වැටුපත් පක්ෂයට දී හිතවතුන්ගෙන් යැපෙමින් පූර්ණකාලීනව දේශපාලනයේ යෙදුණ ආණ්ඩුවේ මැති ඇමතිලාගේ වත්කම් මෙන්න

පසුගිය සතියේ අප ප්‍රකාශයට පත්කළේ අල්ලස් හෝ දූෂණ චෝදනා විමර්ශන කොමිසමට පැමිණිල්ලක් ලෙස ඉදිරිපත් වූ ජාතික ජන බලවේග ආණ්ඩුවේ ඇමතිවරුන් හා නියෝජ්‍ය ඇමතිවරයකුගේ ප්‍රකාශිත වක්කම් පිළිබඳ මූලික තොරතුරු පමණය. එම වත්කම් උපයාගත් ආකාරයට අදාළ වැඩිදුර තොරතුරු මෙන්ම එම වත්කම්වල ප්‍රකාශිත අගයන් සම්බන්ධයෙන් වැඩිදුර තොරතුරු සඳහන් කළේ නැත. එහෙත් ජාතික ජන බලවේග ආණ්ඩුවේ මැති ඇමතිවරුන්ගේ වත්කම් හා බැරකම් ප්‍රකාශවල අඩංගු කරුණු අභියෝගයට ලක්වීම, විවාදයට තුඩු දීම හා ප්‍රශ්න කිරීමට ලක්වීම දිනෙන් දින සිදුවෙමින් පවතී.

ඇමති සුනිල් හඳුන්නෙත්ති සමහර වත්කම් ඔහු උපයාගත් ආකාරය කියා නැති බවට මාධ්‍ය කළ ප්‍රශ්න කිරීමකදී හොඳටම කේන්ති ගෙන තිබුණි. ඔවුන්ට ජනතාව කෑම බීම ගෙනැත් දීමත්, ඔවුන් ඒවා බාර ගැනීමත් අනුන්ට මොකද හෙවත් ‘පාන්ද’ යනුවෙන් ඇමතිවරයාගේ පිළිතුර වී තිබුණි. නියෝජ්‍ය ඇමති නලින් හේවගේ ඔහුගේ වත්කම් හා බැරකම් ප්‍රකාශයේ සඳහන් කර තිබූ රුපියල් ලක්ෂ විසි ගණනක බැංකු ශේෂයන් සම්බන්ධයෙන් කියා තිබුනේ ඒවා ඔහුගේ දියණියගේ වැඩිවිය පත්වීමේ උත්සවයේදී ලැබුණ මුදල් බවයි. නියෝජ්‍ය ඇමති චතුරංග අබේසිංහද කියා තිබුණේ ඔහුට ඇති වත්කම් පියාගෙන් ලැබුණ ඒවා බව හා ඔහු විසින් උපයාගෙන දියුණු කරගත් ඒවා බවයි. වසන්ත සමරසිංහ ඇමතිවරයාද ඊට පෙර කියා තිබුණේ දුම්රියේ වෙළඳාම් කිරීම ආදි දේවල් කරමින් ඔහු උපයාගත් ආදායම් ආයෝජනය කර එම වත්කම් උපයාගත් බවයි.

