දණ්ඩ නීති සංග්‍රයේ වගන්ති කිහිපයක් සංශෝධනය කරමින් දරුවන්ට එරෙහිව ශාරීරික හා මානසික හිංසනයන්, දඬුවම් කිරීම් සහ නොසලකා හැරීම් තහනම් කරමින් සිදුකිරීමට යන නීති සංශෝධනය සම්බන්ධයෙන් ජනතාවගෙන් අදහස් ලබා ගනිමින් සිටින බව ජාතික ජනබලවේගයේ පාර්ලිමේන්තු මන්ත්‍රී රුවන් මාපල ගමගේ මහතා පැවසීය.
ඔහු මේ බව පැවසූවේ සැප්තැම්බර් 24 වන දින කාන්තා හා ළමා කටයුතු පිළිබඳ අමාත්‍ය සරෝජා සාවිත්‍රි පෝල්රාජ් පාර්ලිමේන්තුවට ඉදිරිපත් කළ පනත් කෙටුම්පත සම්බන්ධයෙන් සමාජයෙන් විරුද්ධ මත ඉදිරිපත් වන නිසා එම පනත් කෙටුපතෙහි සංශෝධන කිරීමට කටයුතු කරන්නේ දැයි අප කළ විමසීමේදීය.
මෙම පනත් කෙටුම්පත කිසිවෙකුට එරෙහිව ගෙන ආ එකක් නොවන බවත් දරුවන්ට දඬුවම් කිරීම දරුවන්ගේ මූලික මානව අයිතිවාසිකම් උල්ලංඝනය කිරීමක් ලෙස සලකා අදාල පනත් කෙටුම්පත සකස් කර ඇති බවත් මෙම සංශෝධනයේ ප්‍රධාන අරමුණ වන්නේ දරුවන් සියලු ආකාරයේ හිංසනයන්ගෙන් මුදා ගැනීම බවත් මාපලගම මහතා පැවසීය.
