හිටපු පාර්ලිමේන්තු මන්ත්‍රී මුහම්මද් හිස්බුල්ලාට අමෙරිකානු ඩොලර් මිලියන දෙකක් එනම් ශ්‍රී ලංකා රුපියල් කෝටි 60ක් ඉක්මවන මුදලක් වංචා කළ බව චෝදනා එල්ල වූ ඝානා ජාතිකයන් එකොළොස් දෙනෙකු එරට ආරක්ෂක අංශ අත්අඩංගුවට ගෙන අධිකරණයට ඉදිරිපත් කිරීමෙන් අනතුරුව ඇප මත මුදාහැර බව ඝානා මාධ්‍ය වාර්තා කර තිබිණි.
තමන්ට රත්‍රං ලබාදෙන බවට දුන් ව්‍යාජ පොරොන්දුවක් මත මෙම දැවැන්ත මුදල අහිමි කරගෙන තිබුණු හිස්බුල්ලා මහතා ඝානා ජාතික ආරක්ෂක කවුන්සිලයට කළ පැමිණිල්ලකට අනුව, ඝානා ජාතිකයින් 11 දෙනෙකුගෙන් යුත් රත්‍රං වංචා ජාලයක සාමාජිකයන් එරට ආරක්ෂක අංශ අත්අඩංගුවට ගෙන අධිකරණයට ඉදිරිපත් කර තිබිණි.
විමර්ශනවලට අනුව හෙළි වී ඇත්තේ 2023 වසරේදී සැකකරුවන් හිස්බුල්ලා මහතාට රත්‍රං ලබා දෙන බවට පොරොන්දු වී එම ඩොලර් මිලියන 02ක මුදල ලබාගෙන ඇති බවය. මුදල ලබාගැනීමෙන් අනතුරුව සැකකරුවන් හිස්බුල්ලා මහතා සමග පැවති සියලු සබඳතා අත්හිටුවා ඇති බවත් පසුව එම සැකකරුවන්ම යළිත් හිස්බුල්ලා මහතා සම්බන්ධ කරගෙන ඔහුට රත්‍රං කිලෝග්‍රෑම් 50ක් විකිණීමට ඉදිරිපත් වී ඇති බවත්ය. එම රත්‍රං ගනුදෙනුව නීත්‍යනුකූල බව එරට වගකිව යුතු ආයතනවලට පෙන්වීම සඳහා හිස්බුල්ලා මහතා සහ සැකකරුවන් අතර රත්‍රං විකිණීම පිළිබඳව අවබෝධතා ගිවිසුමක්ද අත්සන් තබා ඇති බවට විමර්ශනවලදී හෙළි වී ඇත.
ඒ අනුව ක්‍රියාත්මක වූ ඝානා ජාතික ආරක්ෂක කවුන්සිලයේ නිලධාරීන් 2025 ඔක්තෝබර් 16 වන දින වෙයිජා එස්.සී.සී. ප්‍රදේශයේදී සැකකරුවන් අත්අඩංගුවට ගෙන තිබිණි. එම අවස්ථාවේදී රත්‍රං බවට සැක කළ හැකි කහ පැහැති ලෝහ කැබලි දෙකක් ද සොයාගෙන ඇති අතර, ඒවායේ සත්‍යතාව තහවුරු කරගැනීම සඳහා පරීක්ෂණ ක්‍රියාත්මක බව පොලිස් ප්‍රධාන පරීක්ෂක ජේකොබ් කූබල් මහතා අධිකරණයට දන්වා ඇති බව එරට මාධ්‍ය වාර්තා කර තිබිණි.
ඝානා ජාතික ආරක්ෂක කවුන්සිලයේ නිලධාරීන් මෙම නඩුවේ පැමිණිලිකරුවන් ලෙස ද කටයුතු කරන අතර අපරාධ සිදුකිරීමට කුමන්ත්‍රණය කිරීම, බොරු පොරොන්දු මත වංචා කිරීම සහ වංචා කිරීමට තැත් කිරීම යන චෝදනා යටතේ මෙම සැකකරුවන්ට නඩු පවරා ඇති බවද පොලිසිය අධිකරණයට පවසා ඇත.