ජනතා විමුක්ති පෙරමුණට සම්බන්ධ ලංකා විදුලි සේවක සංගමයේ ප්‍රධාන ලේකම් ලෙස කටයුතු කරන වත්මන් කඩුවෙල නගරාධිපති රන්ජන් ජයලාල් විදුලිබල මණ්ඩල වෘත්තීය සමිති ක්‍රියාමාර්ග හමුවේ එහි සේවකයකුට තර්ජනය කරන හඬ පටයක් සංසරණය වන අතර එයට අනුව ඔහුට වාහනයක් ලබාදී ඇත්තේ එහි සේවකයන්ය. එම වාහනය වත්කම් බැරකම් යටතට වැටිය යුත්තක් වන අතර ඔහුගේ වත්කම් බැරකම් ප්‍රකාශයේ ඒ සම්බන්ධයෙන් තිබෙන්නේ කුමක්ද යන්නද වැදගත් කරුණකි.
මේ ආකාරයට වත්කම් හා බැරකම් ප්‍රකාශවල සඳහන් තොරතුරු පිළිබඳව විමසන කල ජාතික ජන බලවේගයේ නියෝජිතයන් මොන මොන පිළිතුරු ලබාදේවි දැයි තවදුරටත් ඉදිරියේදී බලාගත හැකි වනු ඇත. පක්ෂය වෙනුවෙන් පූර්ණකාලීනව දේශපාලනය කර, මන්ත්‍රීකම් ලැබුණු විට ඒවාට මහජන මුදලින් ගෙවූ වැටුප් හා දීමනා පක්ෂ අරමුදලට ලබාදී පක්ෂ සාමාජිකයන් හා හිතවතුන් ලබාදෙන කෑම කමින්, ඇඳුම් අඳිමින්, වාහනවලට ඉන්ධන ලබාගනිමින් ජීවත් වූ පිරිසකගේ වත්කම් ගැන ජනතාව ප්‍රශ්න කිරීම අසාධාරණ නොවේ. මන්ද ඔවුන් රැකියාවක් කළේ හෝ ව්‍යාපාර කළේ නැති බව ජනතතාව දන්නා නිසාය.

කොහොමත් වත්කම් හා බැරකම් ප්‍රකාශ ලබා ගන්නේම මහජන පරීක්ෂාව සඳහාය. එය මහජන නියෝජිතතයන් බවට පත්වන දේශපාලනඥයින්ට පමණක් සීමා වූවක් නොවේ. ඉහළම අධිකරණ හා රාජ්‍ය නිලධාරීන්ටත්, රජයෙන් වැටුප් හෝ දීමනා නොලබන ජනමාධ්‍ය හා වෘත්තීය සමිතිවල තනතුරු දරන්නන්ටත් අදාළ එකකි.

