්වේ කියලා. මම කොහෙමද පුතාට කියන්නේ ආයතනයේ වගකිවයුතු අය අම්මාගේ රෝගී තත්වය ගණනකට නොගෙන හිටිය නිසායි, ඔයාගේ අම්මා මැරුණේ කියලා. මම ඒ බව කීවොත් මගේ දරුවෝ ඒ ආයතනයට වෛර කරාවි. දරුවෝ දැන් අම්මා ගැන හිත හිත පාසල් යන්නේත් නැතිව ගෙදරට වෙලා ඉන්නවා. මගේ පොඩි පුතා අහනවා තාත්තේ අම්ම් අද බිස්කට් අරගෙන ඒවි නේද කියලා. මගේ බිරිඳ මිය යන්න කලින් රෝහලේ ඇගේ ඇඳ ගාව පැය 3ක් විතර මම ඇය එක්ක හිටියා. ඇය මිය යන්න විනාඩි 10කට විතර කලින් වෛද්යවරු ඇගේ ඇඳ ගාවින් මාව ඉවත් කළා. වෛද්යවරියක් මට කතා කරලා කිව්වා ඇයට බරපතළයි. බිරිඳ උදේ ඉදලා තෙහෙට්ටුවෙන් ඉඳලා ඇයට පපුවේ මහන්සිය හැදිලා තියෙනවා. උදේම ඇයව රෝහල් ගත කළා නම් බිරිඳව බේරගන්න පුළුවන් වන බව.’
පුෂ්පලතාගේ අවසන් කටයුතු ඔක්තෝබර් 13 වැනිදා කිරිපෝරුව වත්තේදී සිදු කර තිබිණි. ඇයගේ මරණයට අවසන් ගෞරව දැක්වීමට විශාල පිරිසක් පැමිණ තිබුණද ඇය සමඟ එකට බ්රැන්ඩික්ස් ආයතනයේ සේවය කළ කිසිදු මිතුරෙකු පැමිණ නැති බවත් සිවකුමාර් පවසයි.
‘පුෂ්පලතා ලෙඩ වෙලා ඉන්නකොට දිගටම වැඩ කරන්න තියාගත්ත නිසා තමයි එයා මැරුණේ කියලා ලයින් එකේ ළමයි කතා වෙලා තියෙනවා. පස්සේ මේ කතාව මානව සම්පත් කළමනාකරණ අංශයට ගිහින්. ඉන්පස්සේ ඇය ගැන කවුරුත් කතා කරන්නේ නැහැ. මගේ බිරිඳ සමඟ වැඩ කළ අය ඇයට වුණ සිද්ධිය කතා කරන්න බයයි. ආයතනයෙන් ඒ අයට කතා කරන්න එපා කියලා තියෙන බව අපිට දැනගන්නට ලැබුණා. පුෂ්පලතා කියන නම වත් ආයතනය ඇතුළේ කියන්න දෙන්නේ නැහැලු.
මරණ පරීක්ෂණය කළ අධිකරණ වෛද්යවරිය රෝහලේදී මගේ ළඟට ඇවිත් ඇහුවා බිරිඳගේ මරණය සැකයිද කියලා. මම ඇයට කීවා ආයතනය ඇතුළේ මොනවාද වුණේ ද කියලා මම දන්නේ නැති නිසා ආයතනය ගැන සැක කරන්න බැහැ කියලා.
ඒ මැඩම් ආපු ගමන් මට කීවා ආ මේ පුෂ්පලතානේ. මෙයා බ්රැන්ඩික්ස් ගාමන්ට් එකේනේ වැඩ කරන්නේ. මෙයා පැනඩෝල් පෙත්තක්වත් බීලා නැහැ නේ. මම මෙයාව අඳුනනවා කියලා. මගේ බිරිඳව ඇය හඳුන්නේ කොහොමද කියලා මට ඒ වෙලාවේ සැකයක් ඇති වුණා. ආයතනය ගැන සැකයිද කියලා ඒ මැඩම් මගෙන් ඇහුවාම කීවේ නැත්තේ ඒ නිසා.
ඉන්පස්සේ ඔක්තෝබර් 17 වෙනිදා අධිකරණ වෛද්ය නිලධාරිනියව මුණගැහෙන්න ගියා. ඇය මට කීවා ආ මම ඔයාගේ දූරකථන අංකය ඉල්ලගෙන තියෙන්නේ. ඔයාට දැනුවත් කරන්න බැරි වුණා. පුෂ්පලතාට නියුමෝනියාවනේ. ඒකනේ මැරිලා තියෙන්නේ. ආයතනයෙන් රෝහලට අරගෙන යන්න ලෑස්ති වෙද්දී එයා ගිහින් නැහැ කියලා ජේ.එම්.ඕ නෝනා මට කිව්වා. මම ඒ වෙලාවේ ඇගෙන් ඇහුවා ඩොක්ට නියුමෝනියාව එක පාරටම හැදෙන්නේ නැහැනේ. මාස තුනක්වත් තිස්සේ සෙම නරක් කරලා ලේ යනවා නේද? පුෂ්පලතා රෝහලට යන්න බැහැ කියපු වෙලාවේ ඩොක්ට එතනද හිටියේ කියලා. ඉන්පස්සේ ඇය මගේ එක්ක කතා කළේ නැහැ. මරණ සහතිකය පරක්කු වෙනවා. අවිස්සාවේල්ල රෝහලෙන් ගන්න කියලා ඇය ගියා. මට පස්සේ දැනගන්න ලැබුණා ඒ වෛද්යවරිය නිතරම බ්රැන්ඩික්ස් ආයතනය සමඟ වැඩ කරන බව. බ්රැන්ඩික්ස් එකේ අයට ඇය බෙහෙත් ලබා දෙන්න යනවා කියලා. මගේ බිරිඳ මිය ගියේ සාමාන්ය ලෙඩකින් බව ඇය මට හේත්තු ගන්නවන්න උත්සහ කළා.’
බිරිඳගේ මරණ සහතිකය ගැනීමට අවිස්සාවේල්ල රෝහලට ගිය සිවකුමාර්ට දැන ගන්නට ලැබී ඇත්තේ රෝගාතුර වූ පුෂ්පලතා රෝහලට ඇතුළත් කරන අවස්ථාවේදී බ්රැන්ඩික්ස් ආයතනයෙන් රෝගියාගේ භාරකරු ලෙස ලබා දී ඇත්තේ තමන්ගේ විස්තර බවය.
පුෂ්පලතාට නිවාඩු නොදී, රෝගී තත්වය හමුවේ වුවද අඛණ්ඩව වැඩෙහි යොදා ගත්, සුපරීක්ෂකවරියට එරෙහිව ඔක්තෝබර් 19 වැනිදා අවිස්සාවේල්ල පොලිසියට ගොස් සිවකුමාර් පැමිණිල්ලක් කර ඇත.
‘මගේ බිරිඳගේ මරණ පරීක්ෂණය නැවත කරදෙන්න කියා මම ඉල්ලනවා.’ සිවකුමාර් කියයි.