න්යිරාබා ද්වාමේනා, බෙන්ස්කාර්ල් ද්වාමේනා, අබ්දුල් රවුෆ් ඇඩම්, සල්ලා මාමූඩි, අහමඩ් ඉෂාහ්, උමරු පාෆඩෙනම්, අල්මාමූඩි සලේ, යෝ අට්ටා ඇන්ට්වි, ඔස්මාන් සුලේමාන්, සාන්ෆෝ මුබසීර්, සහ සලීෆු සුලේමාන් යන අය මෙසේ අත්අඩංගුවට ගෙන තිබිණි. එරට අධිකරණය හමුවේ දීර්ඝ නඩු විභාගයකින් අනතුරුව සැකකරුවන් එකොළොස් දෙනාම ඇප මත මුදා හැරීමට නියෝග අධිකරණය නියෝග කර ඇති අතර එක් අයෙකුට ඝානා සේඩි ලක්ෂ 05 එනම් ඇමරිකානු ඩොලර් 33,000ක් බැගින් වූ මුදල් ඇපයක් සහ ශරීර ඇප දෙකක් නියම කර තිබේ. එම ශරීර ඇපකරුවන්ගෙන් එක් අයෙකු ඉඩමක් සහිත දේපළක හිමිකරුවෙකු විය යුතු අතර, එම දේපළේ මුල් ඔප්පුව අධිකරණ රෙජිස්ට්‍රාර්වරයා වෙත භාර දිය යුතු බවට ද නියෝග කර ඇත. මෙම සිද්ධියට අදාළ නඩුව 2025 නොවැම්බර් 20 වන දින නැවත කැඳවීමට නියමිත බව මාධ්‍ය වාර්තා කර ඇත.
ගැටලුව වන්නේ හිටපු පාර්ලිමේන්තු මන්ත්‍රි හිස්බුල්ලාට රත්‍රං මිලදී ගැනීමට මෙතරම් ආදායමක් කොයින්ද පිළිබඳව සහ අදාළ මුදල් ඔහුගේ නොවන්නේ නම් ඔහුට එතරම් වත්කම් කොයින්ද යන්න විමර්ශනයට ලක් කළ යුතුය යන්නය. හිස්බුල්ලා මහතා අල්ලස් හෝ දූෂණ චෝදනා විමර්ශන කොමිෂන් සභාවට ඉදිරිපත් කර ඇති ඔහුගේ වත්කම් බැරකම් ප්‍රකාශය අනුව ඔහු සන්තකයේ මෙතරම් මුදලක් තිබූ බව සඳහන් කර නොමැත.
හිටපු පාර්ලිමේන්තු මන්ත්‍රී මොහොමඩ් ලෙබ්බේ අලීම් මොහොමඩ් හිස්බුල්ලා විවිධ අවස්ථාවලදී පාර්ලිමේන්තු මන්ත්‍රීවරයෙකු ලෙස කටයුතු කර ඇති අතර 2019 වසරේදී ඔහු නැගෙනහිර පළාත් ආණ්ඩුකාරවරයා ලෙස පත් කරනු ලැබීය. පාර්ලිමේන්තු මන්ත්‍රීවරයෙකු ලෙස කටයුතු කරමින් සිටියදී රජය සමග කොන්ත්‍රාත්තුවකට එළැඹීම සම්බන්ධයෙන් ඔහුට චෝදනාවක් එල්ල විය. ඔහු මඩකලපුව විශ්වවිද්‍යාලය නමින් අධ්‍යාපන ආයතනයක් පිහිටුවීමේදී රජය සමග ව්‍යාපාර ගිවිසුමකට එළැඹ සිටි අතර එම නිසා 2010- 2015 කාලසීමාවේ ඔහුට අයත් වූ පාර්ලිමේන්තු මන්ත්‍රීධුරය අතීතයට බලපාන පරිදි අහෝසි කරන ලෙස නීතිපති දෙපාර්තමේන්තුව නිර්දේශ කර තිබිණි.
පාර්ලිමේන්තු මන්ත්‍රි මොහොමඩ් හිස්බුල්ලා 2023 අංක 09 දරන දූෂණ විරෝධී පනතේ 82 වගන්තිය යටතේ 2025 වාර්ෂික වත්කම් සහ බැරකම් ප්‍රකාශය ශ්‍රී ලංකා පාර්ලිමේන්තුවේ හිටපු මන්ත්‍රීවරයෙකු ලෙස 2025 ජුනි 20 වන දින ඉදිරිපත් කර ඇති අතර එම වත්කම් බැරකම් ප්‍රකාශයෙහි 2025 මාර්තු 31 වන දිනට අදාළ ඔහුගේ වත්කම් සහ බැරකම් පිළිබඳ තොරතුරු ඇතුළත් කර ඇත.
පාර්ලිමේන්තු වෙබ් අඩවියේ හිස්බුල්ලා මහතා ව්‍යාපාරිකයෙකු ලෙස සඳහන් කර ඇති නමුත් ඔහුගේ ව්‍යාපාරය කුමක්ද, එම ව්‍යාපාරයේ ස්වභාවය හෝ ව්‍යාපාරයෙන් ඔහුට ලැබෙන අදායම පිළිබඳව කිසිවක් සඳහන් කර නොමැත. එම තීරුවේ ඔහු “කිසිවක් නැත” ලෙස සඳහන් කර ඇත. ව්‍යාපාරික වත්කම් පිළිබඳ කොටසෙහි ඔහුගේ ව්‍යාපාර සම්බන්ධයෙන් කිසිදු තොරතුරක් ඇතුළත් නොවීම, වත්කම්වල සත්‍ය විනිවිදභාවය පිළිබඳව ගැටලුවකි.