2023 අංක 9 දරන දූෂණ විරෝධී පනත අනුව, ජනාධිපතිවරයා විසින් අල්ලස් හෝ දූෂණ චෝදනා විමර්ශන කොමිසමටද, අගමැති, කැබිනට් ඇමතිවරුන් හා ආණ්ඩුක්‍රම ව්‍යස්ථාවේ 45 ව්‍යවස්ථාව යටතේ පත්කරනු ලබන ඇමතිවරුන් (වර්තමානයේ නියෝජ්‍ය ඇමතිවරුන්) ජනාධිපතිවරයාටද, පාර්ලිමේන්තු මන්ත්‍රීවරු කථානායකවරයාටද, පළාත් ආණ්ඩුකාරවරු ජනාධිපතිවරයාටද, පළාත් සභා මන්ත්‍රීවරු හා පළාත් රාජ්‍ය සේවයේ මාණ්ඩලික නිලධාරීන් ආණ්ඩුකාරවරයාට, පළාත් සභා විෂයභාර අමාත්‍යාංශයේ ලේකම්වරයාට හා පළාත් ප්‍රධාන ලේකම්වරයාටද, පළාත් පාලන ආයතනවල තෝරා පත් කර ගනු ලැබූ සභිකයන් සහ මාණ්ඩලික නිලධරයන් පළාත් පාලන අමාත්‍යාංශයේ අමාත්‍යවරයා, පළාත් පාලන අමාත්‍යාංශයේ ලේකම්, නාගරික කොමසාරිස්, නගර සභා ලේකම්, ප්‍රාදේශීය සභා ලේකම්ටද, ජනාධිපතිවරයා විසින් පත්කරනු ලබන විනිසුරුවරුන් හා රජයේ නිලධරයන් ජනාධිපතිවරයාටද, අමාත්‍ය මණ්ඩලය විසින් පත්කරනු ලබන රජයේ නිලධරයන් අදාළ ආයතන ප්‍රධානියාටද, අධිකරණ සේවා කොමිෂන් සභාව විසින් පත්කරනු ලබන අධිකරණ නිලධරයන් සහ ලේඛනගත රජයේ නිලධරයන් අධිකරණ සේවා කොමිෂන් සභා ලේකම්ටද, අමාත්‍යාංශවල හා රජයේ දෙපාර්තමේන්තුවල මාණ්ඩලික නිලධරයන් අදාළ ආයතන ප්‍රධානියාටද, පාර්ලිමේන්තු මන්ත්‍රීවරුන් නොවන ආණ්ඩුක්‍රම ව්‍යවස්ථා සභාවේ සාමාජිකයන් ජනාධිපතිවරයාටද, කොමිෂන් සභාවල සභාපතිවරුන් හා සාමාජිකයන් ජනාධිපතිවරයාටද, ශ්‍රී ලංකා මහ බැංකුවේ සහ රාජ්‍ය බැංකුවල මාණ්ඩලික නිලධරයන් මහ බැංකු අධිපති, බැංකුවල ප්‍රධාන විධායක නිලධාරි/සාමාන්‍යාධිකාරිටද, ස්වාධීන කොමිෂන් සභාවල මාණ්ඩලික නිලධරයන් අදාළ ආයතන ප්‍රධානියාටද, ස්වාධීන නියාමන සහ අධීක්ෂණ කොමිෂන් සභාවල හෝ පුද්ගල මණ්ඩලවල සභාපතිවරු, කොමසාරිස්වරු සාමාජිකයින් සහ මාණ්ඩලික නිලධරයන් පත්කිරීම් බලධරයාට හෝ ආයතන ප්‍රධානියාටද, රාජ්‍ය සංස්ථාවක සභාපතිවරු, අධ්‍යක්ෂවරු, මණ්ඩල සාමාජිකයන්, විධායක නිලධාරීන් පත්කිරීම් බලධරයාටද, පාර්ලිමේන්තු මන්ත්‍රීවරුන්ගේ, පළාත් සභා මන්ත්‍රීවරුන්ගේ හා පළාත් පාලන ආයතනවල සභිකයන්ගේ පුද්ගලික කාර්ය මණ්ඩල සාමාජිකයන් පත්කිරීම් බලධරයාටද, යුද්ධ හමුදාවේ නිලධරයන් යුද්ධ හමුදාපතිවරයාටද, නාවික හමුදාවේ නිලධරයන් නාවික හමුදාපතිවරයාටද, ගුවන් හමුදාවේ නිලධරයන් ගුවන් හමුදාපතිවරයාටද, දේශපාලන පක්ෂවල තනතුරු දරන්නන් මැතිවරණ කොමසාරිස්වරයාටද, වෘතත්තීය සමිතිවල විධායක නිලධරයන් කම්කරු විෂය භාර අමාත්‍යාංශයේ ලේකම්වරයාටද, ජනාධිපතිවරණ, පාර්ලිමේන්තු, පළාත් සභා හා පළාත් පාලන මැතිවරණ අපේක්ෂකයන් මැතිවරණ කොමසාරිස්වරයාටද, රජය හෝ රජයේ සංස්ථාවක් විසින් සියයට 25කට නොඅඩු කොටස් දරන සමාගම් පනත යටතේ ලියාපදිංචි කළ සමාගම්වල සභාපතිවරු, අධ්‍යක්ෂවරු හා මාණ්ඩලික නිලධරයන් සමාගම් රෙජිස්ටාර්වරයාටද, පනතෙත් උපලේඛනගත මූල්‍ය ආයතනවල කළමනාකරණ හෝ අධීක්ෂණ කටයුතුවල නියැලෙන කාර්ය මණ්ඩලය අදාළ ආයතන ප්‍රධානියාටද, ශ්‍රී ලංකාවේ රාජ්‍ය දූත මණ්ඩලවල ප්‍රධානීන් ජනාධිපතිවරයාටද, අමාත්‍ය මණ්ඩලය විසින් රාජ්‍ය දූත මණ්ඩලවලට පත්කළ නිලධරයන් විදේශ කටයුතු අමාත්‍යාංශයේ ලේකම්ටද, පුවත්පත්වල හිමිකරුවන්, කර්තෘවරුන් සහ කර්තෘ මණ්ඩලයේ සාමාජිකයන් ජනමාධ්‍ය කටයුතු අමාත්‍යාංශයේ ලේකම්ටද, විදුලි සංදේශ පනතේ බලපතත්‍රලාභී මාධ්‍ය සමාගම්වල හිමිකරුවන්, කර්තෘවරුන් සහ කර්තෘ මණ්ඩලයේ සාමාජිකයන් විදුලි සංදේශ අමාත්‍යාංශයේ ලේකම්ටද, ජාතික ක්‍රීඩා සංගම්වල ධුර දරන නිලධරයන් ක්‍රීඩා විෂය භාර අමාත්‍යාංශයේ ලේකම්ටද සිය වත්කම් හා බැරකම් ප්‍රකාශ ලබාදිය යුතුය.

අල්ලස් හෝ දූෂණ චෝදනා විමර්ශන කොමිෂන් සභාව වත්කම් හා බැරකම් ප්‍රකාශ ලබාදිය යුතු එම පිරිසෙන් මේ වනවිට ප්‍රසිද්ධියට පත්කර ඇත්තේ ජනාධිපති, අගමැති, කථානායක, අගවිනිසුරු, විපක්ෂ නායක, කැබිනට් ඇමතිවරු, මහ බැංකුවේ අධිපති, පළාත් ආණ්ඩුකාරවරු, නියෝජ්‍ය කථානායක, නියෝජ්‍ය ඇමතිවරු, පාර්ලිමේන්තුවේ නියෝජ්‍ය කාරක සභා සභාපති, ආණ්ඩුවේ ප්‍රධාන සංවිධායක, තානාපතිවරු, නිත්‍ය නියෝජිතයින්, මහ කොමසාරිස්වරු, කාර්ය මණ්ඩල නියෝජ්‍ය ප්‍රධානීන්, නියෝජ්‍ය මහ කොමසාරිස්වරුන්, ආණ්ඩුක්‍රම ව්‍යවස්ථා සභාවේ සාමාජිකයන්, නීතිපති, ශ්‍රේෂ්ඨාධිකරණ විනිසුරුවරුන්, අභියාචනාධිකරණයේ සභාපති විනිසුරු, අභියාචනාධිකරණ විනිසුරුවරුන් හා පාර්ලිමේන්තු මන්ත්‍රීවරුන්ගේ වත්කම් හා බැරකම් ප්‍රකාශ පමණය.

එහිදීද ප්‍රකාශකගේ හැර ආවරණය වන පුද්ගලයන් යටතට වැටෙන ඔහුගේ හෝ ඇයගේ බිරිඳ හෝ සැමියා, වයස නොසලකා යැපෙන දරුවන් හා වෙනත් ඕනෑම යැපෙන පුද්ගලයකුගේ නම් දැකබලා ගත නොහැකි ආකාරයට කළු කර ඇති අතර ඊට අමතරව ප්‍රකාශකගේ හා අනෙකුත් පුද්ගලයන්ගේ බැංකු ගිණුම් අංක වැනි සමහර තොරතුරුද දැකබලාගත නොහැකි ආකාරයට කළුකර ඇත.

මෙම කතිකාවේදී වැදගත් වන්නේ ජාතික ජන බලවේගය ලෙස පසුව එකතු වූ පිරිසට වඩා ජනතා විමුක්ති පෙරමුණේ පූර්ණකාලීන දේශපාලනඥයින් ලෙස කටයුතු කළ පුද්ගලයන්ගේ වත්කම් හා බැරකම් ප්‍රකාශවල ඇති තොරතුරුයි. එහෙත් ප්‍රශ්නය වන්නේ ආණ්ඩුවේ ඇමතිවරුන් කිහිප දෙනෙකු, නියෝජ්‍ය ඇමතිවරු කිහිප දෙනෙකු හා පාර්ලිමේන්තතු මන්ත්‍රීවරුන් විශාල පිරිසකගේ වත්කම් බැරකම් ප්‍රකාශ අල්ලස් හෝ දූෂණ චෝදනා වෙබ් අඩවියේ පළ වී නොතිබීමයි.