ආදායම් මාර්ග පිළිබඳව අසා ඇති තීරුවේ ඔහුට පාර්ලිමේන්තු මන්ත්‍රීවරයෙකු ලෙස වැටුප් සහ දීමනා ලැබෙන බවට සඳහන් කර ඇති අතර ව්‍යාපාරිකයෙකු ලෙස හෝ වෙනත් විදේශීය හෝ දේශීය ආදායම් මාර්ග පිළිබඳව හෝ රත්‍රං වෙළඳාමෙන් අපේක්ෂිත ආදායමක් පිළිබඳව සඳහනක් නොමැත.
මන්ත්‍රිවරයාගේ බිරිඳ සතුව රත්‍රං ග්‍රෑම් 240ක් ඇති බවත් එය මවගෙන් ඇයට ලැබුණු බවත් එම රත්‍රංවල වටිනාකම ලක්ෂ 60ක් පමණ බවත් සඳහන් කර ඇත. තමන් සතුව කිසිදු වාහනයක් නැති බවත් ව්‍යාපාර හෝ කිසිදු අමතර අදායමක් තමන්ට නොලැබෙන බවත් වත්කම් බැරකම් ප්‍රකාශයේ සඳහන් කර ඇත. තමන්ට රුපියල් 820,380ක විශ්‍රාමික වැටුපක් ලැබෙන බවත් පාර්ලිමේන්තු සංකීර්ණයේ පිහිටි ලංකා බැංකු ශාඛාවේ තමන්ගේ සහ තම බිරිඳගේ බැංකු ජංගම ගිණුම්වල ලක්ෂ 60කට ආසන්න මුදලක් ඇති බවත් ඔහු සඳහන් කර ඇත.
එහි ඔහු සඳහන් කර ඇති කරුණු අනුව ඔහු තමන්ගේ වාසස්ථානය ලෙස සඳහන් කර ඇත්තේ කොළඹ 08, ලේක් ඩ්‍රයිව්හි පිහිටි නිවසක ලිපිනයකි. නිවස ඔහු මිලදී ගත්තේ කෙසේද, එහි වටිනාකම හෝ ඔහුට එම දේපල ලැබුණේ කෙසේද යන්න ඔහු තම වත්කම් බැරකම් ප්‍රකාශයේ සවිස්තරාත්මක තොරතුරු ප්‍රකාශයේ අදාල කොටස්වල සඳහන් කර නොමැත.
තවද 2024 ඔක්තෝබර් 01 වන දින 3,517,990ක් සහ 2025 පෙබරවාරි 01වන දින 5,500,000ක මුදලක් ණයක් ලෙස තමන් ලබා ගෙන ඇති බවත් මන්ත්‍රීවරයා සඳහන් කර ඇත. කෙසේ නමුත් මන්ත්‍රිවරයා 2023 වර්ෂයේදී ඝානාවේ රත්‍රං ලබා ගැනීමට සිදු කරන ලද මුදල් ලබා දීම පිළිබඳව කිසිවක් වත්කම් ප්‍රකාශයේ සඳහන් කර නොමැත.
එසේ නම් මන්ත්‍රිවරයා ඝානාවලදී රත්‍රං ලබා ගැනීම සඳහා අත්අඩංගුවට ගත් සැකකරුවන්ට ලබා දුන් මුදල් උපායාගත් ආකාරය විමර්ශනය කළ යුතු කරුණකි. හිස්බුල්ලා මහතාට ඇමරිකානු ඩොලර් මිලියන 2ක් ලැබුණේ කෙසේද? යන්න අල්ලස් හෝ දූෂණ විමර්ෂණ කොමිෂන් සභාව සොයාබැලිය යුතු අතර 2023 වසරේ වංචාවට ලක් වූ ඩොලර් මිලියන 2ක මුදල ගෙවීමට පාර්ලිමේන්තු මන්ත්‍රීවරයෙකුට හැකියාව ලැබුණේ කෙසේද? එම මුදල ඔහුගේ ව්‍යාපාරික ආදායමකින් ලැබුණේ නම් ඔහු තම වත්කම් බැරකම් ප්‍රකාශයේ මුදල් සම්බන්ධයෙන් හෝ තමන් සිදු කරන රත්‍රං ගනුදෙනු සම්බන්ධයෙන් වත්කම් බැරකම් ප්‍රකාශයේ සඳහන් නොකළේ ඇයිද යන්න බරපතල ගැටලුවකි.