ඒ අය අතර ඇමතිවරුන් වන වන කේඩී ලාල් කාන්ත, රාමලිංගම් චන්ද්‍රසේකරන්, ක්‍රිෂාන්ත අබේසේන, නියෝජ්‍ය ඇමතිවරුන් වන රත්න ගමගේ, ආර්එම් ජයවර්ධන, මහින්ද ජයසිංහ, ගමගෙදර දිසානායක, මුනීර් මුලාෆර්, රුවන් රණසිංහ, උපාලි සමරසිංහ, නාමල් සුදර්ශන හා අරුන් හේමචන්ද්‍ර සිටිති. එමෙන්ම නියෝජ්‍ය කථානායක රිස්වි සාලිද සිටියි.

මන්ත්‍රීවරුන් අතර මොනරාගල දිස්ත්‍රික්කයේ අජිත් අගලකඩ, චතුරි ගංගානී හා රුවන් විජේවීර සිටිති. කුරුණෑගල දිස්ත්‍රික්කයේ එම්කේඑම් අස්ලාම්, ධර්මප්‍රිය දිසානායක, ගීතා හේරත් හා නාමල් සුදර්ශන සිටිති. කොළඹ දිස්ත්‍රික්කයේ සුසන්ත දොඩාවත්ත, අරුණ පනාගොඩ හා චන්දන සූරියආරච්චි සිටිති. ගම්පහ දිස්ත්‍රික්කයේ චම්පික හෙට්ටිආරච්චි, චමින්ද ලලිත් කුමාර, රුවන් මාපලගම හා අශෝක රංවල සිටිති. අනුරාධපුර දිස්තත්‍රික්කයේ භාග්‍ය ශ්‍රී හේරත් හා නිමල් පලිහේන සිටිති. මහනුවර දිස්ත්‍රික්කයේ තුෂාරි ජයසිංහ හා ෆස්මින් සරීෆ් සිටිති. පොලොන්නරුව දිස්ත්‍රික්කයේ පද්මසිරි බණ්ඩාර, මාතලේ දිස්ත්‍රික්කයේ ගමගෙදර දිසානායක, පුත්තලම් දිස්ත්‍රික්කයේ අජිත් ගිහාන්, යාපනය දිස්ත්‍රික්කයේ කේ ඉලන්කුමරන්, වන්නි දිස්ත්‍රික්කයේ මයිල්වාගනම් ජෙගතීස්වරන්, ගාල්ල දිස්ත්‍රික්කයේ හසාරා ලියනගේ, මඩකලපුව දිස්ත්‍රික්කයේ කන්දසාමි ප්‍රභූ, කලුතර දිස්ත්‍රික්කයේ දනුෂ්ක රංගනාත්, බදුල්ල දිස්ත්‍රික්කයේ කිට්නන් සෙල්වරාජ්, වන්නි දිස්ත්‍රික්කයේ සෙල්ලතම්බි තිගලනාදන් හා ජාතික ලැයිස්තුවේ අබුබකර් ආදම්බාවා සිටිති.

ඒ නිසාම වත්කම් බැරකම් ප්‍රකාශ පළවී ඇති ජවිපෙ පූර්ණකාලීන යැයි කියූ පිරිසේ හා ඔවුන් සමඟ දේශපාලනඥයින් නොවන ආකාරයට කටයුතු කළ පිරිසේ වත්කම් බැරකම් තොරතුරු තවදුරටත් සාකච්ඡා කිරීම උචිතය.

හඳුන්නෙත්තිගේ ගිණුම්වල ලක්ෂ 33ක්

ඒ අනුව ප්‍රශ්නයට භාජනය වී ඇති ඇමති සුනිල් හඳුන්නෙත්තිගේ වත්කම් බැරකම් ප්‍රකාශය ගත්කළ ඔහුට අයත් පර්චස් 44ක නිවසක් සහිත ඉඩමක් ඇත. එය අත්පත්කර ගත් ආකාරය හෙවත් තෑගි හෝ මිලදී ගැනීමක්ද යන්න අසන ප්‍රශ්නයට ඔහු සඳහන් කරන්නේ නැත යන්නය. වටිනාකම ගැන සඳහන් කරන්නේද නැත යන්නය. මේ නම් අපූරු පිළිතුරු ලබාදීමකි. එම නිවස සහිත ඉඩම ලැබුණ ආකාරයක් නැත. එයට වටිනාකමක්ද නැත. පාර්ලිමේන්තුවේ පවා සිටින කාලයේ ලැබෙන වැටුප් හා දීමනා පක්ෂයට ලබාදුන් ඔහුගේ බැංකු ගිණුම් තුනක ආසන්න වශයෙන් රුපියල් ලක්ෂ 33ක මුදල් තිබේ. ඉතිං මේවා මහජන පරික්ෂාවට ලක්කළ යුතු නොවේද?

කුමාර ජයකොඩිට මිලියන 43ක ආයෝජන

ජාතික ලැයිස්තුවෙන් පත්කළ බලශක්ති ඇමති කුමාර ජයකොඩි ගත්කළ ඔහුව ජාතික ජන බලවේග පාක්ෂිකයන් දන්නේ ජනාධිපති අනුර කුමාර දිසානායකගේ වම් අත ලෙසය. ඔහු විදුලි ඉංජිනේරුවකු යැයි කීවද ලංකා විදුලි බල මණ්ඩලයේ හෝ විදුලිය සම්බන්ධ පෞද්ගලික ආයතනයක සේවය කළ බවක් වාර්තා වන්නේ නැත. ඔහු සම්බන්ධයෙන් වාර්තා වන එකම රැකියාව වන්නේ ජනාධිපති අනුර කුමාර දිසානායක මීට පෙර කෘෂිකර්ම ඇමතිවරයා ලෙස කටයුතු කළ අවස්ථාවේදී ජාතික පොහොර ලේකම් කාර්යාලයට පත්කිරීම පමණය.

එහෙත් ඔහුට 2013 දී මිලදී ගත් රුපියල් මිලියන 7.5ක් වටිනා ටොයොටා ඇක්වා කාරයක් හා 2015 දී මිලදී ගත් රුපියල් මිලියන 45ක් වටිනා ටොයොටා ලෑන්ඩ් කෘෂර් රථයක් ඇත. ඔහුට ආයෝජන සහතතික රැසක් ඇති අතර ඒවායේ වටිනාකම ආසන්න වශයෙන් රුපියල් මිලියන 43කි. 2023.11.13 මිලදී ගත් ආසන්න වශයෙන් රුපියල් මිලියන 2.2 ක් (රු. 2,213,000.22), 2024.05.28 මිලදී ගත් රුපියල් මිලියන 7ක්, 2024.08.12 මිලදී ගත් ආසන්න වශයෙන් රුපියල් මිලියන 8.3ක් (රු. 8,321,833) 2024.07.24 මිලදී ගත් ආසන්න වශයෙන් රුපියල් මිලියන 8.5ක් (රු. 8,593,724.62) 2024.05.27 මිලදී ගත් රුපියල් මිලියන 10ක්, 2023.08.02 මිලදී ගත් රුපියල් මිලියන 2.5ක් 2023.05.02 මිලදී ගත් රුපියල් මිලියන 5ක් වශයෙන් ඒවා සඳහන් වේ. මෙම වත්කම් ඇත්තේ සොයා බැලිය යුතු මට්ටමේ නොවේද?

විජිත හේරත්ට ඩබල් කැබ් දෙකක්

විජිත හේරත්ට අක්කර භාගයක හා පර්චස් 26ක නේවාසික ගොඩනැගිල්ලක් ඇති බව සඳහන් කරන අතර එය මිලදී ගෙන ඇති එකකි. එහෙත් එහි වටිනාකම ලෙස සඳහන් කර ඇත්තේ රුපියල් 7000කි. ඔහුට 2012 දී හා 2017 දී මිලදී ගත් ටොයොටා ඩබල් කැබ් දෙකක් ඇති බව සඳහන් කරන අතර ඉන් එකක මිල රුපියල් මිලියන 12ක් වශයෙන් හා අනෙකේ මිල රුපියල් මිලියන 15ක් වශයෙන් සඳහන් කරයි.

ආනන්ද විජේපාලගේ ගිණුම්වල ලක්ෂ 89ක්

ජාතික ලැයිස්තුවෙන් පත්කළ ජනාධිපති අනුර කුමාර දිසානායකගේ පෞද්ගලික සහායකයෙකු වශයෙන් කටයුතු කළ මහජන ආරක්ෂක ඇමති ආනන්ද විජේපාල සම්බන්ධයෙන් ගත්කල වර්ගඅඩි 5000ක නිවසක් ඇති පර්චස් 40ක ඉඩමක් ඇත. එය මිලදී ගත් එකක් වන අතර එහි වටිනාකම රුපියල් මිලියන 10ක් ලෙස සඳහන් කර ඇත. ඔහුට හැටන් නැෂනල් හා කොමර්ෂල් යන බැංකුවල ගිණුම් 4ක් ඇති අතර ඒවායේ ඇති මුදල්වල ආසන්න අගය රුපියල් ලක්ෂ 89ක් වේ.

නිහාල් ගලප්පත්තිගේ ගිණුම්වල ලක්ෂ 26ක්

ජනතා විමුක්ති පෙරමුණේ මුල්ම පාර්ලිමේන්තු මන්ත්‍රීවරයා ලෙස සැලකෙන නිහාල් ගලප්පත්තිට එංජින් ධාරිතාව 3000 සීසී 2017 දී ගත් ටොයොටා හයිලුක්ස් වාහනයක් ඇති අතර එහි වටිනාකම රුපියල් මිලියන 17ක් ලෙස සඳහන් කර ඇත. ඔහුගේ බැංකු ගිණුම් 3ක ආසන්න වශයෙන් රුපියල් ලක්ෂ 26ක මුදලක් ඇත.

නාමල් කරුණාරත්නගේ ඉඩම ගත් විදියක් නෑ

නාමල් කරුණාරත්නට අක්කර කාලක නිවසක් සහිත ගොඩ ඉඩමක් ඇති අතර එය අත්පත්කර ගත් ආකාරය හෝ වටිනාකම සඳහන් කරන්නේ නැත. එමෙන්ම ජවිපෙ පූර්ණකාලීන ගොවි සංවිධාන නායකයකු වූ ඔහුට ලංකා බැංකුවේ හා මහජන බැංකුවේ ගිණුම් 3ක් ඇති අතර ආසන්න වශයෙන් ඒවයේ රුපියල් ලක්ෂ 18ක මුදලක් තිබේ.

නලින් හේවගේ ලක්ෂ 24කට ගෙයක් අරන්

නියෝජ්‍ය ඇමති නලින් හේවගේට ලංකා බැංකුවේ ගිණුම් 2ක් හා කොමර්ෂල් බැංකුවේ ගිණුමක් ඇත. එම ගිණුම්වල ඔහුට ආසන්න වශයෙන් රුපියල් ලක්ෂ 22ක මුදලක් ඇත. ඊට අමතරව පර්චස් 10ක නේවාසික ගොඩනැගිල්ලක් ඔහුගේ නමින් ඇති අතර එය මිලදී ගෙන ඇත්තේ රුපියල් ලක්ෂ 24කටය.

ටීබී සරත්ගේ කුකුල් ගොවිපලේ ආදායම ලක්ෂ 20යි

නියෝජ්‍ය ඇමති ටීබී සරත්ට වර්ග අඩි 1300ක නිවසක් ඇති බව සඳහන් කරන අතර එහි වටිනාකම රුපියල් ලක්ෂ 88ක් බව සඳහන් කරයි. එහෙත් එය මිලදී ගත් එකක්ද තෑගි වශයෙන් ලැබුන එකක්ද යන්න සඳහන් නොකරයි. ඔහුට ලීසිං මගින් මිලදී ගත් ඇලියොන් කාරයක් ඇති බව සඳහන් කරන අතර එහි වටිනාකම රුපියල් ලක්ෂ 65ක් බව සඳහන් කරයි. කුකුල් ගොවිපලකින් පසුගිය වර්ෂයේ රුපියල් ලක්ෂ 20ක ආදායමක් ලැබූ බව සඳහන් කරයි.

නිපුණආරච්චිට මුකුත්ම නෑලූ

ලක්ෂ්මන් නිපුණආරච්චිගේ වත්කම් බැරකම් ප්‍රකාශය බැලූ කල එහි නිවාස දේපල, ආදායම්, මූල්‍ය වත්කම් හා වෙනත් වත්කම් කිසිවක් නැති බව සඳහන් කරයි.